Sophie Løhde peqqissuseq spiralilersuisimanerlu pillugit eqqartueqateqariartorluni nunatsinnukartoq
Danmarkimi nunamut namminermut peqqissutsimullu ministeri Sophie Løhde (Venstre), Danmarkip nunattalu peqqinnissaqarfik pillugu suleqatigiilernissaat eqqartoriartorlugu nunatsinnukarluni ullumi aallarpoq.
Peqqissutsimut inunnullu innarluutilinnut naalakkersuisoq, Anna Wangenheim (D), tikeraarnermini ilaatigut ataatsimeeqartigissavaa. Tassani Danmarkimut peqqissariartortarneq nunatsinnilu peqqinnissaqarfimmi unamminartut, eqqartugassat pingaarnertut inissisimassapput.
Nunamut namminermut peqqissutsimullu ministereqarfik ataasinngornermi tusagassiutinut nalunaarummi taama allappoq.
Spiralilersuisimaneq pillugu suliami arnanut eqqugaasunut taarsiiviginninnissaq
Spiralilersuisimaneq pillugu suliami arnat eqqugaasut arlallit, danskit ministeriunerannit naalakkersuisullu siulittaasuanit septemberimi pisortatigoortumik utoqqatserfigineqartut, Sophie Løhdep aamma naapissavai.
Tassani naalagaaffiup saammaasseqatigiinnissamut aningaasaateqarfik pilersinniagaa aqqutigalugu, arnanut eqqugaasunut taarsiiviginninnissamut periusissat tulliuttut, Anna Wangenheim peqatigalugu eqqartussavai.
- Kalaallit niviarsiarartaasa arnartaasalu sumiginnagaasimanerat ajoraluartumik allanngortissinnaanngilarput, akisussaaffilli tigusinnaavarput. Taamaattumik nangaanertaqanngitsumik utoqqatserfigineqarput, immikkullu taarsiivigineqarnissaat naalagaaffimmiit kissaatigineqarpoq, Sophie Løhde tusagassiuutinut nalunaarummi oqarpoq.
Peqqissariarnissaq ajornnnginnerulersinniarneqartoq
Kalaallit napparsimasut siunissami qanoq iliornikkut ajornannginnerusumik Danmarkimut peqqissariarsinnaalernissaat oqaluuserisassani qitiusut ilagaat, nunatsinnilu peqqinnissaqarfimmi sulisunik naammattunik qulakkeerinninnissaq.
Ministeri tikeraarnermini napparsimavimmi unamminartut, pingaartumik kræftertunik sukkortunillu peqqissaanerup tungaatigut unammillernartut paasisaqarfiginiarlugit, Nuummi Dronning Ingridip napparsimavissua ilaatigut pulaassavaa.
Tamatuma saniatigut illoqarfiit pingaarnersaata avataani peqqinnissaqarfik takuniarlugu Atammik Maniitsorlu tikeraassavai.
- Kalaallit Nunaanni peqqinnissaqarfik annertuunik unammilligassaqarpoq, naalakkersuisullu peqqissarnissamut periarfissat ineriartortinneqarnissaat pingaartippaat, tamannalu kalaallit innuttaasuinut iluaqutaassaaq, Sophie Løhde oqarpoq.
Tikeraarneq Danmarkip nunattalu 2026-miit 2029-mut 1,6 milliardit koruuninik aningaasartuuteqarnissamik isumaqatigiissuteqarnerisa kinguninngua pilerpoq. Isumaqatigiissut nunatsinni atugarissaarnerulernissamut ilaatigut pitsanngorsaataassaaq kalaallillu Danmarkimi napparsimmavinni peqqissarsinnaanissaannut tapiissutinik annertunerulersitsissalluni.
