Isumaqatigiissut: Naalagaaffimmi atorfillit Danmarkimit Savalimmiuniillu suleqatimisut 2026-imi atugaqalissasut

Kunngeqarfimmi nunani tamani politiini, pinerluttunik isumaginnittoqarfimmi eqqartuussivinnilu sulisunut akissarsiat sulinermilu atugassarititaasut ukiut marluk qaangiutsinnagit assigiisinneqalernissaat, Parnaarussalerisut Kattuffianni allatsip René Larsenip angusarissaarniutipilusuartut taavaa.

Allattoq Helle Nørrelund Sørensen

juulip 04-at 2024 14:48

Nutserisoq Erninnguaq Reimer

Suliffinnut assigiinnut naligiimmik akissarsiaqarneq.

Nunatsinni politiit pinerluttunillu Isumaginnittoqarfimmi sulisut akornganni ukiorpassuarni taama oqartoqartarpoq.

Oqariartuut danskit naalagaaffiannut tunngatinneqarpoq. Naalagaaffimmi nunatsinni, Savalimmiuni Danmarkimilu sulisut assigiinngitsunik isumaqatigiissuteqarput, taamaalillutillu assigiinngitsunik atugassaqartinneqarlutillu akissarsiaqarlutik.

Kisianni 2026-mi apriilip aallaqqaataaniit taamaakkunnaassaaq.

Tamanna nunatsinni naalagaaffimmi atorfilinnut tamanut isumaqatigiissutigineqaqqammertumi pilersaarutaavoq.

Isumaqatigiissut ukiut sisamat sinnerlugit kinguaattooqavoq, taamaattumillu 2020-mi apriilip aallaqqaataaniit 2026-ip marsip 31-anut tungaanut kingumoortumik atuutilersinneqarput.

Nunatsinni tjenestemandinut tunngasut

Naalagaaffimmi tjenestemanditut nunatsinni sulisut tjenestemandeqarneq tunngavigalugu atorfeqarput.

Soorlu pinerluuteqarsimasunut inissiisarfinni nakkutilliisut, politiit, eqqartuussivinni atorfillit qaffasissumillu ilinniagallit tjenestemandiupput.

Naalagaaffimmi tjenestemanditut nunatsinni ukioq kaajallallugu piffissarlu tamakkerlugu suliffiit 250-it missaanniipput, Danmarkimilu 183.000-t missaanniillutik.

Nunatsinni tjenestemandit nunatsinni tjenestemandinut inatsit tunngavigalugu atorfeqarput, tjenestemandillu suliumajunnaaqqusaanngitsut inatsimmi tassani allaqqavoq. Kisianni soraarsitaanissamut illersugaalluarlutillu pisortat suliffeqarfiutaanni allani atorfilininngarnit qaffasinnerusumik soraarnerussutisiaqarput.

Tusarfik: Bekendtgørelse af lov om statens tjenestemænd i Grønland, 2015

Allisiguk

Nunatsinni atorfillit akissarsiassaasa qaffanneqarnissaata saniatigut isumaqatigiissut anguniagassamik ersarissumik 2026-mi upernaakkut atuutilertussamik aamma imaqarpoq.

Parnaarussalerisut kattuffiata allattaa, René Larsen taama paasissutissiivoq.

- Danmarkimi Kalaallit Nunaannilu sulisut aningaasarsiatigut sulinermilu atukkatigullu naligiissitaalluinnalernissaannik piviusunngortitsiniarneq isumaqatigiissutip atuuffiani suliarineqasassasoq, illua tungeeriit isumaqatigiissutigaat. Tamannalu suliassapilussuuvoq angusarissaarniutipilusuullunilu, taanna KNR-imut oqarpoq.

Allatut oqaatigalugu, naalagaaffimmi sulissisut tamarmik nunatsinni, Danmarkimi Savalimmiuniluunniit suligaluarunilluunniit assigiimmik isumaqatigiissuteqarfigineqartassapput, soorlu akissaatitigut inissisimaffiup, sulinerup sivisussusaata, sulinngiffeqarnerup ernereerlunilu sulinngiffeqarnerup tungaatigut.

