- Tamanna Kalaallit Nunaannut kalaallinullu inunnut ataqqinninnginnermik takutitsineruvoq.

Amerikamiut præsidentiat Kalaallit Nunaannut immikkut aallartitaqalerniartoq pillugu ullormut nutaarsiassaasumut, IA-p folketingimi ilaasortaa Aaja Chemnitz naatsumik erseqqissumillu oqarpoq.

USA-p præsidentiata Trumpip Louisianami guvernøri Jeff Landry 54-inik ukiulik, USA-p Kalaallit Nunaannut aallartitanngortippaa. Landry “Kalaallit Nunaata USA-mut ilanngunnissaa”-nut suleqataanissani qilanaaralugu inoqatinut attaveqaammi X-imi allappoq. 

- Trumpi Præsidentip Illorsuaniikkallartillugu suliaq tamanna ingerlaavartuartussaassasoq erserpoq. Nammineq aalajangiisinnaanitta ukiorpassuarni sorsuutiginikuusatta attatiinnarnissaanut  akiuuttuartariaqarnissatsinnut uagutsinnut pingaaruteqaqisumut, piareersimasariaqarpugut, Aaja Chemnitz oqarpoq.

Landryp oqaaserisaa pillugu Naleqqamiit folketingimut ilaasortaq Aki-Matilda Høegh-Dam qanoq eqqarsaateqarnersoq aperineqarami anersaammerpoq. Aammali: 

- Kalaallit Nunaat tuniniagaanngilaq. Immikkut aallartitaq Kalaallit Nunaanni suliffeqarfinni tamat oqartussaaqataanerannut ataqqinninneq naapertorlugu atuuffimmini iliuuseqarnissaa naatsorsuutigaara. Atuuffimmi iliuutsit pissusilersornerillu pingaartuupput, taamaattumik kalaallit tamanna kissaatigisarinngikkaat misigiumaaraa naatsorsuutigilluinnarpara, taanna oqarpoq. 

Uaguinnaavoq aalajangiisussat 

USA Kalaallit Nunaannut immikkut aallartitamik atorfimmik siullermeerluni pilersitsivoq. Troy J. Bouffard DR-imut taama oqaluttuarpoq. Taanna assistant professoriuvoq, Center for Arctic Security and Resilience University of Alaskami Fairbanksimi pisortaalluni, aamma Amerikamiut sakkutuut ilinniarfianni - Modern War Institutemi ilisimasorsuartut atorfeqarpoq. 

- Kalaallit Nunaannut immikkut aallartitamik toqqaannartumik oqaluttuarisaanermi siuleqanngilaq, tamannalu guvernøritut atorfilimmik siullersaavoq, Troy J. Bouffard DR-imut oqarpoq.

Immikkut aallartitaq immikkoortuuvoq USA-p soqutigisaanik kalerrisaarisoq. Aallartitalli allat amerlanerit sorsuffinniipput allatigulluunniit aaqqiagiinngissuteqarfiusuniillutik.

Taamaakkaluartoq Kalaallit Nunaanniittoqalernissaattaaq Aaja Chemnitzip tupaallaatiginngilaa.

- Akiuunnissarput aamma kalaallit inuiaat siunissaat qanoq ittuutikkusunnerlugu kissaatigut erseqqissumik nalunaarutigiuarnissaat pingaaruteqarpoq. Siunissarmi qanoq ittoq atorumaarnerlugu uaguinnaavoq aalajangiisussat, tassa Kalaallit Nunaat pineqartillugu nammineq aalajangiisinnaanerunissaq, taanna oqarpoq.

Taamaammat Kalaallit Nunaannik soqutiginninnerup, danskit Naalakkersuisuisa ukiup ingerlanerani takutitaat, attanneqaannarnissaa pillugu kimigiisertuarniarpoq.

- Maannamut takoriikkatsinniit pilersitsinerit amerlanerusut qulakkeerneqartuartarnissaat pingaaruteqarpoq, Aaja Chemnitz oqarpoq. 

Ataatsimeeqataaneq

Unnuaq pisup kingorna danskit nunanut allanut ministerip Lars Løkke Rasmussenip, Amerikap aallartitaa Ken Howery Nunanut Allanut Ministereqarfimmi oqaloqatiginiarlugu aggersarpaa. TV 2 Newsimut taanna oqarpoq.

Oqaloqatigiinnerlu taanna pillugu Aki-Matilda Høegh-Dam erseqqissaavigineqarnissaminik neriuuteqarpoq.

USA-p Danmarkillu akornanni pisoq, tassa kalaallit politikerit oqaloqatigiinnerit pillugit paasitinneqarnerusariaqaraluartut pingaartuusoq taanna isumaqarpoq.

- Ernummateqaruma tassaavoq, Kalaallit Nunaata peqataanissaanik piumasaqaatitaqarluni oqaloqatigiinneq oqaatigineqartumit malunnarneruppat. Sukkasoorujussuarmimmi imaalisoqarsinnaavoq, tassa – tusagassiuutit aqqutigalugit avataaniit pinnani – Danmarki oqaloqatigilluartaraluarlugu, USA suleqatigalugu Kalaallit Nunaat pillugu aalajangiisalersinnaasoq.

- Ataatsimeeqataasarnissarput qulakkiissavarput, uagut pineqartilluta oqaloqatigiinnerup qanoq ingerlanneqarnerata ataqqinernissaa piumasaqaatigisinnaagipput, taanna oqarpoq.  

Naalakkersuisut siulittaasuat Jens-Frederik Nielsen (D) aamma ministeriuneq Mette Frederiksen ullumi ataatsimut oqaaseqaateqarput, tassani “ataatsimullu killeqarfitta ataqqineqarnissaa naatsorsuutigalugu” oqaatigeqqimmassuk.