Marlunngorpat qinersisoqarnissaa pissanganassangatinneqarpoq. Aappalaartut tungujortullu naligiingajattut – aappalaartut siuaqqalaarlutik, Danmarkimi isumasiuinerup takutippaa. 

Taamaammat Danmark talerperlerniit saamerlerniilluunniit naalakkersuisuutitaqalissanersoq, nunat Atlantikup avannaaneersut sinniisaat aalajangiisuusinnaasutut inissisimapput. Mette Marie Stæhr Harder, Nunatta Folketingimi qanoq sinniisoqariaaseqarnera, nunanullu Atlantikup  avannaanersut sinniisaannut qanoq sunniuteqarnera pillugu ilisimatusartoq, taama oqarpoq.  

Taamaakkaluartoq Inuit Ataqatigiit Naleqqallu isumaqatigiissutaat ataaseq tassaavoq: Naalagaaffimmik Dansk Folkepartiimik sinniisoqartitsisumik tapersersuinissartik ajornakusoortissavaat. 

Taassuma saniatigut Nunat Atlantikup avannarpasissuaneersut sinniisaat aalajangiinermut sunniuteqarsinnaanerat, danskit politikeriannit piffissap ingerlanerani isornartorsiorneqarpoq. 

- Danskit qinersinissaat qalligaangat, ilumut Danmarkimi qinersinissamut aalajangiisoqarsinnaanera paasiniarniarlugu, Nuummut Torshavnimulluunniit tusagassiortumik tikisitsisarneq soorlu ileqqulersuutinngoqqasoq.  

Taamaakkaluartoq ineriartortoqartoq ilisimatusartup maluginiarpaa, Danmarkimimi partiit atlantikup avannaani qinikkat sunniuteqarsinnanerat ukiut kingulliit ingerlanerini akuersaarneruleriartorsimavaat. 

- Ilaatigut Danmarkimiit Kalaallit Nunaata piunerata qanorlu pingaartiginerata maluginiarneqarnerulersimaneranik periaatsillu tamassuma arlaleriarluni pisarsimaneranik pissuteqarpoq, Mette Marie Stæhr Harder oqarpoq nangillunilu: 

- Amerlanertigulli partiit pissaaneeruteriaannaasut isornartorsiuisarput, Atlantikullu avannaaneersut tapersersortigalugit amerlanerussuteqalersut tamanna ajornartorsiutaanngitsutut isigisarpaat.

Ilaasortaatitaqarneq pillugu qularneq 

Mette Marie Stæhr Harder aperigaanni, Atlantikup Avannaani qinikkat Folketingimi marloqiusamik paasineqarsinnaasumik atuuffeqarput, Danmarkimimi nunamut namminermut tunngasunut akuliukkunik isiginerlunneqarsinnaasaramik. 

- Peqataanissap pingaaruteqassusianik nassuiaaqqaartinnani peqataasinnaatitaanermik tunngavilersueqqaartariaqarneq ilaajunnaarsitsisutut misiginermik pilersitsisinnaavoq, taanna oqarpoq.

Ilaasortat Atlantikup Avannaaneersut sunniuteqarnerat aamma Kalaallit Nunaanni Savalimmiunilu oqallisaaqaaq. 

Politikerit arlallit nunamut namminermut politikki pillugu suliassanut piffissap ingerlanerani akuliunnaveersaartarput. Nunamut namminermut politikki pillugu suliarineqartartut suunersut aamma aperisoqarsinnaasoq, Mette Marie Stæhr Harder oqarpoq.

Tamanna Danmarkip Kalaallit Nunaanni suliassaqarfinnut 30-nut suli akisussaaffeqarneranik pissuteqarpoq. Taamaattumik apeqqutit nunamut namminermut politikkimut tunngasut arlallit aamma Kalaallit Nunaannut attuumassuteqarsinnaasut, tamannalu apeqqummut paatsiveerutsitsisoq, ilisimatusartoq nangippoq.

Kalaallit Nunaanni Savalimmiunilu qinigassanngortittut arlallit Folketingimi ilaasortaatitaqarneq aamma apeqquserpaat. 

Pingaartumik Naleraq Danmarkimi ilaasortaatitaqarneq pillugu piffissap ingerlanerani qulartarpoq. Aamma naalakkersuisoq Naaja Nathanielsen (IA), Folketingimut qinigassanngortittoq, apeqqusiivoq. Kunngeqarfimmi siunnersoqatigiinnik pilersitsinissaq tassunga taarsiullugu taassuma siuunnersuutigaa. 

- Danmarkimi Folketingimut ilaasortanik aallartitsiuarnissarput qularutigaara. Tamanna pillugu oqallittoqarnissaa kissaatigaara, videoliami Facebookimiittumi oqarpoq.