Imigassamik matusineq ilisimatusartup arlalinnik iluaqutissartaqarneraraa
Steven Arnfjordip Kommune Kujallermi imigassamik tuniniaanermik sassaalliinermillu matusineq “politikkikkut iliuuseqarusussusermik takutitsinertut” taavaa.
Taanna Ilisimatusarfimmi Issittumi Atugarissaarneq pillugu ilisimatuujuvoq, imigassamillu inerteqquteqarnissamut pissutissaqarluarsinnaanera oqaluttuaraa.
- Tuniniaasinnaajunnaarsitsineq politikerit ingerlaannartumik iliuuseqarnissamut sakkussaata ilagaat. Tamanna pisunik malinnaanermik iliusseqarsinnaassusermillu takutitsivoq, Steven Arnfjord oqarpoq.
Kommune Kujalliup imigassamut inerteqqut tallimanngornermi unnukkut atuutsilerpaa, borgmester Malene Vahlillu (D) inerteqqummik atuutsitsiunnaarnissamut maannangaaq pilersaaruteqartoqannginnera KNR-imut oqaluttuaraa.
- Imigassaarniarfiit qisunnik assiaqusersorneqarsimanerat aqaguani takusinnaavarput, Steven Arnfjord, Qaqortumi nammineq najugaqartoq oqarpoq:
- Atuarfinnut sunniuteqarnera, sapaatip akunnerata aallartinnera eqqissisimanarnerulaarneratigut, qularnanngitsumik takuneqarsinnaassaaq.
Imaanngilarli tamanna ajornartorsiutinut aaqqiissutaassasoq.
- Imigassamik inerteqquteqarallarneq ajornartorsiutaasunut aaqqiissutaanavianngilaq. Imigassamik tuniniaaneq inerteqqutaajunnaarpat ajornartorsiutaasut arriitsunnguamik siornatigutut ileqqissapput. Inerteqquteqarnerli ingerlaannaq sunniuteqarpoq taavalu politikkikkut iliuuseqarusussusermik takutitsilluni, taanna oqarpoq.
Aalakoorniutigalugu imertoqartarnera ajornartorsiutaasoq
Steven Arnfjordip Kalaallit Nunaanni imigassartalimmik imertariaaseq, ajornartorsiutiginerpaasat tallimat akornanniittutut aaqqiiffigineqarusukkaluartutut taavaa.
- Piorsarsimassutsitsigut aalakoorniutigalugu imertarpugut. Imaappoq, naak Danmarkimut sanilliulluta tamaani agguaqatigiissillugu aalakoornartutalimmik imertaraluarluta, piffissap sivikitsuaqqap ingerlanerani aalakoornartutalimmik imertarpugut, Steven Arnfjord oqarpoq nangillunilu:
- Imeraangatta toqunartumik sunnerneqartarpugut tassanngaanniillu ajortoqartarpoq. Tamanna Kalaallit Nunaanni pinerlunnerni takuneqarsinnaasarpoq, tassalu aalakoornerup nalaani pinerlunnerukkajuttartut.
Taamaattumik ingerlaannaq inerteqqutaalernera paasinarsinnaavoq, ilisimatooq oqarpoq.
- Ilinniartitsisut akissarsiffiup kingorna ataasinngornikkut ullaakkut sulisut politiilluunniit tallimanngornikkut arfininngornikkullu sillimasut, imigassap matuneqarnera iluarissagunarpaat, Steven Arnfjord oqarpoq.
Imigassaq aalakoornartulik nunatsinnut 1995-imiilli eqqunneqartartoq tunisassiarineqartartorlu annikilleriarujussuarsimavoq. 2024-mili 2025-p tungaanut annertuserialaarpoq, tamanna Naatsorsueqqissaartarfiup kisitsisaataani takuneqarsinnaavoq.
- Inuiaqatigiit ilaannaani tamaniunngitsorli akuersaarneqarnera ajornartorsiutaavoq, taamaammallu ajoraluartumik aamma iminnginnerulerneq erseqqissumik takuneqarsinnaanngilaq naatsorsuinerni pitsaanngitsuni, tassa imigassamik atuinerujussuaq pissutigalugu pilersartuni, Steven Arnfjord oqarpoq.
