'Aatsaavissuaq misigaara' Inatsisartuni najuuttut ikippallaarlutik taasisinnaannginnerat assortuussutigineqartoq
Inatsisartut marlunngormat ataatsimiinnerat nalinginnaasumik aallartippoq.
Ajornartorsiuteqarporli. Inatsisartut suleriaasiat malillugu, taasisussaagaangamik ilaasortani 31-usuni ikinnerpaamik 16-it ataatsimiinnermut peqataasartussaapput.
Ataatsimiinneq marlunngormat aallartimmat 15-iupput. Tamannalu Naleqqameersup Jens Napãtuup sivitsunngitsoq uparuarpaa.
- Taasissagutta Inatsisartuni ilaasortat minnerpaamik affaat maaniittussaapput. Angalapput. Naalakkersuisugut angalapput. Demokratii amigalersimavoq, sulisinnaajunnaarpugut, Naleqqameersoq Jens Napãtôk’ Inatsisartut marlunngormat ataatsimiinnerup aallarteqqammernerani taama oqarpoq.
Naalakkersuisoqatigiinnit Inatsisartunut ilaasortat 20-upput. Attaviitsoq Kim Kielsen taakkununnga ilanngussappat 21-upput.
Taakkunannga 14-it ataatsimiittarfimmiipput.
- Naalakkersuisuutitaqartut 21-ullutik maani 16-iusinnaannginnerat aatsaat takulinngilarput. Taamaammat siulittaasoq ataqqinartoq Suleriaaserput malittussaagatsigu, 16-inngornissaata tungaanut aaqqiisoqartariaqarpoq, Jens Napãtôk’ oqarpoq.
Ataatsimiinneq tamatuma kinguninngua unikkallarpoq.
Naalakkersuisoqatigiinnit Nunat Avannarliit Siunnersuisoqatigiiffiata ataatsimiinnerannut peqataajartorlutik FN-imullu angalasoqartoq, ataatsimiinnermik ingerlatsisup Vivian Motzfeldtip erseqqissaatigaa.
Naalakkersuisoqatigiinneersut 14-iummata, illuatungiliuttunit marluk najuuppata, ataatsimiinneq pilersaarutaasutut nanginneqarsinnaavoq.
Illuatungiliuttuniilli Jens Napãtôk’ kisimiilluni ataatsimiittarfimmiippoq.
Siumut marlunnik ilaasortaqarpoq, taakkuali marluullutik taasisannginnissamik naalakkersuisoqatigiinneersunik isumaqatigiissuteqarput. Naleqqamit ataaseq taama isumaqatigiissuteqarpoq.
Tassalu Naleqqameersunit najuussinnaasuni arfineq-marlunni marluk najuuppata, ataatsimiinnermi taasisinnaasut 16-iussagaluarput.
Tamannalu aamma Vivian Motzfeldtip erseqqissaatigaa.
- Illuatungiliuttuninngaanniit Inatsisartunut ilaasortat maannga inersuarmukarnissaannik kaammattorpakka, suliagut nangissinnaaniassagatsigit, Vivian Motzfeldt oqarpoq.
Naammaginninnginnermik takutitsisut
Naleqqameersut Inatsisartut illorsuanniikkaluartut Atassummeersup Bentiaraq Ottosenip oqaatigaa.
Jens Napãtuup Inatsisartut ataatsimeeqataasut ikippallaarnerarlugit siullermeerluni isornartorsiuilinngilaq.
Aamma juunimi assingusumik isornartorsiuivoq.
Taasisoqartussaatillugu Inatsisartunullu ilaasortat 16-it najuunngikkaangata, aggeqquneqartartut, Inatsisartut siulittaasuat Kim Kielsen, juunimi isornartorsiuinermut akissuteqarluni Sermitsiaq.AG-mut oqarpoq.
Aamma marlunngormat siulittaasutut atuuttoq, Vivian Motzfeldt arlaleriarluni taamaaliorpoq.
- Aammaarlunga kaammattuutigeqqissavara inersuarmiinngitsut maanngaqqullugit, Vivian Motzfeldt oqarpoq.
Naalakkersuisoqatigiinniillu ikippallaartut najuuttarnerannut naammaginninnginnermik Naleqqamit takutitsiniarlutik ataatsimiittarfimmukanngitsut, Jens Napãtôk’ oqarpoq.
- Naalakkersuisuutitaqartut 21-uvusi 16-iuniaritsi. Uagut isumalluutaajuaannarsinnaanngilagut. Taamaammat naalakkersuisut angalaqattaarnerujussuat ataatsimiititalianut peqataanngitsorparujussuit maannakkut naammagittaalliulaarluta takutipparput, suleriuserput malinneqartariaqarmat. Takkunnianngillat taanna pillugu, Jens Napãtôk’ oqarpoq.
Taamaasilluni Inatsisartuni marlunngormat taasissutigisassat arlallit kinguartittariaqalerput.
"Pinnguartarfiunngilaq"
Naleqqakkullu taamaaliornerat naalakkersuisoqatigiinnit Inatsisartullu siulittaasoqarfiannit sakkortuumik isornartorsiorneqarpoq.
- Pinnguartarfiunngilaq manna inersuaq. Taamaammat suliassagut utaqqimmata, massakkullu taasinissatsinnut aporfeqaratta, suliagut ingerlaqqissinnaanngimmata, taasissutissaanngitsunut ingerlaqqissasugut kaammattuutigissavara, Vivian Motzfeldt oqarpoq.
Aamma illuatungiliuttut taasisinnaasut 16-iunissaannut qulakkeerinninnissamut pisussaaffeqartut ilaatigut oqaatigineqarpoq.
Aamma ilaatigut, Atassutip siulittaasua Aqqalu Jerimiassen ataatsimiinnerup taamaalinerani angalasoqartarnera nalinginnaasuusoq oqarpoq.
Suleqatigiissinnaannginneq uggornartillugu Demokraatineersoq, Pipaluk Olsen oqarpoq.
Vivian Motzfeldtillu pisoq ima oqaasertalerpaa.
- Oqaatigilara, uanga ukiorpassuarni tamaaniinnerni taamaattumik nalaataqanngisaannarsimavunga. Demokratii ataqqillugu illuatungiliuttuugaanni naalakkersuisoqataagaanniluunniit suliassaq tamaani inersuarmi ataqqinartumik naammassineqartarmata. Aatsaavissuaq misigaara, Vivian Motzfeldt oqarpoq.
Tusagassiuutinut arlalinnik nalunaaruteqartoqarpoq. Naalakkersuisoqatigiit akisussaaffimmik tigusisariaqartut Naleqqamit allapput.
Naleqqakkut pisussaaffimminnik sumiginnaasut, Inatsisartut siulittaasoqarfiannit allapput.
Malitassanillu ilungersunartumik sanioqqutsisut naalakkersuisoqatigiit ataatsimoorussamik nalunaaruteqarlutik allapput.
