Suliat angerlarsimaffiup avataanut inissiinissamut tunngasut nuna tamakkerlugu 1573-it aalajangiiffigisassaasut

Nunatsinni meeqqat pillugit suliat 1573-it suli aalajangiiffigineqanngillat. Ilaqutariippassuit meeqqatik angerlarsimaffiup avataanut inissinneqassanersut suli paasinngilaat.

Tassa meeqqat nuna tamakkerlugu 11,78 procentit angerlarsimaffiup avataanut inissinniarneqarput.

Kommunini isumaginninnermut immikkoortortaqarfiit suliassarpassuaqartaraluarlutik nunatsinni isumaginninnermik siunnersortit 78-iinnaapput.

Kommune Qeqertalimmi suliaq angerlarsimaffiup avataanut inissiinermut tungasoq, ukiuni qulini naammassiniarsarineqarsimasoq ombudsmandimiit septemberimi isornartorsiorneqarpoq.

Taamaattumik suliat meeqqanik angerlarsimaffiup avataanut inissiiniarnermut tunngasut qanoq amerlatigisut suli aalajangiiffigineqannginnersut paaserusullugu, KNR allagaatinik takunnikkumasimavoq. Suliat ukiut pingasut sinnerlugit pisoqaassusillit suliallu ukiut arfineq-pingasut sinnerlugit pisoqaassusillit qanoq amerlassuseqarneri KNR-imiit paasineqarput.

Kommunini tamani isumaginninnermut siunnersortit qassiuneri, qassillu amigaatigineqarnersut KNR-imiit aamma paasiniarneqarput.

Kujataani ajornerusumik inissisimasoqartoq

Sulianit 1573-iusunit suliat 511-t ukiut arfineq-pingasut sinnerlugit pisoqaassuseqartut, sulianilu taakkunannga 511-ni suliat 397-it Kommune Kujallerminngaanneersuusut, kommuniniit kisitsisit takutippaat.

Tamatuma saniatigut Kommune Kujalliup suliat 175-it ukiuni pingasuni suliarisimavai.

Suliat ukiut pingasut ataallugit pisoqaassusillit Kommuneqarfik Sermersuumi amerlanerpaapput. Tassani suliat 309-t aalajangiiffigineqartussaapput.

- Paasissutissat piumaneqartut maannakkut pissarsiarineqarsinnaanngillat. Ingerlatsivimmi atortorissaarutit ukiuni kingullerni taarserneqarsimaneri tamatumunnga pissutaavoq,  pisortaq Bruno Jensen oqarpoq.

Taamaattumik Kommuneqarfik Sermersuumi suliat ukiut pingasut ukiullu arfineq-pingasut akornanni pisoqaassusillit qanoq amerlatigineri ilisimaneqanngilaq.

Isumaginninnermut siunnersortit nunatsinni ikipput

Isumaginninnermi siunnersortit sulianillu suliaqartut, suliassarpassuarnik suliaqartut, eqqaaneqareersutut 78-iusut KNR-ip allagaatinik takunnissinnaanerata takutippaa. Kommunini tallimaasunit kommunit sisamat KNR-imut akissuteqarput. 
Kommune Qeqertalik KNR-ip apeqqutigisaanut akissuteqanngilaq.

Kommunit amerlanersaasa kisitsisit tunniussimavaat, taakkualu naapertorlugit sullissisut siunnersortillu agguataarnerat ima isikkoqarpoq:

Kommune Kujallermi isumaginninnermut siunnersorti ataaseq sullissisullu arfineq-marluk sulianik 778-inik suliarinnittuupput. Isumaginninnermut siunnersortit sullissisullu 14-it isumaginnittoqarfimmi atorfeqarsinnaatitaasut Kommune Kujallermiit paasissutissiissutigineqarpoq.

Allagaatinik takunnissinnaatitaaneq naapertorlugu nuna tamakkerlugu isumaginninnermi siunnersortit sullissisullu 78-it saniatigut, isumaginninnermi siunnersortinut sullissisunillu atorfiit inuttaqanngitsut 56-iupput.

Kommune Qeqertalimmi isumaginninnermi siunnersortit sullissisullu kommunimi qassiunersut taamatullu atorfillit kommunimi qanoq amerlatiginissaat naatsorsuutigineqarnersoq, Kommune Qeqertalimmut KNR-imit paasiniarneqarpoq.

Kommuni akissuteqarsimanngilaq, borgmesterili Simigaq Heilmann (D) septembarimi apersorneqarami, isumaginninnermut siunnersortit amigaataanerarpai.

Kommuneqarfik Sermersuumi isumaginninninermut siunnersortit qassiunersut KNR-ip suli aamma akissutissarsiffigisimanngilaa, taamaattumik illoqarfiit pingaarnersaata kommuniani naammattunik isumaginninnermi siunnersorteqartoqarnersoq ilisimaneqanngilaq.

Kommunini isumaginninnermut siunnersortit amerlanerusut sulilernissaannut qanoq iliortoqartariaqarnersoq paasiniarlugu, Steven Arnfjord, Kalaallit Nunaanni isumaginnittoqarfimmi ilisimatusarlunilu misissuisarsimasoq KNR-imit apersorneqarnikuuvoq. Taamaattumik allaaserisaq KNR-imit nangitseqarumaarpoq.