Politiit inuit imigassamik aalakoornartulimmik unioqqutitsillutik tuniniaasut nalunaarutigineqartaqqugaat
Kalaallit Nunaanni Politiit imigassaq pillugu inatsimmik unioqqutitsinerit pimoorullugit KNR-imut oqaatigaat.
Kommune Kujallermi inerteqquteqalernerup, tallimanngormat atuutilersup, saniatigut taama nalunaaruteqarput.
-Inerteqquteqarnerup nalaani tuniniaasunik sassaallertunilluunniit ilisimasaqaraanni politiinut nalunaaruteqaqqusivugut.
Politiit pisortaata tullia Jan Geisler KNR-imut allakkatigut taama akissuteqarpoq.
Inuit tuniniaasarnerat aamma pineqartoq
Politiit pisortaata tulliata inuit imigassamik aalakoornartulimmik tuniniaaqqusaanngitsut aamma erseqqissaatigaa.
Tuniniaasunik ilisimasaqaraanni politiinut nalunaaruteqaqqusipput.
Inerteqqut atuutilerniariartoq inuit Facebookikkut tuniniaallutik aallartipput. Imigassap saniatigut aamma immiornissamut qapuaqqanik tuniniaasoqarpoq.
- Immiornerup inerteqqutaanera aamma erseqqissaatigaarput, Jan Geisler allappoq.
Inunnik navianartorsiortitsilluni pinerluuteqarnerit
Sumiiffinni assigiinngitsuni inerteqquteqartoqaraangat inunnik navianartorsiortitsisunik pinerluuteqartoqannginnerusimavoq.
Tamanna politiit pisortaata tulliata oqaatigaa.
- Imigassap aalakoornartullip inerteqqutaasarnerani inunnik navianartorsiortitsilluni pinerluuteqarnerit ikilisarnerat paasinikuuarput.
