Raajaqannginnerulernera tunisassiorfimmut sulisuinullu sakkortuumik sunniuteqartoq

Nunatta imartaani raajat raajartassiissutillu ikileriarujussuarput. 

Tunisassiorfiit tamanna aamma malugaat. 

Raajat Royal Greenlandip Sisimiuni tunisassiorfiani raajat ikippallaarmata, sulisut 50-it suliunnaarsinneqartariaqarsimapput. 

- Siornatigornit taama amerlatigisunik sulisoqartariaaruppugut. Aamma raajat raajartassiissutillu ukiup ingerlanerani ikilisimanerat malugaarput. 

Tunisassiorfiup pisortaa Hans Lars Olsen oqarpoq. 

Royal Greenlandip Sisimiuni tunisassiorfiani pisortap Hans Lars Olsenip raajarniarnerup qanittukkut pitsaanerulernissaa taamaalillunilu sulisunut sunniuteqarluarnissaa neriuutigaa.  Assi © : Tôrtia Reimer-Johansen / KNR

Sulisukinnerulerneq

Tunisassiorfiup pisortaata tunisassiorfimmi sapaatip akunneranut ulluni arfinilinni ullormut akunnerit 17-it tunisassiortoqartarsimagaluartoq oqaatigaa, maannali sapaatip akunneranut ulluni sisamani ullormut akunnerit 12-it sulisoqartalernerarlugu. 

Sulinerlu ullormut akunnernik qulinik suli sivikillineqarpoq. 

Ilaqutariinnut tunisassiorfik aqqutigalugu aalisarnermik inuussuteqartunut nalorninartorsiortitsivoq. Sulisutsialaat soraaginnannginnissaat pinngitsoortikkuminaassimavoq.

- Immikkoortortaqarfiit tamarmik procentinngorlugu assigiikannermik eqqugaapput. Immikkoortortani sunnerneqartoq ataasiinnaanngilaq, Hans Lars Olsen oqarpoq.

Hans Lars Olsenip sulisut siorna 137-usimanerat oqaluttuaraa. Ullumikkut sulisut 90-it 95-illu missaanniipput. 

- Sulisorpassuarnik soraarsitsinata sulisugut ikiliartorterusaarpagut.

- Sulisunik maanaannaq soraartoqaraangat nutaanik sulilersitsinngiinnartarpugut.

Royal Greenlandip Sisimiuni tunisassiorfiani pisortap sulisut kangiamiut arfinillit angerlartiinnarneqarsimanerat tamatuma saniatigut ilisimatitsissutigaa.

Pissutsit pitsaanerulernissaat neriuutigigaa

Nafo - Atlantikup avannaani aalisarnermut suliniaqatigiiffiup piujuartitsilluni raajarniarnermut aappaagumut inassuteqaatini qanittukkut saqqummiuppai. 

Raajartassiissutissat 5.000 tonsinik Kitaani amerlineqarnissaat inassutigaat. Siornatut amerlatigisunik.

Raajartassiissutit piffissap ingerlanerani amerlineqartarlutillu ikilineqartarnerat qaqutiguunngilaq.

Siorna ukioq mannalu saarullinniarneq ingerlalluaqaaq. Saarulliit raajartortarmata tamanna aamma sunniuteqarpoq.

Tunisassiorfimmili pisortap pissutsit pitsaanerulernissaat neriuutigaa.

- Soorunami sulisut aalisartullu eqqarsaatigalugit, pissutsit ajornerulinnginnissaat neriuutigaara.