MIO-mi aningaasanik atornerluilluni peqquserluttoqarsimaneranik peqquserlullunilu allagaasiortoqarsimaneranik pasitsaassaqartoqarpoq

Sulisup tatigineqarluartup atorfini ukiuni arlalippassuarni atornerlussimagaa, suliffeqarfiup iluani maannamut misissuinerup takutippaa.

Meeqqat pisinnaatitaaffii pillugit sullissivimmi MIO-mi aningaasanik atornerluilluni peqquserlunnerujussuaqarsimaneranik kiisalu peqquserlulluni allagaasiortoqarsimaneranik pasitsaassaqartoqartoq, MIO nittartakkamini allappoq.

Ukiuni arlalippassuarni sulisup tatigineqarluartup atorfini atornerlussimagaa, suliffeqarfiup iluani maannamut misissuinerup takutippaa. Pisortat aningaasaataannik eqqunngitsumik piffissami 2021-miit 2026-mut pigiliussisoqartarsimasoq misissuinerup takutippaa. Aningaasat amerlassusaat maannamut missiliunneqarallartut 3,5 millionit koruunit sinnerpai.

Suliami nassaarineqartut tunngavigalugit suliaq politiinut nalunaarutigineqarpoq, politiillu paasiniaanermik aallartitsisimapput. 

Meeqqat pillugit Oqaaseqartartoq, Stina Sværd, oqarpoq:

- Suleqat tatigisaq aningaasanik annertoorujussuarmik peqquserluuteqartarsimanera paasigatsigu MIO-mi suleqatikkalu assorujussuaq tupaallappugut. Aningaasammi meeqqat pitsaanerpaamik atugaqarnissaannut pisinnaatitaaffiisalu qulakkeernissaannut immikkoortinneqarnikuupput.

Pasitsaassineq tigussaasunngormat eqqartuussissuserisut suleqatigalugit suliaq ingerlaannaq politiinut nalunaarutigaarput, kukkunersiuisunillu suleqateqarluta tamakkiisumik misissuinermik aallartitsilluta. Peqatigisaanik suliap ineriartornera pillugu naalakkersuisoqarfik ingerlaavartumik ilisimateqattaarparput, Stina Sværd oqarpoq.