Aatsitassarsioqatigiiffik Kalaallit Nunaannut Kuannersuarni suliami sakkortuumik isornartorsiuisoq

Kalaallit Nunaata Australiamiullu aatsitassarsioqatigiiffiata Energy Transition Mineralsip (ETM) Kuannersuarni saviminernik qaqutigoortunik aatsitassanillu piiaasinnaatitaanerat ukiut sisamat sinnerlugit isumaqatigiinngissutigaat.

Naalakkersuisullu suliamut akissuteqarlutik allagaat marlunngormat tunniunneqartussaagaluartut, aalajangiinissaq kinguartinneqaqqittussanngorpoq.

ETM-imit oqaatigineqartoq naapertorlugu, Naalakkersuisut akissutiminnik sapaatip-akunnerini arfineq-marluk qaangiutsinnagit  tunniussinissaminnut periarfissinneqarumasimapput.

Akissutip – naammassereersup – naalakkersuisunit akuerineqarnissaanut qallunaatuumit kalaallisut nutserneqaqqaartariaqarnera tunngavilersuutaavoq.

Naalakkersuisut tamanna decembarip 15-ianni kingusinnerpaamik pisinnaassangatippaat.

'Akornusersuineruvoq'

ETM-ip tusagassiuutinut nalunaarummini oqarnera naapertorlugu, Naalakkersuisut taakkualu eqqartuussissuserisui danskit nutserisoqarnissaanik suli isumaginninngissimanerat paasisinnaanngilaat.

Pisortaaneq Daniel Mamadouip oqarnera naapertorlugu tamanna suliap suliarineqarneranik kinguartitsiniarneruvoq.

- Taamaattumik tamatumunnga akerliliissuteqarluta eqqartuussivimmut suliassanngortitsivugut, naatsorsuutigaarpullu suliamik kinguartitsiniarsarineq tamanna eqqartuussivimmit itigartinneqarumaartoq, taanna oqarpoq.

- Suliaq eqqartuussivimmit suliarineqarneranut tunngassuteqarunnaarpoq. Akornusersuineruvoq tamannalu ETM-ip Kalaallit Nunaannit, suliap sapinngisamik sivisunerpaamik kinguartinneqarneratigut, anisinniarneqarneranik ersersitsivoq. Suliarput saqqummiupparput, suliarineqarnissaalu piareersimaffigaarput, taanna oqarpoq.

ETM-ip nammineq paasissutissaatai naapertorlugit, ETM Kuannersuarni saviminernik aatsitassanillu nalilinnik ujaasinissamut akuersissummik pissarsinermi kingorna, 1 milliardit koruunit sinnerlugit 2007-imili aningaasartuutigai.

Kalaallit Nunaata ETM-illu isumaqatigiinngissutaat tassaavoq ETM-ip saviminernik taakkuninnga piiaasinnaatitaanera ilumoornersoq.

Kalaallit Nunaanni uranitalinnik akulinnik piiaanissaq 2021-mi inerteqqutigineqarpoq - soorlu Kuannersuarnut tunngatillugu taama pisoqartoq.

ETM-ip tassunga atatillugu milliardilikkaanik taarsiivigineqarnissani pisinnaatitaaffiginerarpaa, inatsit nutaaq naapertorlugu, misissuinissaq siunertaralugu piiaaffiliorsinnaajunnaarnerarami.

Ritzau