Sulisitsisut nalunaaquttap allanngortinneqarnissaa mianersoqqussutigigaat: Suliffinnik annaasaqarfiusinnaavoq

Innuttaasut arlallit piffissamik allannguinissaq pitsaasumik isummerfigalugu KNR-imut oqaatigaat.

Sulisitsisulli nunatsinni nalunaaquttap allanngortinniarneqarnera aasaaneranilu nalunaaquttap aappaagumit allanngortinniarneqarnera ernumanartoqartippaat.

Sulisitsisut tamanna inuussutissarsiornermut sunniuteqangaatsiarnissaa ernumassutigaat.

Kattuffiup Akunnittarfiit, Neriniartarfiit Takornarialerinerullu Ataatsimiititaliaata oqarnera naapertorlugu allannguineq timmisartuutileqatigiiffinnut angalatitseqatigiiffinnullu qularnermik pilersitsilissaaq – tamannalu nunatsinni suliffeqarfinnut suliffissaqartitsitsinermik isertitanillu annaasaqarfiussalluni.

Taamaammat kattuffiup ataatsimiititaliaata Inatsisartut allannguinermik siusinnerpaamik 2028-mut kinguartitsinissaat kaammattuutigaat.

- Kalaallit Nunaanni piffissamut aalajangersakkat ukiut ikittuinnaat ingerlaneranni allanngortinneqaqattaartillugit nalornilersitsisarpoq pilersaarusiornerlu ajornakusoornerulersittarlugu, sulisitsisut ataatsimiititaliaat tusagassiuutinut nalunaarummi allappoq.

Takornariaqarnermut eqquisinnaasoq

Kattuffiup ataatsimiititaliaata timmisartuutileqatigiiffiit nunanilu tamalaani angalatitsiviit suliassatik ukiut arlallit sioqqullugit pilersaarusiortarpaat. Timmisartuussinerit, angalanissamut pilersaarutit tikeraartunullu isumaqatigiissutit taamaattumik takornariaqarnerup aallartinnginnerani isumaqatigiissutigineqareertarput.

Piffissap aalajangersarneranik allannguineq timmisartuussinissamut sunniuteqarsinnaallunilu timmisartuussinernik nutaanik pilersitsinissamut ajornakusoortitsisinnaavoq.

Air Greenlandip timmisartuutileqatigiiffiup angallassinissamut pilersaarutaanut sunniutaasinnaasunut mianersoqqussutigereerai, kattuffiup ataatsimiititaliaata erseqqissaatigaa.

Allannguineq timmisartumi inuttat qasuersaarfissaqarnerulernissaannik Europamilu ingerlaqqiffissanut ajornerulersitsisinnaalluni. Amerikap avannaanut siunissami aqqutinut allanut aamma ilungersunartoqartitsilersinnaasoq, ataatsimiititaliaq naliliivoq.

Kingunerluutit silaannakkut angallannermut taamaallaat eqquinavianngilaq, tamannali akunnittarfinnut, neriniartarfinnut, takornariaqartitsisunut suliffeqarfinnullu allanut takornariaqarnermik suliaqartunut aamma eqquissaaq.

Timmisartukkut attaviit ajornerunerata saniatigut angalanerup piffissaata sivisuneranik innuttaasunullu ilaquttaminnut tikeraarniartunut, ilinniarnermut, suliffimmut katsorsarneqarnermulluunniit atatillugu angalaniartunut aningaasartuuteqarnerutitsinermik kinguneqarsinnaavoq.

Aningaasaqarnikkut misissuisoqarnissaa piumasarigaat

Sulisitsisut oqarnerat naapertorlugu timmisartuussinerit ajornerulerneratigut takornariaqarnermik inuussutissarsiorneq nunatsinni mittarfinnut nutaanut, akunnittarfinnut nunanillu tamalaanit attavinnut aningaasaliissuteqarnerata nalaani sanngiinnerulersinneqaratarsinnaavoq.

Taamaammat kattuffiup Inatsisartut inaarutaasumik aalajangiinnginnerminni aningaasatigut kingunerisinnaasaanik misissueqqaartariaqarsorai.

Ataatsimiititaliap tamatuma saniatigut piffissamut maanna aaqqissuussineq innuttaasut ilaannut ilaatigut meeqqanut, ilaqutariinnut aamma ullup unnuallu ingerlanerani ileqqunut atatillugu ilungersunartoqartitsinera paasisinnaavaa.

Tamanna KNR-ip innuttaasunik Nuuk Centerimi isumaannik paasiniaalluni qanittukkut apersuineranni aamma oqaatigineqarpoq.

- Qaamasarnera taartarnera inuttut inooriaatsimut sunniuteqarpoq peqqinnanngitsumik. Taamaattumik qujavunga utertinneqalermat eqqortumut, Helga Zeeb oqarpoq.

Sulisitsisut oqarnerat naapertorlugu inuussutissarsiornermut piffissaq ungasinnerusoq eqqarsaatigalugu innuttaasut pisariaqartitaat eqqarsaatigineqassapput.

2027-mi timmisartuussinissamut pilersaarut tuniniarneqalereersoq

Air Greenlandip 2027-mi timmisartuussinissamut pilersaarut tamanut saqqummiutereerlugulu tuninialereermagu tamanna ernumassutit pingaarnerit ilagaat. Nunani tamalaani angalatitseqatigiiffiit takornarialerisullu suliffeqarfii Kalaallit Nunaannut angalanissamik pilersaarusioreerlutillu tunisaqareerput.

Taamaammat kattuffiup ataatsimiititaliaa piffissamut aggersumut sinaakkutinik allannguinissaq naapertuunnanilu aningaasaqarnikkut aarlerinartoq isumaqarpoq.

Ataatsimiititaliap Inatsisartut piffissamik allannguinissamik aasaaneranilu piffissamik siusinnerpaamik 2028-mi atulersitsinissamik qulakkeerinissaat kaammattuutigaa.

Tamatuma saniatigut kingunissanik sukumiisumik misissuisoqarnissaa aamma timmisartuussinermik ingerlatsisut takornarialerinermillu inuussutissarsiuteqartut qanimut oqaloqatigineqarnissaat kaammattuutigineqarpoq.

- Nunarsuaq Kalaallit Nunaannut tikeraaqqullugu qaaqquutigalugu, peqatigisaanillu timmisartuussinernik angalanernillu pilersaarusiornissaq ajornakusoornerulersissinnaanngilarput, ataatsimiititaliaq tusagassiuutinut nalunaarummi allappoq.