Missingersuut: Canadap provinsiani avissaarnissamut taasisoqarnaviannginnera erseqqissoq

Canadap provinsiani Albertami innuttaasut Canadamit avissaarnissamut suliniuteqartoqarnissaa akerlererpasippaat.

Tamanna Canadami tusagassiorfiup CBC-p missingersuinerata takutippaa. Qinersisarfiit pingajorarterutaannit amerlanerusunit taasinerit kisinneqareerput.

Taasinerit kisinneqartut 76,2 procentiisa, Danmarkimi marlunngornermi nalunaaqutaq qulingiluat qaangilaaraalu, Canadamut ataannarusuttunut "remain"-imiilerput - tassa Canadamut ataannarusuttut.

Canadami innuttaasut 40 millioninit amerlanerupput. Taakkunannga 5 millionit missaanniittut Albertami, uuliamik gassimillu pisuussuterpassuaqartumi, najugaqarput.

Canadami ministeriunerup, Mark Carneyip, Albertami peroriartorsimasup, qinersisartut avissaarnissamut akerliullutik taaseqqullugit kajumissaarpai.

- Albertamiut erseqqissumik aalajangerput, Carney nutaarsiassaqartitsiviup Reutersip nutaarsiassiinera naapertorlugu taama oqarpoq.

- Ataatsimoornissartik, ineriartortitseqatigiinnissartik isumassoqatigiinnissartillu toqqarpaat.

- Canada immikkoortuminit tamanit anneruvoq, taanna nangilluni oqarpoq.

Taasisitsineq missingersuutaannaasoq

Misissueqqissaartartut ilisimatuussutsikkullu misissuisarfiit avissaarnissap piviusunngortinnissaanut akuersinissaq siornatigut ilimanaateqanngivinnerareerpaat.

Isumasiuinerit takutippaat innuttaasut pingajorarterutaat avissaarnissamik taasisoqarnissaanik tapersersuisut.

Taasititsineq, ataasinngornermi nunap nalunaaqutaa malillugu ingerlanneqartup, missingersuutissatut taasititsineruvoq avissaarnissamillu kinguneqartussaatitaanani. Taamaattumik taasisut akornanni avissaarnissamut akuersisoqarsimasuuppat, tamanna avissaarnissamut taasisitsisoqarnissaanut inatsisitigut suliaqarnissamik aallartitsinissamut akuersaarnerussimassagaluarpoq.

Taamaakkaluartoq taasititsinerup inernera Carney-p ajugaalluinnarneratut oqaatigineqarpoq.

Taanna siusinnerusukkut oqarpoq taasinissaq "piffissami ajornerpaami“ piumaartoq. Taamaammat Carney-p nuna, USA-p præsidentiata Donald Trumpip niuernikkut akitsuusersuinerani Canadalu "USA-mi naalagaaffiit immikkoortuisa 51-iattut“ eqqartuiuarnerani, aalakkaasumik inissisimanissaa pisariaqarnerarpaa.

Immikkoorniartut nunap immikkoortuata pinngortitami pisuussuteqarluarnera tunngavilersuutigalugu avissaarnissaq piviusunngortinniarsarigaluarpaat. Taakkua nunap immikkoortuinik pigissaarfiunnginnerusunik aningaasalersuiumanngillat nunallu immikkoortuani allaffissornerup ineriartortitsinissamut akornutaanerarlugu. 

RITZAU/