Danmarkip aningaasaqarnermut ministereqarfiata kattuffiillu assigiinngitsut arlallit,ataatsimoorlutik qitiusumik kattuffittut taaneqartartut isumaqatigiissuteqartuupput.

KNR-ip atukkatigut naligiissitaaneq pillugu paasissutissat aamma illuatungiliuttunit uppernarsartippai. Danmarkimili aningaasaqarnermut ministereqarfiup ataanittumit Sulisoqarnermut Piginnaasaqarnermullu Aqutsisoqarfimmit KNR-imut suli ilomoornerarumanagulu taamaannginnerarumanngilaat.

Kattuffik: Piffissap sivikitsup ingerlanerani suliassarujussuaq

Danskit ministereqarfia kunngeqarfimmi nunani pingasuni atorfilinnut naligiimmik akissarsiaqartitsilerniarlunilu sulinermi atugassaqartitsilerniartoq, danskit inatsiseqarnermut ministeriata Peter Hummelgaardip (S) Nuummut siorna juunimi tikeraarnermini oqaatigaa,.

- Piffissami sivisuumi suliarineqarpoq. Tamanna eqqortutuaallunilu naleqquttutuaavoq, nalunngilarpullu tamanna naalakkersuisunit kissaatigilluinnarneqartoq, inatsiseqarnermut ministeri KNR-imut taamani oqarpoq.

Kisianni qaqugu atuutilissanersoq ministerip oqaatigisinnaanngilaa.

- Piffissamut pilersaarutaateqanngilanga, kisianni sapinngisamik erngertumik pinissaa sulissutigissavarput.

Aamma atuarukPinerluuteqarsimasunut inissiisarfinni politiinilu sulisut assigiimmik kiisami akissarsiaqalissasut

Apriilip aallaqqaataanut anguniagaqarneq angusarissaarniutipilusuusoq, parnaarussalerisut kattuffianni allatsi René Larsen isumaqarpoq. Naliigiimmimmi akissarsiaqarnissaq kisiat pineqanngilaq.

Maleruagassat piumasaqaatillu amerlasoorpassuit, kalaallit danskillu sulisoqarnerisa atungaasa iluaniittut assigiinngitsorujussuupput.

Assersuutigalugu nunatsinni sapaatit akunnerannut nalinginnaasumik akunnerni 40-ni sulisoqartartoq danmarkimi akunnerit 37-it sulisoqartarpoq. Aammattaaq sulinngiffeqarnerup sivisussusaanut, soraarnerussutisiaqarnermut erninermilu sulinngiffeqarnermut malittarisassat, nunani marlunni malunnartunik assigiinngissuteqarput.

Taamaattumik politikkerinut, atorfilittanut kattuffinnullu piffissap sivikitsup ingerlanerani suliassarpassuaqassaaq.

- Piumassuseqaraanni tamanna soorunami piviusunngorsinnaavoq, René Larsen oqarpoq.

Kisianni aamma isumaqarpoq, illua tungeriit piffissaliunneqartup iluani naammassisaqarniarunik pimoorussisariaqartut. Pingaartumik isumaqatigiissut nutaaq qanoq kinguaattooqqatiginersoq eqqarsaatigigaanni.

Aamma atuarukKattuffik aarlerisaarisoq: Isumaqatigiissutaalersussaq nakkutilliisunik soraaralersitserataannaavoq

- Ukiuni sisamani nutaamik isumaqatigiissusiorniarnerput angusarissaarniutipilusuarmik oqarninnut pissutaavoq. Akissarsiat atorfeqarnermilu atukkat assigiisilernissaannut ukiut marluunngitsulluunniit iluanni isumaqatigiinniartoqarumavoq. Tamanna iluatsissinnaassasoq neriuppunga.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.