Naalakkersuisup kræfti pillugu nalunaarusiaq nikallornartoq qisuariarfigaa: "Akisussaaffipput ukiuni amerlavallaani sumiginnarsimavarput"
- Tupaallannanngilaq, kisianni soorunami nuannarinngilluinnarpara.
Anna Wangenheim(D) Kræftens Bekæmpelsep nalunaarusiaa nutaaq pillugu KNR-imit aperineqarami taama oqarpoq.
Nunatsinni kræftimik nappaateqartut ukiumut inuit 250-it missaanniittut paasineqartarput. Naalli nunatsinni kræfteqalernissamut aarlerinartoqannginnerugaluartoq nunatsinni kræftimik toqquteqartartut nunanut allanut sanilliullugit amerlanerupput. Kræftens Bekæmpelsemit nalunaarusiap nutaap tamanna takutippaa.
Kræftimik nappaateqarnerup paasiaarneqarnerunissaa pillugu suliniutit siorna aallaartinneqareerput. Qinnguartaatinik CT-scannerinillu nunatsinni nutaanik ilaatigut pisisoqarpoq.
Napparsimanerup nalaani misissuisarnissamut taassuma saniatigut aningaasaliisoqarpoq, soorlu aamma suliamik paasisimasalinnik nuna tamakkerlugu sulisorineqartut amerlineqarnissaat suliniutigineqartoq, Anna Wangenheim oqarpoq.
- Sinerissami angalasartussanut misissuiartortartussanik aningaasaliivugut, nappaammit toqusartut sapinngisamik ikinnerpaaffimminiitinneqarnissaat qulakkeerniassagatsigu. Kræftip pilertornerusumik paasineqarlunilu iliuuseqarfigineqarnissaa pillugu.
Naalli kræftimut katsorsaanissamut aningaasaliisoqareeraluartoq, allannguinissamut tamanna naammanngilaq, Anna Wangenheim oqarpoq:
- Peqqinnissaqarfimmi tamakkiisumik aningaasaliisoqarnerunissaa pisariaqartinneqarpoq. Akisussaaffipput ukiuni amerlavallaani sumiginnarsimavarput, tamannalu allanngortinniarparput, taanna oqarpoq, nangillunilu:
- Tamanna pissutigalugu Danmarkimi qanimut suleqatigilluarfiginerpaasatsinnut saaffiginnittariaqarsimavugut, peqqinnissarlu pillugu isumaqatigiissutikkut nutaakkut napparsimasorsiornerup katsorsaanerullu suliamik ilisimasaqarnermik tunngaveqarnissaanut ikorfartuutaasussamik suliamut pisariaqartumik piginnaasaqalernissarput qularnaassavarput.
Pinaveersaartitsineq inatsillu sukannernerusoq ukkatarineqarniartut
Anna Wangenheimilu tamanna pillugu Facebookikkut takisuumik sapaatit akunnerata siuliani allagaqarpoq.
Kræftimik nappaateqarnerup sukkanerusumik paasineqartalerlunilu katsorsarneqartalernissaa pillugu inatsisissatut siunnersuut Inatsisartuni sisamanngornermi oqaluuserineqassasoq tassani allaaseraa.
Immikkut ilisimasalinnit piaarnerusumik ikiorserneqarnissaq anguniarlugu Danmarkimi regionit amerlanerusut suleqatigineqassasut ilaatigut oqaatigineqarpoq.
Anna Wangenheim siunnersuummut sisamanngornermi oqaluuserineqartumut ilassutitut Facebookikkut kingusinnerusukkut unnukkut allagaqaqqippoq, anguniagassaq alla tassani allaaseralugu. Tassa, pinaveersaartitsinerup pingaarnerutinneqarnerunissaa. Pujortartarneq pingaarnertut tassani allaaserineqarpoq.
Facebookikkut ima ilaatigut allaaserisaqarpoq:
- Nunatsinni puakkut kræfteqarneq suli kræftit assigiinngitsut akornanni atugaanerpaavoq, pujortartarnerlu tassunga aarlerinartorsiortitsisuni pingaarnerpaavoq. Tamatuma saniatigut nunatsinni inersimasut affaat sinnerlugit pujortartarput, taanna allappoq, nangillunilu:
- 2024-mi nuna tamakkerlugu atuarfinni meeqqat peqqissusaannik misissuinermi paasinarsivoq, 9.–10. klassini atuartut pingasuugaangata ataaseq missiliorlugu tupamik pujortartartoq, aammalu affaat sinnerlugit qaammat kingulleq nikotinimik akulinnik minnerpaamik ataatsimik atuisimasut.
Pinaveersaartitsinermi suliaq maannamut naleqqiullugu qanoq annertusarneqarsinnaanersoq Anna Wangenheim KNR-imit aperineqarpoq, imatullu akivoq:
- Inuit amerlasuut puakkut kræfteqalersarnerat pillugu inatsisitigut iliuuseqarfigisariaqarput. Nappaat taama ilungersunartigisoq pinaveersaartitsineq pingaartilluinnartariaqarparput, nunatsinni kræfteqalersarnerup sapinngisamik annikillisarneqarnissaa anguniassagatsigu.
Sukkasuumik sulisoqartoq isumaqarpit?
- Naagga. Kisianni pisinnaasarput tamaat sulivugut. Suliamut paasisimasaqartunik naammattunik sulisoqarnissaa, atortunillu pisariaqartitanik naammattunik peqqinnissaqarfimmi peqartoqarnissaa kissaatigaara. Ukiorpassuarni taamaassimanngilaq.
Pinaveersaartitsinermut tunngatillugu inatsisitigut siunissami iliuuseqartoqarsinnaanissaa Anna Wangenheimip taamaasilluni mattutinngilaa. Kræfteqalersitsisinnaasut pujortartarneq, imigassartorneq aalavallaannginnerlu oqaluuserisariaqarivut taanna isumaqarpoq.