Raajat pillugit siunnersuisoqatigiit nutaat: Pisassiissutit amerlineqalaassasut

Kitaani piujuartitsilluni raajarniarnermut aappaagumut inassuteqaatit nutaat amerlineqalaaraluarlutik suli appasipput.

Allattoq Markus Valentin

oktobarip 07-at 2026 07:41

Nutserisoq Medea Olsen

NAFO, Atlantikup Avannaani Aalisarnermut Suliniaqatigiiffik, raajarniarnermut tunngatillugu nutaanik maanna innersuussuteqarpoq.

Taakkua pisassiissutit 2025-mi inassutigineqartumut naleqqussarlugit amerlineqarnissaat innersuussutiminni siunnersuutigaat.

Pinngortitaleriffik tusagassiuutinut taama nalunaaruteqarpoq

- Pisassiissutissatut innersuussutigineqartut, raajat amerliartorsimanerat raajallu pisarineqartartut amerlanerulersimanerat tunngavigalugit naatsorsuinernit aalajangersagaapput.

- Naatsorsuinermi aamma raajat saarullinnit nerineqartartut ilanngunneqarput.

Piujuartitsisumik raajarniarnissamut killissaq

Raajaqassuseq uumassusilinnik misissuinerit, pisarineqartartut amerlassusaat aamma saarulliit raajanik nerisaqartut amerlassusaat aallaavigalugit naatsorsorneqartarpoq.

Piujuartitsisumik raajarniartarnerup killigisaata raajaqassutsip amerliartoqqissinnaanissaannut imminnullu piutinnissaanut qulakkeerinissamut killeqarpoq.

Raajarniartoqarpallaarpat saarulliillu raajanik nerisaqartut amerlavallaarpata killiliussaq qaangerneqassaaq.

Paasissutissarsiffik: Pinngortitaleriffik

Allisiguk

Inassutigineqartut qaffanneqartut

NAFO-p ilisimatuussutsikkut siunnersuisoqatigiivisa, Kitaani raajartassat 2027-mi 80.000 tonsiussasut inassutigisimavaat.

Ukioq manna inassutigineqartumit 5.000 tonsinik amerlanerusunik.

Piujuartitsilluni raajarniarnermut inassuteqaat taamaattoq 2024-mi saqqummiunneqarmat aalisartut pakatsipput.

Tassani ilisimatuussutsikkut siunnersuisoqatigiit Kitaani pisassiissutit 22.500 tonsinik ikilineqarnissaat inassutigaat.

Taamaattumik piujuartitsilluni raajarniartarnermut tunngatillugu inassuteqaatit nutaat 2025-mi pisassiissutigineqartunit suli qaffasinnerupput.

Aamma atuaruk Inuussutissarsiortut raajat pillugit: Inuiaqatigiit tamarmik aningaasanik annaasaqarsinnaapput

Nafo, Tunumi raajartassanut tunngatillugu, raajat 'immikkoortumi peqqissumi' aalisarnerup kingunerisaanik toqusartut amerlavallaannginniassammata, siunnersueqquneqarpoq.

Tassani 1.822 tonsit aappaagumut pisassiissutigineqarput.

Ingerlatsinermut pilersaarut

Nafo, Northwest Atlantic Fisheries Organization aamma Pinngortitaleriffik piujuartitsisumik raajaqassuseqarnissaanut qulakkeerutaasumik pisassiissutaasussanut innersuussuteqarlutik ukiumoortumik nalunaarusiortarput.

Innersuussutit taakku Aalisarnermut, Piniarnermut Nunalerinermullu Naalakkersuisoqarfimmut ingerlateqqinneqartarput, tassanngalu Naalakkersuisunut paasissutissiisoqartarluni.

Aalisarnermut siunnersuisoqatigiit – pingasunik ilaatigut KNAPK-mit Sulisitsisuniillu ilaasortaqartut akornanni tusarniaasoqareernerani Naalakkersuisut ukiup tullissaanut pisassiissutissanik ilisimatuussutsikkut siunnersuinermik tunngaveqartunik pisassiissuteqartarput.

Pisassiissutit siunnersuutigineqartut ukiup siulianut sanilliullugit 20 procentimik ikinnerugaangata aalisarnermtu siunnersuisoqatigiit aaqqiissutaasinnaasunik siunnersuusiornissamut immikkut ittumik tusarniaanermut qaaqquneqartarput.

Immikkut ittumik pisuni Naalakkersuisut ilisimatuussutsikkut innersuussutit allanngortikkallarsinnaavaat, ilisimatuussutsikkulli innersuussutit naapertorlugit piaartumik pisassiissuteqartoqassalluni.

Allisiguk

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.