Malene Vahl: Imigassamik nioqquteqarnerup ammaqqinnissaanut pilersaaruteqartoqanngikkallarpoq

Kommune Kujalliup imigassamik nioqquteqarnernik tamanik unitsitsigallarniarluni tallimanngornermi unnukkut aalajangernera innuttaasut isumannaatsuunissaannut meeqqallu atugarissaarnissaannut tunngassuteqarpoq.

- Maannali pissutsit uunga killissimapput iliuuseqarnissaq allaqqunneqarsinnaajunnaarsimalluni, kommune tusagassiuutinut nalunaarummi allappoq.

Aalajangiineq pisariaqartoq, Kommune Kujallermi borgmesteri, Malene Vahl Rasmussen (D) KNR-imit apersorneqarnermini oqarpoq.

- Meerartagut illersussagutsigit killiliisariaqarpugut, massakkullu imigassamik matusigallarnerput meerartatsinnut illersuineruvoq, Malene Vahl Rasmussen oqarpoq, nangillunilu:

- Imigassamik atueriaatsip nuanninngitsumik avatangiisinut sunniuteqartartut uniinnarluta isiginnaaginnarsinnaanngilagut, inuiaqatigiinnilu nuanninngitsumik pisoqaqqinnissaa utaqqiinnarlugu.

Imigassamik nioqquteqarnerup unitsinneqarnerata kingunerisaanik inuit arlallit ajornartorsiutiviit imigassamik inerteqquteqaannarluni aaqqiivigineqarsinnaanngitsut oqaatigaat.

Kommune Kujalliullu inerteqquteqarneq nutaaq imigassamik ajornartorsiuteqarnermut akiuiniarnermut alloriarnermi siulliuinnartoq aamma oqaatigaa.

- Massakkut pisut erngerlugit iliuuseqarfigisariaqarput, ungasinnerusumulli aamma isigisariaqalersippaatigut                         

Atorunnaarsitsinissamut suleqatigiittoqartariaqartoq

Naalakkersuisut imigassamik tuniniaanermut matusineq pillugu tusagassiuutinut nalunaarutigisaanni “imigassamik aalakoornartortalinnik atuinerup toqqaannartumik kingunerisai” inerteqquteqalernermut pissutaasut allassimavoq.

- Piffissaq kingulleq ilungersunartunik pisoqaqattaarnerata kingorna, sapaatip akunnera kingulleq naalluinnartoq taakkua Nanortalimmi pisut aallaavigalugit innuttaasut noqqaassuteqarnerat aamma uanga isumaqatigigakkit, kommunalbestyrelsimi ilaasortakka tusarniarsimavakka, Malene Vahl Rasmussen KNR-imut oqarpoq.

Inuit sisamat angut 37-nik ukiulik, sisamanngornermi unnukkut toqungasoq siumorneqartoq pillugu toqutsisimasutut pasineqarlutik Eqqartuussisoqarfik Kujallermi tallimanngornermi unnukkut sassartinneqarput.

Imigassamik inerteqquteqalernermut pissutaasut ilaat tamakkuusut, Malene Vahl Rasmussenip oqaatigaa.

Malene Vahl Rasmussenip imigassamik nioqquteqarnermut unitsitsinissaq kommunip naalakkersuisunut tallimanngornermi qinnutigigaa aamma oqaatigaa:

- Suliaq taanna pillugu Naalakkersuisoqarfimmut saaffiginnissuterput ualip naajartuaarnerani nassiupparput.

Taassuma inerteqquteqarnermik atorunnaarsitsinissamut qaqugu pilersaaruteqartoqassanersoq ullulerusunngilaa.

- Ullulernikuunngilarput qaqugu ammarneqassasut. Massakkut ukua suliniutit weekendimi aallartisarpagut, allorfik suleqatigalugu. Naalakkersuisoqarfik qanimut massakkut suleqatigivarput. Ilaatigut katsorsaaviit aamma allorfiit ammarnissaat suliniutigineqarpoq, qujanartumillu aamma weekendimi ammapput.

Borgmesterip imigassamik nioqquteqarnerup sassaalliuteqarsinnaanerullu qanoq sivisutigisumik atuunnissaanut innuttaasut apeqqutaasut aamma oqaatigaa.

- Taakku suleqataasussaapput. Suliffeqarfiit suleqataasussaapput. Qinikkat suleqataasussaapput. Naalakkersuisoqarfik suleqataasussaavoq. Suleqatigiinnerput qanoq pitsaatiginersoq qanorlu takutitsinersut aamma tassani nalilersuutaasussaapput, Malene Vahl Rasmussen oqarpoq.

Oqaloqatigiinnissamut ammaassissasoq

Kommune Kujalliup imigassamik nioqquteqarnermik inerteqquteqarneq innuttaasunut suliffeqarfinnullu akisussaasunut eqqortumik eqquillunilu eqquinerluttoq nassuerutigaa, iliuuseqarnissarli pisariaqartinneqarpoq.

- Imigassamimmi atuineq tamatumalu kinguneri annertuallaalerpata inuit ataasiakkaat kisimik pilliuteqarneq ajorput. Innuttaasut pilliutaasarput ilaqutariit pilliutaasarput Inuiaqatigiit pilliuteqartarput. Ajornerpaamillu, meeqqat annerpaamik pilliuteqaleratarsinnaapput, kommune allappoq.

Ajornartorsiutaasulli ammasumik oqaloqatigiissutiginerulersinneqarnissaa neriuutigaat:

- Pisorli (imigassamik inerteqquteqarneq aaqq.) oqallinnermik itineroqisumik kinguneqartariaqarpoq uagut inuiaqatigiittut suna akuerisinnaaneripput, tamatta immikkut sunik akisussaaffeqarnersugut, kiisalu qanoq allannguisinnaanersugut.

Qaqortumi, Narsami Nanortalimmilu innuttaasunut ataatsimiititsinissamut aggersaasoqarpoq, tassani imigassamik ajornartorsiuteqarnerup qanoq qaangerneqarsinnaanera oqallisigineqassaaq.

- Kommunitut suna pitsaanerusumik suliarisinnaavarput? Ilaqutariit nunaqqatigiillu qanoq iliorsinnaappat? Meerartavut qanoq pitsaanerusumik illersorsinnaavavut? Pitsaaliuineq qanoq pitsanngorsassavarput? Kiisalu qanoq inerisaassaagut akuliunnerit sakkortuut massakkutut ittut pisariaqarunnaassappata?, kommune oqaluuserineqartussat pillugit allappoq.

Qaqortumi innuttaasunut ataasinngornermi ualikkut ataatsimiititsisoqassaaq, Kommune Kujalliullu nunaqarfiit aaqqiissutissat pillugit oqallinnermut ilanngutitinneqarnissaat naatsorsuutigaa.