Ilisimatusartoq Trumpip aallartitaa pillugu: - Pissutsit ilungersunartorujussuupput
Donald Trumpip “Kalaallit Nunaata pigilernissaa aqussinnaalernissaalu pisariaqarluinnartutut” oqaatigineranit ukioq ataasinngortorlu Amerikamiut præsidentia tupaallatsitseqqippoq.
USA-mit “immikkut aallartitaq” Kalaallit Nunaannut aallartikkumaarlugu ataasinngornerup unnuaani nalunaarutigigamiuk taamaaliorpoq. Jeff Landry 54-inik ukiulik, Louisianami guvernøriusoq pineqarpoq.
Rasmus Sinding Søndergaard, Danmarkimi Nunat Tamalaat pillugit Ilisimatusarfimmi Amerikamiut nunanut allanut politikkiannik ilisimatusartoq, aallartitaq immikkut ittoq immikkut illuinnartumik oqariartuuteqarnerusoq isumaqarpoq.
- Donald Trumpip Kalaallit Nunaannik aqutsilernissaq pillugu kissaateqarnermini pimoorussilluinnarneranut Kalaallit Nunaannut Danmarkimullu takutitsiniaaneruvoq. Tamanna suliamut aningaasaliisoqarneranut aamma nammineq soqutiginninneranut takussutissaavoq, taanna oqarpoq.
USA nunarsuarmi arfineq-marlunnik immikkut aallartitaqarpoq. Taamaalilluni Kalaallit Nunaat USA-p immikkut aallartitaqarfissamisut pingaarnerpaatitaasa ilagaat.
- USA-p præsidentiata piffissani nukinilu assigiinngitsorpassuarnut atorsinnaavai, Kalaallit Nunaalli pingaarnerpaatinniarpaa, Rasmus Sinding Søndergaard oqarpoq.
Kalaallit Nunaat USA-mut ilanngunniaraa
Jeff Landryp toqqagaanini qujaniutigalugu inuit attaveqaqatigiittarfiatigut X-ikkut allappoq, "Kalaallit Nunaata USA-mut ilanngunnissaa“ anguniarlugu suliakkerneqarnini nuannaarutigalugu.
Tamanna pissutigalugu naalakkersuisut siulittaasuata Jens-Frederik Nielsenip (D) ministeriunerullu Mette Frederiksenip Kalaallit Nunaata kalaallinit pigineqarnera, ataatsimoorlutik avammut nalunaaruteqarnerminni erseqqissaassutigeqqippaat.
Nunani akerleriissuteqartuni illuatungeriit akornanni isumaqatiginninniarnernik suliaqartussamik immikkut aallartitsisoqakkajuttarpoq.
Taamaattumik immikkut aallartitap Kalallit Nunaanni suna suliassarinerpaa?
- Kalaallit Nunaata USA-mut ilanngunnissaa qilanaaralugu Jeff Landryp nammineq oqaatigaa. Taamaattumik paasisariaqarparput tamanna suliassarigaa, Rasmus Sinding Søndergaard oqarpoq nangillunilu:
- Politikerinik inunnillu inuussutissarsiornerup tungaatigut ingerlataqartunik ataatsimeeqateqarniarluni, Trumpillu anguniagaanut naalakkersuisunut naleqqiullugu ammaffiginninnerusunut attaveqalerumalluni Kalaallit Nunaannut qanittumi tikeraarnissaa naatsorsuutigineqartariaqarpoq.
Pissutsit ilungersunartut
Naalakkersuisut danskillu naalakkersuisuisa, Trumpip Kalaallit Nunaata USA-mut ilaasariaqarneranik oqaaserisai ukiup ingerlanerani arlaleriarlutik akerliliiffigisarpaat.
USA-p præsidentiata oqaasii pissutigalugit nunatsinni akerliussutsimik takutitsinerit annersaraat Nuummi upernaaq pivoq. Erfalasorput allagartaliussallu angisuut tigummiutigalugit akerliussutsimik takutitsisut oqariartuutaasoq erseqqissarpaat: Kalallit Nunaat kalaallit pigivaat.
USA-p Danmarkimi aallartitaa Ken Howery aamma nunanut allanut tunngasunut ministeri Vivian Motzfeldt (S) ataqqeqatigiinnermik suleqatigiinnermillu pilersitsinissaq pillugu sapaatit-akunnialuit matuma siorna oqaloqatigiissuteqarput. Joint Committee Nuummi ukioq manna ingerlanneqartumut atatillugu taakku ataatsimeeqatigiipput.
Tusarliussalli tamanna immikkut ittumik aallartitamit maanna nipangersinneqartutut ittoq, Rasmus Sinding Søndergaard isumaqarpoq
- Naalagaaffeqatigiinnermut, Kalaallit Nunaannut Danmarkimullu ilungersunartorujussuuvoq. Donald Trumpip Kalaallit Nunaannik soqutiginninnini pimoorukkaa maanna uppernarsineqarpoq, aamma Trumpip naalakkersuinissamik pilersaarutai pimoorunneqarniarsarineqaleqqittut, ilisimatooq oqarpoq.
Naalakkersuisut siulittaasuata Jens-Frederik Nielsenip (D) innuttaasut toqqissisimasariaqartut ataasinngornermi oqariartuutigaa.
- Siunissarput nammineerluta sanarfissavarput. Tamat oqartussaaqataanerat nammitsinnik pigisarput, aalajangiisinnaaneq nammineq pigisarput aammalu ataatsimoorneq nukittooq nikisitassaanngitsoq. Kalaallit Nunaat uagut pigaarput, killeqarfippullu ataqqineqassaaq.
- Ernumassuteqarnissamut pilersitsissanngilaq. Ataatsimoorpugut nikisitassaanatalu, tusagassiuutinut nalunaarummi oqarpoq.
