Takornariartitsisarneq pillugu inatsit nutaaq savaatillit takornarniartitsisarnerannut kingunipiloqarsinnaasoq
Inatsisartut takornariartitsisarneq pillugu inatsimmut allannguutissat marlunngornermi oqaluuserippatigit tamanna nunatta kujataani takornariartitsisarnermi suliffeqarfinnut mikinerusut sunniuteqarsinnaavoq.
Savaatillit marluk inatsisip kalaallit piginnittussaatitaanerannut najugaqarnissaanullu atatillugu ilaatigut piumasaqaatai takornariartitsinermik ingerlataqartunut akuersissuteqartariaqartunut kingunerluuteqarsinnaanerat ernummatigaat.
Angalatitsinermik aaqqissuussisartut annerusut takornariaqarnermik suliaqaannarsinnaanngikkunik najukkami suliffeqarfiit minnerusut tikeraartussanik aamma annaasaqarataarsinnaapput.
Qassiarsummi Sillisit Hostel og Café Thorhildurimik ingerlatsisup, Elna Elsenip takornariartitsinermik ingerlatsisut anginerit pingaartilluinnarpai.
Taassuma unnuisarfiusaaniittartut 90-it 95 procentillu akornanniittut danskit suliffeqarfiannit Topas Groupimit pigineqartoq Blue Ice Explorer aqqutigisarpaat.
Takornariartoqarluarnerata nalaani savaateqarfimmi 370-init amerlanerusut unnuisarput.
- Taakku suliaqarnertik ingerlatiinnarsinnaanngikkunikku tamanna Qassiarsummi unnuisarfitsinnut sutorniartarfitsinnullu kingunerluuteqangaatsiassaaq, taanna oqarpoq.
Elna Jensen nunanit allanit sullitassanut tunngavimmik pilersitsinissamut nammineq periarfissaqanngilaq. Angalatitsiviit takornariaqarnermillu suliaqartut nunat tamalaat akornanni niuffaffinni naapikkaangata taanna nunaateqarfimmik isumaginnilluni ulapittarpoq.
Taamaammat taassuma suleqatigisartakkat ukiorpassuarni tikeraartussanut angalatitsivinnullu attaveqaammik pilersitsilersimasut pisariaqartilluinnarpai.
- Sullitassanut tunngavilimmik ukiut marluinnaat ingerlaneranni pilersitsinissamut periarfissaqanngilagut. Suliffeqarfiit allat aqqutigalugit suliaqartarpugut, tamanna aamma eqqarsaatigineqassaaq, taanna oqarpoq.
Kingunerluutit nunaqarfinnut anngutissasut
Takornariaqanngippat unnuisarfik isertitassaminik kisimi annaasaqartuunavianngilaq.
Elna Jensenip Qassiarsummi sutorniartarfik aamma eqqaamassutissanik pisiniarfik nunaqarfimmut tikeraartartut aamma pisariaqartikkaat erseqqissaatigaa.
Aviaja Lennert Tasiusami Sermilik Hostelimik ingerlatsisoq aamma taama ernumassuteqarpoq.
Taassuma Blue Ice Explorer aamma suleqatigisarpaa, takornariaqarnermillu suliaqartut anginerusut takornarianik tikisitsinissaat pingaartittarpaa.
Taassuma ingerlatseqatigiiffik najukkami suliffeqarfinnik suleqateqarnikkut suliassanik suliffissanillu ukiut ingerlanerani pilersitseqataasimasoraa.
Tamatuma saniatigut takornariaqarnermi kinguariartoqartoq malugisinnaalereerpaa.
Taassuma nammineq kisitsisaatai naapertorlugit Blue Ice Explorer aqqutigalugu unnuisut 2025-mit 2026-mut 51 procentimik ikipput.
Taassuma Narsarsuarmut silaannakkut angallannermi allannguutit aamma nunatta kujataani takornariaqarnermi unammiligassat nalinginnaasut ilaatigut oqaatigai.
Taamaammat takornariaqarnermik suliaqarnermik ingerlataqarluartoq Blue Ice Explorer malittarisassat nutaat pissutigalugit matusariaqaleratarsinnaanissaa ernumassutigaa.
- Kangerlummut takornariaqaannarnissaa aamma suleqatigiinnitta nunaqarfitsinnut savaateqarfinnullu ukiorpassuarni ineriartortitseqataasimasup attanneqarsinnaanissaa kissaatigaara, Aviaja Lennert oqarpoq.
Najukkami suleqatigiinnerit naliliinermi eqqarsaatigitikkusukkai
Savaatillit marluk takornariaqarnermi malittarisassanik naleqqussaasoqarnissaa isertitallu ilarujussuisa nunatsinniiginnarnissaanik qulakkeerinissaq akerlerinagit erseqqissaatigaat.
Taakkuli aaqqiissutissanik takornarialerinermik suliffeqarfiit angisuut najukkamilu suliffeqarfeeqqat suleqatigiinnerinik pioreersunik eqqarsaatiginnittoqarnissaa kissaatigaat.
Elna Jensenip oqartussat immikkut ittumik akuersissuteqarfigineqarnissamut qinnuteqaatinik naliliinermi takornariaqarnermik suliffeqarfiup najukkami suliffeqarfiit qanoq suleqatigitigisarneraat aamma najukkameersunik qanoq sulisoqartiginersut eqqarsaatigisassagaat ilaatigut siunnersuutigaa.
Ingerlatseqatigiiffik ukiorpassuarni sullitassanik pissarsinissanik, suliffeqarfinnik pilersitsinissamik aamma kalaallit suliffeqarfiinut isertitassanik qulakkeerisimappat tamanna naliliinermut ilaatinneqartariaqartoq taanna isumaqarpoq.
- Takornariartitsisartoq nunatsinni suliffeqarfinnut sullissanik suliffissanillu ukiut ingerlaneranni pilersitsisimappat isertitaqartitsisimappallu, tamanna immikkut akuersissuteqartoqarsinnaaneranut naliliinermut ilaatinneqartariaqarpoq, taanna oqarpoq.
Naalakkersuisut allannguutissatut siunnersuutaat suliffeqarfeqarfinnut 2025-mi januaarip aallaqqaataat sioqqullugu pilersinneqarsimasunut ukiut tallimat tikillugit immikkut ittumik akuersissuteqarnissamut ilaatigut periarfissiissaaq. Siunnersuut suliffeqarfiit kalaallinit pigineqarnissamut nunatsinnilu najugaqartuunissamut piumasaqaatinik ilaatigut naammassinninnissamut piffissaqartitsilissaaq.
Savaateqarfinnulli suliap suliffeqarfinnut takornariaqarnermik ingerlatsinermi kingusinnerusumi inissisimasunut takornariartitsinermillu suliaqartup sullitaanik pisariaqartitsisunut qanoq kinguneqarnissaanut tunngassuteqarpoq.
Elna Jensen politikerit najukkami suliffeqarfiit takornariaqarnermut attuumassuteqareersut takunngitsooratarsinnaagaat isumaqarpoq.
- Inatsit aqqutigalugu kalaallit suliffeqarfii ikiorneqarniarnerat paasisinnaavara. Kisianni uagut takornariaqarnermik suliffeqarfissuarnut sullissisuusugut eqqarsaatigineqanngilagut.
Taanna Inatsisartunut ersarissumik kaammattuuteqarpoq:
- Suliffeqarfinnut taakkununnga sullissisuusugut eqqarsaatigisigut.