Imigassaq siusinnerusukkut inerteqqutigineqarpoq – kingornali atuisoqarnerulerluni

Nunatsinni imigassamik atuineq killilersuinikkut inerteqquteqarnikkullu killilerniarneqarnikuuvoq. Pisiniarfinni matoqqatitsinernit annerusumik pilersaarusiortoqarniarpoq.

Allattoq Markus Valentin

oktobarip 05-at 2026 17:31

Nutserisoq Connie Fontain

Kommune Kujallermi tamarmi imigassamik nioqquteqarneq tallimanngormat piffissaligaanngitsumik matuneqarpoq.

Politikerilli imigassamik atuivallaarnermik ajornartorsiutinik aatsaat siullermeertumik aaqqiiniarsarinngillat.

Imigassamik aalakoornartortalimmik inerteqquteqarneq nuna tamakkerlugu atuutilersitsinissaq Namminersornerullutik Oqartussat aallartinneranilli 1979-imi siunnersuutigineqarpoq.

Aamma atuaruk Malene Vahl: Imigassamik nioqquteqarnerup ammaqqinnissaanut pilersaaruteqartoqanngikkallarpoq

Tamannali itigartitsissutigineqartoq, Ujammiugaq Engell oqarpoq. Taanna oqaluttuarisaanermik ilisimatusartoq Nuutoqqamilu aqutsisuuvoq.

- Taarsiullugulu killilersuinissamik siunnersuusiortoqarpoq, taannalu erngertumik akuersissutigineqarluni. Taamaammat 1979-imi aggustimi pointilersuineq atuutilersinneqarpoq.

Unioqqutitsisumik nioqquteqarneq

Oqaluttuarisaanermik ilisimatusartup pointilersuisarneq atuutilersinneqarmat unioqqutitsisumik nioqquteqarneq angerlarsimaffimmilu immiortarneq aallartinneqarput.

Tamanna ilaatigut pissutigalugu aaqqissuussineq 1982-imi atorunnaarsinneqarpoq.

Inerteqquteqarneq tallimanngormat atulersinneqarmat Facebookikkut unioqqutitsisumik nioqquteqarneq aamma aallartinneqarpoq.

Imigassat qapuaqqallu akisuunngortillugit tassani tuniniarneqalerput.

Saqqummersitami ataatsimi qapuaqqat poortat ataatsit 250 koruunilerlugit tunineqarput.

Imminut toqunnissamik eqqarsaateqarninni ikiorneqarnissannik pisariaqartitsivit?

Kiserliorpit aamma oqaloqateqarnissannik pisariaqartitsivit?

Kisimiinngilatit. Piffissani inuunermi pisumiluunniit artornartorsiorfimmi, nammineq sapikkaminnik pisoqaraangat, inuit amerlanerpaat tusaaneqarnissartik pisariaqartittarpaat.

Tusarnaarnissamut piffissaqarpugut. Tusaanngap siunnersortai tusarnaartarput, ilungersuutivillu oqaasertalernissaanut ikiorsinnaallutit. Aamma illit inuuninni pissutsit artornartut qanoq iliuuseqarfiginissaanut sakkussannik tunisinnaavaatsit.

Oqarasuaatikkut siunnersuisarneq tassaavoq kinaassutsimik isertuussilluni illit siunnersuisullu akornassinni inuttut oqaloqatigiinneq, tassani oqaloqatigiinnerup imaa illit aalajangissavat.

Meeqqat, inuusuttut inersimasullu tamarmik oqaloqateqarnissamik allaqateqarnissamilluunniit pisariaqartitsisut Tusaannga attavigisinnaavaat. Tusaanngamut attaveqarneq kinaassutsimik isertuussisinnaaffiuutigaluni akeqanngilaq – aamma Tusassit imaqanngikkaluarpalluunniit sianersinnaavutit allallutilluunniit.

Telefon: 80 11 80

SMS: 1899

Tusarfik: Tusaannga

Inerteqquteqarnerup kingorna atuisoqarnerulersoq

Anette Nicolaisen Tasiilami ukiuni kingullerni qulini najugaqarpoq. Tasiilami imigassaq ukiut ingerlaneranni inerteqquteqarluinnartoqartarpoq.

Imigassanik 15 procentit sinnerlugit aalakoornartortalinnik tuniniaaneq ullumikkut suli inerteqqutigineqarpoq.

- Matoqqatitsisoqarneratigut allanngortoqanngilaq. Ikinnerusunik immiaarartortoqanngilaq, meeqqanik pilluarnerusoqalinngilaq, imminullu toquttut ikinnerunatik.

Aamma atuarukSiorna imigassaqarnerusoq: Naalakkersuisut imigassamut politikkissaat utaqqineqartoq

Anette Nicolaisenip Tunumi misilittakkat tunngavigalugit Kommune Kujallermi inerteqquteqarneq atorunnaarsinneqarmat ernguttoqarneruliinnarnissaat ilimagaa.

- Ikinnerusunik immiaarartortoqarnavianngilaq. Ernguttoqarneruliinnassaaq, tamannalu meeqqanut pitsaasuunani.

