Nanortalimmi toqutsineq pillugu: Toqusunik misissuisartut pinerluttoqarsimaneranillu misissuisartut sapaatip akunnerata ingerlanerani tikissapput
Arnaq 43-nik ukiulik 37-nik ukiulimmut Nanortalimmi toqutsisoqarsimaneranut atatillugu sassartinneqaqqippoq. Tigummigallarneqarlunilu.
Taamaalillutik inuit sisamat suliamut tunngatillugu maanna tigummigallarneqarput, Kalaallit Nunaanni Politiit tusagassiuutinut nalunaarummi paasissutissiipput.
Toqusunik misissuisartut pinerluttoqarsimaneranillu misissuisartut politiit misissuinerannik ikiuukkiartorlutik sapaatip akunnerata ingerlanerani tikissapput.
Oqaaseqaqqissanngitsut
37-nik ukiullip sapaatip akunnerata siuliani sisamanngornermi nassaarineqarfia suli assersorneqarpoq, politiit tusagassiuutinut nalunaarummi allapput. Politiit tassunga atatillugu assersuineq akornutaasimammat innuttaasut paasinninnerannut qujapput.
Politiit qanoq pisoqarsimaneranut pasineqartunulluunniit sisamanut tunngatillugu suliaq oqaaseqarfigeqqissinnaanngilaat, taama allapput.
Politiit innuttaasut suliamut attuumassuteqarsinnaasunik tusagaqarsimagunik takusaqarsimagunilluunniit politiinut saaffiginneqquaat.
