Hesti atorlugu katsorsaaneq misiligutigineqartoq iluatsilluartoq
Nuummi meeqqat inuusuttullu atuarfimmi inuiaqatigiinnilu ilungersunartumik inissisimasut misiliummik suliniummut hiistinik suleqateqarlutik peqataapput.
Tamannalu inuttut atugarissaarnikkut attaveqarniarnikkullu ersarissumik pitsanngoriartorpoq.
Kommuneqarfik Sermersooq tusagassiuutinut nalunaarummi taama allappoq.
Nuummi hiistertartut Viska Horses suleqatigalugu, hiistinik suleqateqarneq meeqqanut inuusuttunullu eqqissinermik nassaarniarnermut, tatiginninnermik pilersitsinermut akisussaaffimmillu tigusinermut iluaqutaasoq nalunaarummi allaqqavoq.
Hiistilerinerup meeqqat inuusuttullu ineriartornissaannut ajornannginnerulertarpoq.
Ilaquttallu nersutaasivimmeeqatigisarneri aamma angerlarsimaffimmi ataqatigiinnerulersitsisarpoq.
Politikkikkut tapersersorneqartoq
Misiliummik suliniut Kommuneqarfik Sermersuumi Meeqqat, Ilaqutariit Ilinniartitaanerlu pillugit ataatsimiititaliami siulittaasup Poul Petersenip tapersersorpaa:
- Kommunitut pingaaruteqarluinnarpoq meeqqat inuusuttullu inuuniarnikkut atugarissaarnerat siusissukkut nukittorsarniarlugu siunnerfilinnik suliniuteqarnissarput, Poul Petersen nalunaarummi oqarpoq.
Misiliummillu suliniutip meeqqat ilaannut eqqissisimanerulernermik ammanerulernermik inuiaqatigiinnullu peqataanerulernermik kinguneqartoq angajoqqaanit arlalinnit malugineqartoq.
Tusagassiuutinut nalunaarummi allaqqavoq.
