Grønlandsbanken nunatta eqqumiitsulianik saqqummersitsivissaanut tapiissuteqartoq

Nunatta Eqqumiitsulianik Saqqummersitsivissaata piviusunngornissaanut aningaasat pisariaqartinneqartut affaasa missaat suli amigaataapput. Grønlandsbankenilli tapiissuteqarnera aningaasaateqarfiit allat tapiissuteqarnissamik kajumilernissaannut tunngaviusoq, Josef 'Tuusi' Motzfeldt oqarpoq.

Allattoq Helle Nørrelund Sørensen

maajip 23-at 2024 08:44

Nutserisoq Mads Lynge

Grønlandsbanken Nunatta Eqqumiitsulianik Saqqummersitsivissaata piviusunngortinneqarnissaanut 3 millionit koruuninik tapiissuteqarfigaa.

Grønlandsbanken tusagassiorfinnut nalunaarummi taama ilisimatitsivoq.

Nunatta Eqqumiitsulianik Saqqummersitsivissaata 200 millionit koruunit missaannik akeqarnissaa naatsorsuutigineqarpoq, aningaasallu affaasa missaat maanna katersorneqarsimalerlutik.

Aamma atuarukEqqumiitsulianik saqqummersitsivissamut millionit kingulliit ukioq manna pissarsiarineqassaaq

Grønlandsbankenip tapiissuteqarneratigut eqqumiitsulianik saqqummersitsivissap piviusunngorsinnaanissaa taamaasilluni qanilliallappoq. Nunatta Eqqumiitsulianik Saqqummersitsivissaanut siulersuisut siulittaasuat Josef Motzfeldt taama oqarpoq:

- Tapiissutitut tunniunneqartut pilersinniakkap piviusunngornissaanut qanilliallatsiinnanngilaatigut aammali tapiissuteqarneq Danmarkimi nunanilu tamani aningaasaateqarfinnut kalerriineruvoq nunatsinni eqqumiitsulianik saqqummersitsiviliorneq nunatsinni inuiaqatigiinnillu taperserneqarluni tunngavigissaarneranut, Josef Motzfeldt oqarpoq.

Illussanik titartaasarfik BIG, Bjarke Ingels Group, Nunatta Eqqumiitsulianik Saqqummersitsivissaanik titartaasuuvoq, saqqummersitsivissarlu Nuummi inissinneqassalluni.

Saqqummersitsivissaq takornarianut pilerinartuussasoq

Saqqummersitsivimmik ataatsimoorussamik piginnittuunissamut akuersissut Namminersorlutik Oqartussanit aamma Kommuneqarfik Sermersuumit 2022-mi tunniunneqarpoq, taamaalillunilu saqqummersitsivik taakkunannga ingerlanneqassaaq.

Kalaallit eqqumiitsuliaat assigiinngitsut saqqummersitsivissami saqqummersinneqartarnissaat pilersaarutaasoq, tamannalu Kalaallit Nunaata iluaqutigissagaa, matumanilu takornariartitsisarneq ilaalluni, Grønlandsbankenimi pisortaq Martin Kviesgaard oqarpoq.

Nunatta eqqumiitsulianik saqqummersitsivia

Nunatta eqqumiitsulianik saqqummersitsiveqarnissaanut ataatsimiititaliaq 2004-mi pilersinneqarpoq. NunaFondip aningaasaliineratigut 2006-mi januaarimi aningaasaateqarfik pilersinneqarpoq.

Aningaasaateqarfiup ukiuni sisamani aningaasaliivigineqarnissaa aningaasanut inatsimmi 2007-imi ilanngunneqarpoq.

Eqqumiitsulianik saqqummersitsisarfiup isikkussaa ilusissaalu titartaasarfinnut 2010-mi unammisitsissutigineqarpoq. Danskit titartaasarfiat Bjarke Ingels Group ajugaavoq. Titartaasarfiup suliamut suli soqutiginninnera aningaasaateqarfiup paasissutissiissutigaa.

Siulersuisut sulinissaannut Naalakkersuisut 2018-imi 2 millionit koruuninik aningaasaliipput. Inuussutissarsiornermi aningaasaateqarfiit suliniummut 175.000 koruuninik aamma aningaasaliipput.

Namminersorlutik Oqartussat aamma Kommuneqarfik Sermersooq saqqummersitsivimmik ataatsimoorussamik piginnittussaanermut ingerlatsinermullu akuersissummik 2022-mi tunniussipput.

Nunatta Eqqumiitsulianik Saqqummersitsiviata sanaartorneqarnissaanut Inatsisartut 2023-mi 50 millionit koruuninik immikkoortitsipput. Inuussutissarsiornermik ingerlatalik danskeq kinaassutsiminik isertuussisoq saqqummersitsivittaarnissamut ukioq taanna aamma 50 millionit koruuninik aningaasaliivoq

Nunatta Eqqumiitsulianik Saqqummersitsiviata pilersinneqarnissaanut aningaasaateqarfik maanna 100 millionit koruuninik katersisimalerpoq.

Saqqummersitsiviup pilersinneqarnissaanut 260 millionit koruunit missaanniittut atorneqarnissaat aningaasaateqarfiup missingersuutigaa.

Nunatta Eqqumiitsulianik Saqqummersitsivia 3.000 kvadratmeteriussaaq Nuummiissallunilu.

2024-mi siulersuisut sulinissaannut 2 millionit koruunit Namminersorlutik Oqartussanit aamma Kommuneqarfik Sermersuumit illuartinneqarput.

Sanaartornissamut aningaasat amigaataasut millionit kingulliit ukioq manna nassaarineqarnissaat aningaasaateqarfiup naatsorsuutigaa.

Tusarfiit: Nunatta Eqqumiitsulianik Saqqummersitsivia, Fagbladet Billedkunstneren aamma KNR

Allisiguk

- Tapiissutitut tunissuteqarnitsinnut tunngavigaarput isumaqaratta eqqumiitsulianut pingaarutilinnut tulluartumik katersukkanut saqqummersitsiveqarnissaq nittarsaanerussasoq kalaallit ineriartornerannut, Martin Kviesgaard oqarpoq.

Nutaarsiassami kukkunermik nassaarsimaguit uunga allaffigineqarsinnaavugut.