Tasiilami aalisakkeriffik matugallartoq

Royal Greenlandip Tasiilami aalisakkeriffia nutaaq matugallarpoq.

Suliffeqarfissuaq aalisartunut allakkamini, KNR-ip takunniffigisaani taama paasissutissiivoq.

- Qerititsiviup naqitsinermut atortorissaarutaata ajutooqqanera pissutigalugu ajutooqqanera aaqqiivigineqartinnagu inuussutissarsiornikkut sillimaniarnermilu ingerlatsisinnaanngilagut, allakkami allassimavoq.

Allagaq naapertorlugu CO2-livimmik nutaamik pissarsinissaq pisariaqarpoq, taannalu sillimaniarneq pissutigalugu umiarsuakkut assartorneqartussaavoq.

Royal Greenlandip nunatsinni tunisassiornermut pisortaata, Meinhard Jacobsenip allakkamini ajutoorneq ajuusaarutigalugu oqaatigaa.

- Ajutoornerup aalisartunut, sulisunut inuiaqatigiinnullu ajoqutigisinnaasai ajuusaarutigaagut. Ajornartorsiutaasumik aaqqiissuteqarnissarput aamma isumannaatsumik patajaatsumillu piaartumik ingerlatitseqqissinnaalernissarput sulissutigigaarput.

Aalisakkeriffik qaammatip tulliata aallartinnerata missaani aatsaat ammaqqissangatinneqarpoq.