Ujammiugaq Engellip oqarnera naapertorlugu killilersuilluni nioqquteqarnerup nalaani imigassamik aalakoornartortalimmik atuineq apparpoq. Taannali atorunnaarsinneqarmat imertoqarneruleqqippoq.

- Oqaluttuarisaaneq eqqarsaatigigaanni imigassamik aalakoornartortalimmik atuinerup nalunaarsorneqarnerani killilersuinermi atuinikinnerusoqalernera killilersuisoqarunnaarneranilu atuisoqarnerulingaatsiaqqinnera soqutiginarpoq, Ujammiugaq Engell oqarpoq.

IMIGASSAQ PILLUGU UKIUNI ARLAQARTUNI POLITIKKISSAMUT INASSUTEQAATIT

Imigassamik aalakoornartortalimmik kisermaassineq pisortanit ingerlanneqartoq eqqunneqarli.
Kommunini tamani suliassaqarfimmik ilisimasalinnik akuersissutinik tunniussinissamik aalajangiisartunik pilersitsisoqarli.
Imigassamik aalakoornartortalimmik tuniniaanermut aamma sassaalliinermut piffissat killilerneqarlik.
Ukiunik killiliineq 21-nik ukiulinnut qaffanneqarli, taannalu atuutsillugu.
Piseqqusaaruteqarnissamik inerteqquteqarneq eqqunneqarli
Akikinnerpaaffissaliinissaq siunertaralugu akinik misissuineq.
Akinik nakkutilliineq.
Akitsuutinik ukiumoortumik nalimmassaasarneq eqqunneqarli.
Ilaqutariinnut tamanut ilaqutariinnik tapersersuineq - pingaartumik meeqqap ulluini siullerni 1000-ini.
Misissuineq, sivikitsumik akuliuffiginninneq aamma katsorsarneqarnissamik innersuussineq.
Kingunerlutsitsineq - aamma imigassaq aalakoornartortalik pillugu katsorsarneqarsinnaaneq aamma paasititsiniaaneq nakussassarneqarlik.
Ilaqutariinnut sammisassaqartitsisarnerit aamma naapittarfiit imigassamik aalakoornartortalimmik ilaqanngitsut.
Meeqqanut aamma inuusuttunut sammisassaqartitsisarnerit aamma naapittarfiit imigassamik aalakoornartortalimmik ilaqanngitsut.
Meeqqat atuarfiini aamma inuusuttut ilinniarfiini ataatsimoorfiit imigassamik aalakoornartortalimmik ilaqanngitsut.
Imigassani aalakoornartortalinni allagartalersuutit peqqissutsimut tunngasunik paasissutissartallit.
Paasititsiniutinik ineriartortitsineq.
Inassuteqaatinik ingerlatitseqqinnissamut aningaasaliinissamik qulakkeerinninnissaq.
Paasissutissanut aamma nalilersuinermut aningaasaliinissap qulakkeerneqarnissaa.

Paasissutissarsiffik: Naalakkersuisut - Imigassaq aalakoornartortalik pillugu ukiunut arlalinnut politikkissamut, ilisimatusarnermit tunngavilimmut, inassuteqaatit 2025

Allisiguk

Iliuusissatut pilersaarut amigaataasoq

Anette Nicolaisenip nunatta kujataani maannakkut inerteqquteqarnerup Tunumilu siusinnerusukkut inerteqquteqarnerit imminnut assingulluinnarneri takusinnaavai.

- Tasiilami, massakkutulli amerlasuut inerteqquteqarneq nuannaarutigaat. Tamanna ajunngilluinnartuusoraat. Uanga taama isumaqanngilanga.

Taassuma oqartussat tuniniaanermik matusiinnaratik ilisimasanik tunngaveqartumik iliuusissatut pilersaarusiornissaat kissaatigaa.

Aamma atuaruk Naalakkersuisoq: Pissutsit ilungersunangaartut – imigassamik killilersuinerit suli eqqartorneqanngitsut

Naalakkersuisut nuna tamakkerlugu imigassamut politikki nutaaq pillugu nalunaarusiaq 18-inik innersuussuteqartoq siorna oktobarimi saqqummiuppaat.

Naalakkersuisuniilli iliuusissatut suli pilersaarusiortoqaranilu inatsimmut suli allannguisoqanngilaq.

Anette Nicolaisenip Naalakkersuisut iliuusissatut pilersaarummi suli suliaqannginnerat meeqqanik, inuussutissarsiutinik eqqugaasorpassuarnillu sumiginnaanertut isigaa.

- Ukioq ataaseq maanna qaangiuppoq politikerillu suli suliaqaratik. Naak innersuussutit ilaat iluaqutaalluarsinnaagaluartut.

- Tamanna politikerinit sumiginnaanerujussuusoraara.

Kommune Kujalleq tusagassiuutinut sapaatiummat nalunaaruteqarpoq. Iliuusissatut pilersaarutissap qanoq ilusilerneqarnissaa pillugu innuttaasunut ataatsimiititsisoqarumaartoq kommune allappoq.

- Matoqqasoqarnerata nalaani meeqqat uku qanoq iliuuseqarfigineqassappat? Angajoqqaat inerteqquteqarneq atorunnaarsinneqarpat imileqqissapput, Anette Nicolaisen oqarpoq.