Stine Egede aamma Jens Erik Kirkegaard naalakkersuisussatut toqqarneqartut

Naalakkersuisut nutaat ataasinngornermi saqqummiunneqarput. Stine Egede (IA) aamma Jens-Erik Kirkegaard (D) naalakkersuisuni ilaasortaalerput.
Assi © : Arthur Cammelbeeck/Ritzau Scanpix
Allattoq Emil Weis
novembarip 16-at 2026 11:10

Naalakkersuisuni sapaatip akunnerani pisoqangaatsiareersoq Naalakkersuisunut ilaasortat nutaat ataasinngornermi saqqummiunneqarput.

Jens-Frederik Nielsenip (D) Inuit Ataqatigiinnit Stine Egede aamma Demokraatinit, Jens-Erik Kirkegaard naalakkersuisussatut inassutigai.

Stine Egede isumaginninnermut, suliffeqarnermut, ilaqutariinnut nunamut imminermut naalakkersuisuulissaaq. Jens-Erik Kirkegaardip Jørgen Rosbachip avatangiisinut, pinngortitamut, nukissiuutinut ilisimatusarnermullu naalakkersuisutut akisussaaffii tiguai.

Jørgen Rosbach tassunga taarsiullugu Nivi Olsenip (D) tunuannginnermini naalakkersuisuuffigisimasaani ilinniartitaanermut, kultureqarnermut, timersornermut ilageeqarnermullu naalakkersuisuulissaaq.

Demokraatinit, Jens-Erik Kirkegaardip assinga toqqorsivimmeersoq. Assi © : KNR

Partiit naalakkersuisoqatigiittut Demokraatit Inuit Ataqatigiillu naalakkersuisunut ilaasortassat taasissutigaat. Illuatungiliuttut partiiat Naleraq naalakkersuisussatut innersuunneqartunut taasinngilaq.

Siumulli naalakkersuisussatut innersuunneqarnerannut akerliunianngilaq.

- Naak naalakkersuisunut ilaasortaanngikkaluarluta taperserpatsigit, akuersillutalu taasissaagut, Erik Jensen (S) oqarpoq.

Naallu Atassut naalakkersuisuni pisoqarneranik aallarniigaluartoq, Atassutip siulittaasuata naalakkersuisut nutaat akuersissutiginiaraat oqaatigaa.

- Naalakkersuisunik uppitsitsinissamik pilersaaruteqanngilagut, Atassutip siulittaasua, Aqqalu C. Jerimiassen oqarpoq.

Atassut naalakkersuisoqatigiinnit tunuarniarluni sapaatip akunnerata siuliani ataasinngornermi oqaaseqarnerata kingunerisaanik Maritha Broberg (A) isumaginninnermut, suliffeqarnermut, ilaqutariinnut nunamullu imminermut naalakkersuisuujunnaarmat naalakkersuisuni nikittoqarpoq.

Nivi Olsenip ilinniartitaanermut, kultureqarnermut, timersornermut ilageeqarnermullu naalakkersuisutut tunuarluni marlunngornermi aamma oqaatigaa.

Inuit Ataqatigiinnit, Stine Egedep assinga toqqorsivimmeersoq. Assi © : KNR/Jørgen Semionsen

Siumumeersoq Jens-Erik Kirkegaard Inatsisartunut 2013-imi qinigaavoq, taamanilu inuussutissarsiornermut, aatsitassaqarnermut suliffeqarnermullu naalakkersuisunngorluni.

Inuit Ataqatigiinneersoq, Stine Egede Kommune Kujallermi 2021-mit 2025-mut borgmesteriuvoq.