Qupperneq eqqumiitsoq maluginiarneqartoq – kilitsissiatut suliaqarnerua?
Facebookimi qupperneq eqqumiitsoq kalaallinut sammisunik saqqummersitanik pingasunik, akilikkanik ilaqartoq maajip pingajuanni arfininngornermi pilersinneqarpoq.
Qupperneq 'Nipit pingaaruteqarpoq'-mik ateqarpoq – saqqummiussanilu Pituffimmut tunngatillugu qanoq isumaqartoqarnera, USA-p Kalaallit Nunaatalu akornanni suleqatigiinneq pitsanngorsarneqassanersoq kiisalu Kalaallit Nunaata Danmarkillu akornanni pissutsit qanoq isumaqarfigineqarnersut apeqquteqarnerpoq.
Quppernermik kina saqqummersitsisuunersoq ilisimaneqanngilaq, nunatsinneersulli arlallit tamanna amerikamiut sunniiniarneranut ilaasoraat.
Tassungali aamma uppernarsaatissaqanngilaq. Taamaakkaluartorli maluginiarneqarsinnaallunilu alaatsinaanneqarluarsinnaavoq.
Tamanna Ph.d-nngorniap, russit Europap kippasissuani sunniiniarlutik qaammarsaanerannik paasissutissallu atorlugit sorsunnerannik kiisalu qarasaasiatigut paasissutissanik eqqunngitsumik ingerlatsinermik ilisimatusartoq, Christiern Santos Okholmip oqaatigaa.
- Misissornissaanut atatillugu ajornartorsiutaasoqangaatsiarpoq. Amerikamiut 2016-imut qinersinissaat sioqqullugu Facebookip ersarissuuseq piiarlugu aallartippaa, taanna oqarpoq.
Sungiusimanngisamik suliaqarneq
Amerikamiut sakkutuui Filippinerit Nunaanni innuttaasunut sunniiniarlutik kinamiut coronamut akiuussutissaat pillugu sunniiniarsarisut tusagassiorfiup, Reutersip siorna saqqummiuppaa.
Sunniiniarneq Trumpip 2020-mi allattoqarfigisimasaanit aallartinneqartoq præsidentimit Bidenimit 2021-mi unitsinneqarpoq.
Tamanna USA-p paasissutissanik eqqunngitsunik qanoq iliornikkut suliaqartarnera pillugu qaqutigoortumik paasisaqartitsivoq – tamanna nunatsinni quppernermit eqqumiitsumit takusatsinnit allaanerulluinnartoq, Christiern Santos Okholm oqarpoq.
- Takugakku eqqarsarpunga sungiussisimarpalunngitsorujussuullunilu qarsupittorujussuusoq. Tamanna qanoq suliaqarnermik ilisimasaqannginnermut takussutissaqalaarpoq.
Tusagassiorfiup, Wall Street Journalip amerikamiut isertortumik paasiniaasarfii soorlu NSA aamma CIA kalaallit inuiaqatigiit pillugit paasissutissanik katerseqquneqarsimasut sapaatip akunnerata siuliani saqqummiuppaa.
Facebookimilu quppernerup tamatuma kingunitsiannguani saqqummernera saqqummiussamut atassuteqarsinnaalluarpoq – kisianni tamanna amerikamiunit suliarineqarneranik isumaqartariaqanngilaq.
- Akikitsumik ajornaatsumillu russit imaluunnit kinamiut tungaanniit uisakajaartitsiniarnerusutut eqqarsaatigineqarsinnaavoq. Taamaammat kukkusunik – tassa amerikamiunik – pisuutitsiniarnissaq siunertaavoq, taanna oqarpoq.
Amerikamiunit Trumpimut akerliuneq
Immikkut ilisimasallip quppernerup suliarineqarnera pitsaanngingaarmat naak ilimananngilluinnaraluartoq suliarinnittut paasineqarnissaminnik kissaatiginnippalaarsorai.
Wall Street Journalimit saqqummiussaq isersortumik paasiniaasartunit kinaassutsiminnik isertuussisut paasissutissiissuteqarnerat tunngavigalugu suliarineqarpoq. Immikkullu ilisimasallip amerikamiut Trumpip allattoqarfiata peqqussutaanut akerliliiniarlutik suliaminnik pitsaanngilluinnartumik suliaqarniarsarisorai.
- Aamma inuit politikkimut isumaqataanngitsut suliaqartuusinnaapput, taamaammallu paasineqarsinnaasumik pitsaanngitsumik suliaqarlutik. Paasineqarunillu tamanna iluatsinngitsoq oqaatigineqassaaq. Suliaqarnerlu matuneqarluni atortussat allat ujartorneqassapput.
Taamaattoqassappat amerikamiut isumatusaarnerusumik nassaassarsiornissaat ajornakusuunngitsoq, Christiern Santos Okholm oqarpoq.
- Nunarsuarmi isertortumik paasiniaasartut attaveqaatillu pitsaanerpaat ilaat tassaniipput. Silassorissuusiaq atorlugu KNR-imit nutaarsiassat misissorsinnaavaat suullu oqallisigineqarnersut misissorlugit. Kalaallit innuttaasut Facebookimi atuisarnerisa erseqqissarnissaat ajornaatsuuvoq, taavalu oqallisigineqartut sammisallu pineqartut misissuiffigeqqissaarneqarsinnaallutik.
