-Meeqqat nipaarupput: Nuummi innuttaasut meeqqat pillugit oqaaseqartartup soraarsinneqarnera paasisinnaanngikkaat
Meeqqat pillugit oqaaseqartartup Stina Sværdip soraarsitaanera tallimanngormat saqqummiunneqarpoq. Nuummi innuttaasut meeqqat pillugit oqaaseqartartuerunneranut ugguarput.
Allattoq Jonna Enoksen Dahl
oktobarip 20-at 2026 10:46
Nunatsinni meeqqat pillugit oqaaseqartartueruppoq.
Meeqqat pillugit oqaaseqartartoq Stina Sværd soraarsitaasimasoq tallimanngormat saqqummiunneqarpoq.
Meeqqat pillugit oqaaseqartartuerunnera pillugu Nuummi innuttaasut apersorpagut.
Jens Jansenip meeqqat pillugit oqaaseqartartup Stina Sværdip soraarsitaasimanera ugguaraa.
-Uggornarpoq taama meeqqanut sullissinera ajunngitsigisoq. Uggornarpoq taama pisoqariataarsimanera.
Jens Jansen
John Morgensen-Fontainip Jens Jansenip oqaasii ilaliinnarpai.
-Uggornarpoq, sulilluarneralu takussutissaqarluartutut uanga nammineq inuttut takusinnaalluarnikuuara paasisinnaanngilaralu sooq soraarsitaanersoq.
Meeqqat nipaarupput
Meeqqat pillugit oqaaseqartartuerunnera inuiaqatigiinnut sunniuteqarnissaa Jens Jansenip ilimagaa.
-Sunniuteqangaatsiassaaq. Iluamik meeqqat nipaarupput. Taamatut oqarluaannaraanni meeqqat nipaarupput.
John Morgensen-Fontainip meeqqat pillugit oqaaseqartartup Stina Sværdip sullissilluarnera maqaasissallugu oqaatigaa.
-Inuiaqatigiinnut sunniuteqassaaq. Sulilluarnera massakkut amigaataalissaqaaq taamak sulilluareertigisoq aamma takussutissaqarluareertigisoq maannamut. Amigaatigilissavarput.
John Morgensen-Fontain
MIO-mi aningaasanik atornerluilluni peqquserluttoqarsimaneranik peqquserlullunilu allagaasiortoqarsimaneranik pasitsaassaqartoqartoq KNR-ip aggustip ulluisa 19-ianni saqqummiuppaa.
Stina Sværd tassunga attuumassuteqarani Facebookkikkut ilaatigut allappaa.
- Uannut pingaaruteqarpoq erseqqissassallugu, peqquserlussimannginnama imaluunniit suliniaqatigiiffiup aningaasaataanik atornerluisimannginnama. Paarlattuanik nukikka atorlugit suliniaqatigiiffiup sulisullu soqutigisaat, minnerunngitsumillu meeqqat pisinnaatitaaffii illersorlugit isumagisimavakka.
