Sakkutuut USA-meersut, toqutsisoqarsimaneranik pasittaassaqartoqareersorlu, Okinawami imigassartoqqusaajunnaartut
Sakkutuut Amerikamiut qeqertami Okinawami, sakkutuup arnamik toqutsisimasutut pasineqarnera pissutigalugu, pingasunngornermiit akunnerni 48-ni imigassartoqqusaajunnaarput.
Ullunilu 30-ni unnukkut aneqqusaajunnaarlutik. Tamanna Amerikamiut Okinawami qullersaat taama paasissutissiivoq.
Sakkutooq Amerikaminngaanneersoq arnamik 39-nik ukiulimmik illoqarfimmi Nahami toqutsisimasutut pasineqarluni sapaammi tigusarineqarpoq. Aningaasivianillu tillissimasutut aamma pasineqarluni.
Sumiiffimmi tusagassiuutit arnaq ipitinneqarluni toqunneqarsimanera nalunaarutigaat. Angulli tusagassiuutit tusagassiinerat naapertorlugu pisuujumasimanngilaq.
Tamanna pisimasup Amerikamiut sakkutuui tusindilikkaat qeqertamiittut pillugit oqallinneq sakkortuseqqippaa. Amerikamiut inatsisinik siornatigut unioqqutitsisarsimanerat sumiiffimmi ajornartorsiutigineqartarsimavoq.
Imigassamik aalakoornartunik inerteqquteqarneq eqqarsaatiginninnissarlu
Benjamin T. Watson Okinawami ataqatigiissaarisoq III Marine Expeditionary Forcemullu generali qullersaq, ”sakkutooqarfimmi avataanilu imigassartoqqusiunnaarput”. Tamanna pingasunngornermi atuutilerpoq.
Akunnerit 48-t ”suliaqarunnaarallarnermik” taaneqarpoq. Qullersallu piffissap taassuma iluani ”pitsaasumik sulinissaannut malittarisassanillu malinninnissamik Okinawamilu inuiaqataasutut akisussaaffeqarnermik sungiusartinneqassapput”.
Qullersaq ulluni 30-ni aamma ”pisimasut pillugit eqqarsaatiginneqqusivoq”, taannalu tallimanngornermiit aallartissaaq.
- Piffissap uuma ingerlanerani, nal. unnuap qeqqaniit anisoqarsinnaassanngilaq, tassa imaappoq: unnuap qeqqaniit ullaakkut tallimat tungaannut inigisamiiginnartoqassaaq sakkutooqarfiullu avataani angerlarsimaffimmiiginnartoqassalluni.
USA Japanimi katillugit 54.000-it missaannik sakkutooqarpoq amerlanerpaartaallu Okinawamiipput.
Okinawami guvernørip, ernumassutini pillugit, Japanimi ministeriuneq pingasunngornermi ataatsimeeqatigissavaa.
RITZAU/AFP
