Nunarput pillugu saqqummiussineq nunatsinni politikerinit qisuariarfigineqarpoq

Kalaallit Nunaata Amerikamiut erfalasuanik qallerneqarsimaneranik assilialiaq attaveqaqatigiittarfimmi X-mi Katie Millerimit arfininngormat saqqummiunneqarpoq. Assilialiaq “SOON"-imik allannilik.

Allattoq Irene Jeppson

januaarip 04-at 2026 14:46

Saqqummiussineralu nunatsinni nunanilu allani politikerinit qisuariarfigineqarpoq.

Katie Millerip uia tassaavoq Stephen Miller, taannalu præsidentip illorsuani Det Hvide Hus-imi pisortaanerup tullersortaatut atorfeqarpoq Donald Trumpimullu siunnersuisartuulluni.

KNR-imiit nunatsinni qisuariartut ilai katersorpagut.

Atassutip siulittaasua isumaqarpoq attaveqaqatigiittarfimmi X-mi saqqummiussaq nalaatsornerinnaanngitsoq pisorlu pimoorunneqartariaqartoq.

- Naak nunarput Venezuelamut assersuunneqarsinnaanngikkaluartoq pisoq piviusuuvoq qiviarneqartariaqarlunilu. Trumpip sakkutuulersornermik atuisinnaanini erseqqissumik itigartinngilaa. Tamanna ilungersunarpoq. Inunnullu isumaqartunut USA aggissasoq ikiuiartorluni, pisariaqarpoq silatusaassalluni. Sinnattuaqinerit qimanneqartariaqarput akerlianillu piviusoq takuneqartariaqarluni.

Aqqalu C. Jeremiasseni naapertussagaanni USA-p namminneq soqutigisatit aallaavigalugit iliuuseqarput takorluugaallu romantikkimut tunngassuteqaratik.

- Susinnaanngitsutut isigineqassanngilagut, inuiaqatigiittulli naligiittut isigineqassalluta. Tamannalu pimoorussilluni oqaloqatigiinnissamut tunngaviusariaqarpoq.

Aqqalu C. Jeremiassenip erseqqissaassutigivaa nunatta siunissaa kalaallinit aalajangerneqassammat.

- Aalajangerneq uatsinniissaaq – allaniinnanilu. Venezuela-p kingorna tullinnguunneqassagutta soqutiginngitsuusaarsinnaanngilarput, Aqqalu C. Jeremiassen oqarpoq.

Jens Frederik: Uippallernissami pissutissaqanngilagut

Naalakkersuisut siulittaasuat Jens Frederik Nielsen qisuariartunut ilaavoq.

- Uippallernissamut ernumanissamullu pissutissaqanngilagut.

- Katie Miller assi siammarsimasaa, Nunarput Amerikap erfalasuanik qalligaq, sumilluunniit allanngortitsinngilaq. Nunarput tuniniagaanngilluinnarpoq, siunissarpullu inuit attaveqatigiittarfianni oqallittarfiisigut ilusilersorneqassanngilaq. Assiliaq ataqqinninngilaq.

Nunat inuiaallu ikinngutigiissappata ataqqeqatigiinnermik nunallu tamalaat akornanni pisinnaatitaaffiit aqqutigalugit ingerlatassaavoq - oqariartuutit pisarinninniarnermik imallit inissisimaffitsinnik pisinnaatitaaffitsinnillu soqutiginninngitsut aqqutigineqassanngillat.

- Demokrati aqqani ingerlavugut, oqartussaaffeqarpugut, kiffaanngissuseqarluta aaliangiisinnaatitaalluta aammalu oqartussaassuseqarnikkut nukittuumik aaqqissuussaanermik pilersitsisimalluta. Nunat tamat akornanni inatsisini pisinnaatitaaffigut inissisimaffippullu naqissuseqqavoq. Inuit pisinnaatitaaffii pillugit allattorsimaffinni naqitanngorluta illersugaavugut, nunallu tamalaat akornanni isumaqatigiissutini ataqqisassatut isigineqarluta. Ersarissumik allaqqapput.

Taanna oqarpoq Naalakkersuisut toqqissisimasumik akisussaassuseqartumillu sulinertik nangeqqissagaat.

- Oqaloqatigiinnernik pingaartitsilluta ingerlatsivugut, soqutigisagut aalluppagut, nunat tamalaat akornanni malitassat malillugit sulivugut, suleqatitta soorlu taakku aamma pituttorsinaaffigigaat.

Uippallernissamut pissutissaqanngilagut. Ataqqinninnginnermulli naaggaarluta ersarissumik oqariartuuteqassalluta pissutissaqarpugut, Jens Frederik Nielsen oqarpoq.

Aleqa Hammond: Mette Trumpilu naapittariaqarput

Siumup siulittaasua Aleqa Hammond isumaqarpoq qinngasaarineq oqariartuuteqaqattaartullu killilerneqartariaqartut.

- Nunatta naalakkersuinikkut siunnerfigisariaqarpaat ministeriuneq Mette Frederiksen aammalu Trump iluminni naapissutigisariaqalerpaat taamannak pissusilersorneq unitsinneqartariaqartoq. Soorunalumi kalaallit aamma peqataatitaqassapput.

- USA-p Danmarkillu iluminni akaareqatigiinnginnerat diplomatiskiusumik annertusiartortoq unitsinneqartariaqarpoq.

- Amerikamiut oqariartuutaat Københavnimut sammivoq Nuummullu sammigani. Taamak isigivara. Taamaattumillu pingaaruteqarluinnartuuvoq NATO-mut ilaasortaasut marluk naalagaaffiit imminnut isumaqatigiinnginnerat unitsilluinnaqqissaartariaqarpoq, NATO-mi tamakkiisumik tunuliaqutserneqarluni, Aleqa Hammond isumaqarpoq.

Múte: Ataqqinninnginneq suleqatigiinnissamut ungasillisaataasarpoq

Aamma Naalakkersuisut Siulittaasorisimasaat maannakkullu Inuit Ataqatigiinni siulittaasoq Múte Bourup Egede qisuariartunut ilaavoq.

- Uagununa nunarput, siunissaa nammineq aalajangigassarput. Ataqqeqatigiinneq tatigeqatigiinnermik suleqatigiilluarsinnaanermillu pilersitsisarpoq. Ataqqinninnginnerli suleqatigiinnissamut ungasillisaataasarluni. Amerikamiullu siuttuisa uatsinnut ataqqinninngilluinnarnerat akuersaanngilara taamaattuarniarpatalu suleqatigineqarsinnaanerat apeqquserpara, nunarpummi tiguinnagassaanngilaq. Tatigeqatigiilluni suleqatigiinneq qaqugumut illersugassaavoq. Nunarput pillugu ilungersoqatigiittuassaagut, Múte Bourup Egede facebookimi taama allappoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.