Kangaatsiami atuarfik: Suliat nakuusernermut kannguttaatsuliornermullu tunngasut politiinit ima suliarineqartartut

Politiit siunnersuinissaminnut piareersimajuaannarput. Katrin Dietzel, suliat innarliinermut tunngasut immikkoortortaqarfianni politikommissæriusoq taama erseqqissaavoq.

Allattoq Markus Valentin

maajip 17-at 2026 09:06

Nutserisoq Medea Olsen

- Ernummateqaraanni paasissutissaateqaraanniluunniit politiinut saaffiginnittoqarsinnaajuarpoq. Uagut siunersiueqatigiffittut ilitsersuisussatullu inissisimasuussaagut.

Taama oqaluttuarpoq Katrin Dietzel, Kalaallit Nunaanni Politiit suliat innarliinermut tunngasut immikkoortortaqarfianni Nuummi politikommissæriusoq.

KNR Kangaatsiami atuarfik pillugu, angajoqqaat eqimattat qitornaminnut killissamik qaangiinerit, nakuusernerit kannguttaatsuliornerillu nalunaarutigereeraallu, saqqummiusseqattaarpoq.

KNR-ip Kalaallit Nunaanni Politiit tamatumunnga atatillugu saaffigai, taakkuali suliat aalajangersimasut oqaaseqarfigisinnaanngilaat.

Katrin Dietzelilli politiit suliat taamaattut nalinginnaasumik qanoq suliarisarneraat oqaluttuarisinnaavaa, angajoqqaatullu qanigisatulluunniit suut eqqumaffigineqartariaqarnersut.

KNR ukkatarinnittoq: Kangaatsiap Atuarfia Iparartarfik

KNR-ip meeqqanut killissamik qaangiisumik pissusilersuutit, kinguaassiuutitigut naapertuilluannginnerit nakuusernerillu pillugit oqaluttuat arlallit piffissami tulliuttumi saqqummiutissavai.

Oqaluttuat tamarmik Kangaatsiap Atuarfiani Iparartarfimmi angajoqqaanit meeqqaniillu oqaluttuarineqarput.

Illit imaluunniit nalunngisavit arlaat meeqqat atuarfianni assingusumik nalaataqarsimaguit redaktion@knr.gl-imut attaveqarnissannut tikilluaqqusaavutit.

Kisimiittutut misigisimaguit oqaloqateqarnissannillu pisariaqartitsiguit Tusaanngamut attaveqarsinnaajuaannarputit.

Oqarasuaatikkut siunnersuisarneq tassaavoq kinaassutsimik isertuussilluni illit siunnersuisullu akornassinni inuttut oqaloqatigiinneq, tassani oqaloqatigiinnerup imaa illit aalajangissavat.

Meeqqat, inuusuttut inersimasullu tamarmik oqaloqateqarnissamik allaqateqarnissamilluunniit pisariaqartitsisut Tusaannga attavigisinnaavaat. Tusaanngamut attaveqarneq kinaassutsimik isertuussisinnaaffiuutigaluni akeqanngilaq – aamma Tusassit imaqanngikkaluarpalluunniit sianersinnaavutit.

Oqarasuaat: 80 11 80

SMS: 1899

Suliat ima pisarput

Assersuutigalugu nakuusertoqarneranik politiit nalunaarfigineqaraangamik, nalunaarutiginnittoq killisiorniarlugu aggersaqqaartarpaat.

Taava inuit suliamut attuumassuteqarsorisatik aamma apersorneqassanersut aalajangertarpaat.

Politiit paasissutissat tamakkua pissarsiarineqareerpata, suliaq apeqqutaalluni, pisoqarfimmi misissuisinnaapput, ajoqusernerit uppernarsarsinnaavaat, digitalimik paasissutissanik katersuisinnaapput attaveqaqatigiinnermullu tunngasunik.

