Greenland Airports pisortartaartoq

Jens Lauridsen Greenland Airportsimi pisortaanertut apriilimi soraartoq apriilimi saqqummiunneqarpoq.

Namminersorlutik Oqartussat suliffeqarfiutaa paarlaasussamik maanna nassaarpoq.

Jeppe Jensen KNI A/S-imi 2021-mili pisortaanerulersoq toqqarneqarpoq.

Greenland Airports tusagassiuutinut nalunaarummi allappoq.

- Greenland Airports pissusissamisoortumik allanngortitsisussanngorpoq. Ukiuni kingullerni mittarfiit nutaat pilersinneqarnissaat sammineqarsimavoq, ukiuni aggersuni isumannaatsumik ingerlatsinikkut, ineriartortitsinerup ingerlateqqinneratigut tikikkuminarnerulersitsinikkullu taakkua periarfissaqarfiisa atorneqalernissaat sammineqartussanngorluni, siulersuisut siulittaasuat, Jens Willumsen tusagassiuutinut nalunaarummi allappoq:

- Suliassaq taanna allaavoq, taamaattumillu aqutsisussaq eqqortunik misilittagalik eqqortunillu piginnaasalik immikkoortumi tassani siuttunngortussaq ujartorsimavarput.

Najukkami ilisimasaqarluarlunilu misilittagartuujusoq

Jeppe Jensenip KNI-mi pisortatut sulisimanermi saniatigut Mittarfeqarfiit qullersaqarfianni Tusassimilu pisortatut atuuffinni sulisimavoq.

Taanna Greenland Airportsimi pisortatut novembarip aallaqqaataanni atuutilissaaq.

- Suliffeqarnera tamaat suliffeqarfinni inuiaqatigiinnut kalaallinut suliassanik pingaarutilinnik suliaqartuni sulinissaq kajumigisimavara. Tamanna aamma Greenland Airportsimut atuuppoq, Jeppe Jensen tusagassiuutinut nalunaarummi oqarpoq.

- Silaannakkut angallanneq inuiaat naapissinnaanissaannut, suliffeqarfiit ineriartornissaannut aammalu nunatta ataqatigiissinnaassuseqarnerata qulakkeernissaanut pisariaqarpoq. Suliassap taassuma sulisut suleqatigisartakkallu peqatigalugit suliarinissaanut qilanaartorujussuuvunga.

Siulersuisut siulittaasuata, Jens Willumsenip Jeppe Jensenip toqqarneqarnerani najukkami ilisimasaqarnera nunatsinnilu suliffeqarfiit pingaarnersaasa ilaannit misilittagaqarnera pissutaasut oqaatigaa

- Jeppe attaveqaasersuutinik inuiaqatigiinni pisariaqartinneqartunik aammalu aaqqissuussaanerni annertuuni aqutsinermik misilittagaqangaatsiarpoq. Peqatigisaanik annertuumik niuernermik paasisimasaqarpoq, atorluarusutatsinnik.

Pisortaq isornartorsiorneqartoq nersualaarneqartoq

Greenland Airportsip 2025-mut naatsorsuutini ataatsimeersuarnermini juunimi saqqummiuppai.

Timmisartuutileqatigiiffiup mittarfiit nutaat pingasut 3 milliardit koruuninik nalikillisittariaqarpai. Tamanna 2,7 milliardit koruuninik amigartooruteqartitsivoq.

Timmisartuutileqatigiiffiup tamatuma saniatigut mittarfiit sanaartorluarneqarsimannginneri pissutigalugit nakkutilliivimmi pilersaarutaasumik sulisussat 20-utinnagit 60-it atorfinitsittariaqarsimagai nassuerutigaa.

Pisortaaneq, Jens Lauridsen Mittarfik Nuummi nakkutilliivimmi ajornartorsiutaasut pillugit aamma isornartorsiorneqangaatsiarpoq.

Jens Willumsenilli Jeppe Jensenip atorfinitsinneqarneranut atatillugu pisortaajunnaartoq nersualaarpaa.

- Peqatigisaanik piffissaq iluatsillugu Jens Lauridsen suliaqangaatsiarsimaneranut qutsavigerusuppara, Jens Willumsen oqarpoq.

Taassumalu Jens Lauridsenip mittarfiit pingasut suliarineqarnerat siuttuuffigiinnarnagu kisianni aamma Kalaallit Airportsip aamma Mittarfeqarfiit Greenland Airportsimut katiterneqarnerat aamma siuttuuffigisimagaa oqaatigaa.

- Tamanna Jensip annertuumik tunniusimalluni siuttuuffigisimavaa, suliaqarnerlu taanna toqqammavissaliivoq, tamannalu Jeppep maannakkut inerisaqqittussanngorpaa, Jens Willumsen oqarpoq.