Jens-Frederik Nielsen: Narsarsuarmi pinngitsaaliilluni nuutsitsisoqassanngitsoq
Narsarsuarmi Mestersvigimilu sakkutooqarfiliortoqarsinnaaneranut periarfissaqarnera nunatta Danmarkip USA-llu isumaqatigiissutaanni nutaami ilaavoq.
Sakkutooqarfiliortoqassappat inuit pinngitsaalillugit nuutsinneqarnavianngitsut, naalakkersuisut siulittaasuata Jens-Frederik Nielsenip (D) KNR-imit apersorneqarnermini oqaatigaa:
- Taava aamma naqissuserusuppara pingaartillugulu Narsarsuarmi sakkutooqarfiliortoqassappat taava inuiaqatigiit sakkutooqarfimmut qanittussat assersuutigalugu Qassiarsummiittut allatigullu taakkununnga kingunerluuteqarsinnaannginnera naqissuserneqarpoq, Jens-Frederik Nielsen oqarpoq.
Nunatta USA-p Danmarkillu isumaqatigiissutaanni nutaami marlunngornermi atsiorneqartumi allaqqavoq USA Narsarsuarmi Mestersvigimilu sakkutooqarfiliorsinnaanissamut akuersissuteqartoq:
- USA aaqqissuussartaliussat teknikkikkullu paasissutissat isumaqatigiissutigineqartussat naapertorlugit Narsarsuami Mestersvigimilu illersornissaqarfimmik allamik pilersitsinissamut illuatungeriit isumaqatigiissutigisaannik akuerineqassapput, isumaqatigiissummi allaqqavoq.
Taassuma saniatigut USA Pituffik Space Basemi nutarterinissaminut akuersissuteqarnera isumaqatigiissummi taaneqarpoq.
- Isumaqatigiissummi allaqqasut tassa ullumikkut Pituffimmi sakkutooqarfik annertusaaffigerusuppaat saniatigut Narsarsuaq Mestersvigimilu sakkutooqarfimmik pilersitserusupput, Jens-Frederik Nielsen oqarpoq:
- 51-imi isumaqatigiissumminngaanniit uunga isumaqatigiissummut allaanerusoq tassaavoq qanoq qanorpiaq issanersut allatigullu nunat pingasuulluta isumaqatigiissutigisussaavarput.
Nunatsinni nutaanik sakkutooqarfiliortoqassappat Kalaallit nunaanniit akuerineqaqqaassasoq, Nunanut allanut naalakkersuisoq Múte B. Egedep aamma oqaatigaa:
- Pilersitsisoqassappat (sakkutooqarfiliortoqassappat aaqq.) aperineqassuugut aamma sumiiffimmi inoqarfimmiissappat soorunami kalaallit piumasarissavaat inuit tassani najugallit najugaqaannassasut, Múte B. Egede oqarpoq.
Tamanna ilutigalugu amerikamiut sakkutooqarfianit nunaqarfimmik mittarfimmillu alakkaasunit arlaleriarlutik tikeraarneqartarput.
- Amerikamiut maani sakkutooqarfiliussagaluarpata uagutsinnut, maani najugaqartunut qanoq piumasaqaateqartoqassanersoq apeqqutaasorujussuuvoq, Piumasaqaatit ima annertutigilersinnaapput uagut angerlarsimaffipput qimattariaqalissallugu, Storch Lund ukiorpassuarni mekanikeritut sulisimasoq mittarfimmilu aqutsisuusimasoq oqarpoq.
Sakkutooqarfiliortoqassappalli nunaqarfimmiut eqqaamiuilu pinngitsaalineqarlutik nuutsinneqarunnanngitsut Jens-Frederik Nielsenip naqissuserpaa.
- Inuit nussortinneqarnissaanut tunngasut piivilluinnarlugit peersinnaavagut toqqissisimanartumik tassani nunat pingasuulluta akunnitsinni isumaqatigiissutit aallaaviusussaapput, Jens-Frederik Nielsen oqarpoq.