Atuarfeqarfinnut tunngatillugu allaanerusumik suleriaaseqartoqannginnera Katrin Dietzelip oqaluttaraa. Aammattaaq isumaginnittoqarfimmi oqartussaasunik ataavartumik suleqateqartarput.

- Assersuutigalugu nakuusertoqarnissaa qinngasaarisoqarnissaalu pinaveersaartikkumallugu, atuarfimmi aqutsisut aaqqissuussinikkut suleqatigisarpavut, Katrin Dietzel oqarpoq.

Sulialli tamarmik tamatigut toqqaannartumik nakuusernermut nalunaarutiginniffiuneq ajorput. Nalunaarutiginnittup politiinut nalunaarutiginninnissani ilaannikkut nalornissutigisarpaa.

Sulisutut - soorlu ilinniartitsisutut - siunersiueqateqarnissamik pisariaqartitsigaanni, suliat innarliinermut tunngasut immikkoortortaqarfiata oqarasuaataannut sianertoqarsinnaavoq, Katrin Dietzel oqaluttuarpoq.

- Sammisat ataatsimut isigalugit aamma oqaloqatigiissutigineqarsinnaapput; soorlu atuarfiup aneertarfiani qinngasaarisarneq, Katrin Dietzel oqarpoq.

- Taava tamanna oqaloqatigiissutigisinnaavarput immaqalu atuarfimmi pineqartumi iliuuseqarfigisinnaallugu. Pisariaqartinneqassappat ornigulluta saqqummiisinnaavugut assigisaannilluunniit.

Innuttaasutut ernumassuteqaraanni paasissutissanilluunniit peqaraanni politiinut saaffiginnittoqarsinnaajuaannartoq taassumap erseqqissarpaa.

- Innuttaasutut inersimasutullu akisussaaffeqarlutalu takusavut tusaasavullu naapertorlugit iliuuseqartariaqarpugut.

Suliani iliuuseqartoqartoq

Kangaatsiami angajoqqaat KNR-imut Kalaallit Nunaanni Politiinit sumiginnarneqartutut misigisimanertik politiillu iliuuseqarnerunissaat utaqqigitsik oqaluttuaraat.

Politiit suliamik misissuigaangamik suliaq qanoq ingerlanersoq oqaatigisinnaanngilaat, imaluunniit unnerluutiginninnissamut sunik uppernarsaatissaqarnerlutik.

- Misissuisarpugut, nalilersuisarpugut, paasiniaasarpugut, naammassinnittarpugut tamatumalu kingorna unnerluussisussaatitaasut inatsisitigut naliliisarput.

- Isornartorsiuisoqaraangalli soorunami pimooruttariaqarparput piaartumik iliuuseqartoqarsimannginnersoq misissorlugu. Sulialli tamaasa pimoorulluinnarlugit suliarisarpagut; suliat inunnut navianartorsiortitsisinnaasut aamma suliat meeqqanut inuusuttunullu attuumassuteqartut, Katrin Dietzel oqarpoq.

Angajoqqaat ilaquttalluunniit meeqqamik ilisarisimasamilluunniit arlaannik ajortumik pineqarsimanerannik pasitsaassisut sunik ernummateqakkajuppat?

- Eqqarsaataat upperineqarnissamut pimoorunneqarnissamullu tunngasarput.

- Suliani inunnut navianartorsiortitsinermut tunngasuni, pinerlineqartut upperineqartutut misiginissaata pingaaruteqarnera misissuinerit takutippaat.

- Politiit inatsisinik unioqqutitsisoqarsimanera uppernarsarsinnaanngikkaluarpassulluunniit, tamanna pisoqarsimannginneranik isumaqanngitsoq, Katrin Dietzelip erseqqissarpaa

- Tamanna pisoqarsimannginneranik isumaqanngilaq.

Sulianili politiit uppernarsarsinnaanngisaanni, pinerlineqartoq qanoq pisoqarsimaneranik oqaluttuaraluarpalluunniit, politiit unnerluussisinnaanngillat.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.