Aaqqiissutissat allat
Naalakkersuisut imigassaq pillugu nutaamik politikkiliornissamut siorna 18-inik inassuteqaateqarput.
Naak taakku aamma annertoorujussuarmik tusagassiuutitigoorlutillu Peqqissutsimut Ilisimatusarfik Nunarsuarmilu Peqqinnissamut Suliniaqatigiiffik peqatigalugit suliarineqarsimagaluartut, politikkikkut pisoqangaarsimanngilaq.
- Nuna tamakkerlugu imigassaq pillugu politikkiliornissamut suliniuteqarluartoqarsimagaluartoq, kommunit ajuusaarutigisaannik suli tamakkiisumik atuutilersimanngilaq, Steven Arnfjord oqarpoq.
Imigassamik ajornartorsiutit inuiaqatigiinni qaangerneqassappata suut aaqqiissutissatut pitsaanerunersut, taassuma aamma eqqarsaatersuuteqarfigai:
- Inuit imigassartornatik allamik sammisassaqarsinnaanissaat pingaaruteqarpoq. Suliffeqartoqartariaqarpoq. Sunngiffimmi assigiinngitsunik sammisassaqartoqartariaqarpoq, inuit peqqissumik ineriartorfiusumillu sunngiffimminni naapeqatigiissinnaanissaat pingaaruteqarluni, Steven Arnfjord oqarpoq.
Ajornartorsiut qanoq ililluni qaangerneqarsinnaanersoq Malene Vahl Rasmussenip apeqqutigissappagu, Steven Arnfjordip tamanna Malene Vahl Rasmussenimut aamma siunnersuutigerusuppaa.
Ajornartorsiulli taassuma borgmesteriunerata nalaani aaqqinneqarsinnaanngitsoq Arnfjordip aamma miserratiginngilaa:
- Imigassaq pillugu ajornartorsiut piffissaq ungasinnerusoq eqqarsaatigalugu aaqqiivigineqassappat tamakku aaqqiissutaasinnaapput, Steven Arnfjord oqarpoq.
Sumiiffimmi iliuuseqarneq
Nanortalimmi angummik 37-nik ukiulimmik sapaatit akunnerata siuliani toqutsisoqarnera ilaatigut pissutaalluni Kommune Kujallermi imigassamik nioqquteqarneq sassaalliuteqarnerlu matuneqarallartut, Malene Vahl Rasmussenip KNR-imut oqaatigereerpaa.
- Piffissaq kingulleq ilungersunartunik pisoqaqattaarnerata kingorna, sapaatip akunnera kingulleq naalluinnartoq taakkua Nanortalimmi pisut aallaavigalugit innuttaasut noqqaassuteqarnerat aamma uanga isumaqatigigakkit, kommunalbestyrelsimi ilaasortakka tusarniarsimavakka, Malene Vahl Rasmussen KNR-imut taamani oqarpoq.
Ajornartorsiut Nanortalimmiissimappat erngertumik iliuuseqarnissaq paasiuminartuusoq Steven Arnfjord isumaqarpoq:
- Taama pisoqartillugu sumiiffimmi inuiaqatigiit peqatigalugit iliuuseqarnissamut periarfissarpassuaqarpoq. Oqaluffiit qanga atorneqartarput, taassumallu siuliani angakkut inunnik katersuutsitsisarput, Steven Arnfjord oqarpoq.
- Tassa ullumikkut aaqqinniagassat pingaarnerit ilaat – qanoq ililluni tamanna ataatsimoorullugu aaqqiivigineqarsinnaava. Sumiiffimmi qanoq ililluni ataatsimoornerusoqarsinnaava.
Ajornartorsiutip tunngavippiaa aaqqiiviginiaraanni imigassamik nioqquteqartarnerup sassaalliuteqartarnerullu matuneqarallarnissaa aaqqiissutaasinnaasoq Steven Arnfjord isumaqarpoq. Inuiaqatigiilli imigassartortarnerannut pissutaasinnaasut aamma qiviarneqartariaqarput:
- Ajornartorsiutit qaangerneqassappata arlaatigut isumassuisoqarlunilu aaqqiissutaasinnaasunut ammanissaq pisariaqartinneqarpoq.
