Kalaallit eqqumiitsuliortut Eqqumiitsuliornermut Aningaasaateqarfimmut tassanngaannartumik angalanissamut tapiissutinik qinnuteqarsinnaanngorput

Eqqumiitsuliornermut Aningaasaateqarfiup Air Greenland aamma NAPA suleqatigalugit eqqumiitsuliortunut nukingernartumik angalaniartunut aningaasaliissuteqartarnissamik ukiuni pingasuni atuuttussamik isumaqatigiissuteqarput.

Eqqumiitsuliornermik Aningaasaateqarfik tusagassiuutinut taama nalunaarpoq.

Taama periarfissaqalerneq Kalaallit Atuakkiortut peqatigiiffianni siulittaasup Juaaka Lyberthip isumassarsiatsialaanerarpaa:

- Tassa isumassarsiatsialaavoq. Isumaqarpunga taanna qangarsuarli pisariaqarsimasoq aamma pisariaqartinneqarsimasoq. Kisianni massakkut piviusunngulermat qujarunnarpoq, taanna oqarpoq.

Eqqumiitsuliortut Eqqumiitsuliornermut Aningaasaateqarfimmut ukiumut sisamariarlutik siornatigut qinnuteqarsinnaapput, kisianni qinnuteqaat piffissaalluarallartillugu nassiuttussaallugu. Eqqumiitsuliornermik Aningaasaateqarfiup siulittaasua Jacob Froberg tusagassiuutinut nalunaarummi nassuiaavoq:

- Amerlasuutigut nunatsinni eqqumiitsuliortut nunatta nammineq iluani aamma nunani allani peqataanissamut killilersorneqartarput, qinnuteqarnissamut periarfissat pitussimasarmata piffissanut aalajangersimasunut, piffissanilu sivisuuni suliarineqartarnerannut, taanna oqarpoq.

Maannali qinnuteqarunik ukioq kaajallallugu piffissap sivikitsup iluani akissutisisinaalerput.

Nunatsinni najugaqartut salliutinneqarnissaat kissaatigineqartoq

Air Greenlandip pisortaanerata Jacob Nitter Sørensenip eqqumiitsuliornikkut kulturitsinnik nittarsaaniartunut aningaasaleeqataanertik tulluusimaarutigalugu tusagassiuutinut nalunaarummi aamma oqarpoq.

- Eqqumiitsuliortortagut peqataanissaminnut periarfissaqaleraangamik soorlu saqqummersitsinerni, festivalini aammalu suliassatigut attaveqatigiiffinni tamanna nutaanik attaveqarsinnaalernermut aammalu oqaluttuatta nunarsuatsinni sumiiffinnut allanut apuunneqarsinnaalernerannik aqqutissiuussissaaq.

- Taamaammat angalanernut aningaasaliissutissanik immikkoortitseqataanerput tulluusimaarutigaarput, Jacob Nitter Sørensen oqarpoq.

Eqqumiitsuliornermut Aningaasaateqarfik aamma Air Greenland tamarmik immikkut ukiuni pingasuni ukiumut 300.000 koruuninik aningaasaliissuteqarput NAPA-lu 50.000 koruuninik tapiissuteqarluni.

- Aningaasarpassuit immikkoortinneqartut takusinnaagakku taavalu qinnuteqarnermi ullut tallimat ingerlaneranni akissutisisinnaalluni, periarfissatsialaavoq atorluaqqunaqaaq eqqumiitsuliornermut kulturimilu suliaqartunut tamanut, Juaaka Lyberth taama oqarpoq nangillunilu:

- Neriuutigivara una aningaasat taakkua eqqumiitsuliornermut kulturimillu suliaqartunut nunatsinni najugaqartunut atorneqarnerussasut tassami kalaallit Danmarkimiittut periarfissarpassuaqarmata allami Danmarkimi najugaqarnertik pissutigalugu.

- Taamaattumik nunatsinni najugaqartut salliutinneqarnissaat soorunami kissaatiginassaaq.

Eqqumiitsuliortut angalanissaminnut aningaasaliiffigineqarnissamut maanna qinnuteqarsinnaalereerput.