Ph.d.-liortup ernummatigisaa USA-mit sakkutuujunngillat

USA-p præsidentia Donald Trump nunarput pisariaqarlugu oqaqqippoq.

Ullutsinnili pisut pillugit ernummatissaqaraluartoq, USA-p sakkutuuisa nunatta illoqarfiinileriasaarnissaat pillugu ernumasariaqanngitsugut, Ilisimatusarfik aqqutigalugu sillimaniarnermut politikkikkut ingerlatsineq pillugu ph.d-liortoq Hans Peder Kirkegaard oqarpoq.

- Jens Frederiup tigusaajartorneqarnissaa ernummatigissanngilarput. Aamma sakkutuut nunatsinnut takkuteriasaarnissaat ernummatigissanngilarput, Hans Peder Kirkegaard Nunatta Nipaanut oqarpoq.

Venezuela nunarpullu assersuunneqarsinnaanngitsut

USA-p Venezuelap præsidentia sapaatit akunnerata siuliata naanerani tigusaraa. Tamanna nunat tamalaat akornanni inatsisinik unioqqutitsinerusoq ilisimasallit arlallit tusagassiuutini arlalinni oqaatigisareerpaat.

Taamatulli nunatsinni pisoqarnissaa ernummatigerujussuartariaqanngikkipput, Hans Peder Kirkegaard oqarpoq. Nunarpummi Venezuelalu assigiinngilluinnarput. 

- Assersuunneqarpiarsinnaanngillat. Una aallarniutigalugu: Amerikamiut una sillimaniarneq politikkimut periusissiaat siorna saqqummertoq eqqarsaatigigaanni, tassani Kina akeraanerpaavoq. Kina Venezuelami aningaasaliinerunikuuvoq, annertuumillu Amerika Kujallermi peqataalluni.

Kina nunatsinni aningaasaliiniarsarinikuugaluarluni iluatsitserujussuarnikuunngilaq. London Mining kujataanilu uranisiorniartut ingerlatserpianngitsut Hans Peder Kirkegaardip erseqqissaatigaa.

Aamma Trumpip Venezuela oqaluuserigaangamiuk ikiaroornartunik peqqarniisaarniartoqartoq oqaluuserisarpaa. Nunarput oqaluuserigaangamiuk nunarput USA-p sillimaniarneranut atorfissaqartillugu oqaluuserisarpaa. Nunarpulli USA-mut siooranartutut oqaluuserineqarneq ajorpoq.

Tassalu sakkutuunit saassunneqarnissarput ernummatigisariaqanngikkipput, Hans Peder Kirkegaard isumaqarpoq. 

Sunniiniapiluttut ernummatigigai 

Allamilli eqqumaffigisassaqarpugut. 

- Nunarsuup avannaarsuani nunani soorlu Issittumi sorsunneqarnissaa ilimananngilaq. Kisianni sorsuttariaaseq ilimanarnerpaaq unaavoq: sunniiniapilunneq, Hans Peder Kirkegaard oqarpoq.

Tassanilu nunatsinni avissaartuutsitsiniarluni eqqunngitsunik paasissutissanik siaruarterineq eqqarsaatigaa.

- Sunniiniapilunneq kineserineersinnaavoq, russineersinnaavoq imaluunniit aamma allat AI atorlugu nunatsinni avissaartuutsitsiniarsarisinnaapput. Taamaammat pingaarpoq, nunatsinni nunaqatigiissuserput ersarissarlugu naleqartitatta ersarissarnissaat, Hans Peder Kirkegaard oqarpoq.

Nangipporlu:

- Massakkut ajornanngilaartarami nunatta avissaartilernissaa. Una qallunaat akeraralugit qallunaat ilagalugit imaluunniit Amerikamiut. Avissaartuutsitsiineq taanna sorsunnermi nutaami sakkuuvoq. Hybridkrig.

Taamaammat ataatsimoornissaq pingaaruteqartoq taanna isumaqarpoq.

- Nunaqqatigiissuseq nukittuppat, taava aamma sunniiniapiluttut saassussisinnaanerat killeqalissaaq.

Kalaallit Amerikamiuunianngitsut qallunaajunianngitsullu arlarlippassuariarluni oqaatigineqartareerpoq. Aamma Trump arlalippassuariarluni ataqqinninngitsutut aamma isornartorsiorneqartareerpoq.

Taamaattoq Trumpip nunarput aqulerniarlugu maannakkut oqaatigisaqattaarpaa, kingullermik unnuaq taama oqarluni.

Nunatsinniilli oqaatigineqartartut USA-mi tusaaneqartartut, Hans Peder Kirkegaard oqarpoq.

- J. D. Vance Usha Vancelu tikeraarniaraluaramik akerliussutsimik takutitsigatta sussaarput. Tusaasarpaatigut. Sualummik ukua imminnut nittarsaanniartunut akerliunermik takutitsiffigineqarluni nuanninngimmat.

Taraajartut kakkanniaformandiuniarsarisut

Trump USA-miuni kisimiilluni kingullertigut oqaaseqanngilaq. 

Aamma præsidentip illorsuani pisortaanerup tulliata nuliata Katie Millerip nunatta amerikamiut erfalasuannik qallerneqarsimaneranik asseq saqqummiuppaa, ”qanittukkut”-mik oqaasertalerlugu.

Katie Millerilli Trumpip naalakkersuisuinut attaveqaraluartup saqqummiussaa Hans Peder Kirkegaardimut ernumatitserujussuanngilaq.

- Ilaatigut Amerikamiut massakkut politikerii inuilu qaffasissut ministeriunngitsut imannak paasigaanni, iluliarmiutut oqarluni: inuinuku taraajartut, imaluunniit kakkanniaformandiuniarsarisut, Hans Peder Kirkegaard oqarpoq.

Trumpip ministeriisa ilagisartagaasalu nunarput pillugu oqaatigisartagaat assigiinneq ajortut, taassuma maluginiarpaa.

- Katie Milleri podcastiminut ussassaarisoq eqqarsarpunga. Imannak paasillugu nunarput eqqartorneqaraangat Trumpip eqqaani kikkunuku oqaluttut? Qinikkat, kongressimiittut, guvernørit imaluunniit arlaatigut podcatillit. Ministeriunngillat.

- Pete Hegseth illersornissamut ministererivaat, Marco Rubio nunanut allanut ministererivaat, taakku akulerunneq ajorput. Marco Rubio akulerukkaangami oqartarpoq, nunarput suleqatigiumallugu. Taava uani Trumpip silarsuaani nunatsinnik eqqartuisut iliuuseqarsinnaasut suleqatigiissasugut oqalupput.

KNR Radio KNR TV-lu unnugu nalunaaqutaq 19.30-miit toqqaannartumik aallakaatitseqatigiissapput, "Nunarsuatsinni pisut" qulequtaralugu.