Nuummi mittarfimmi isumannaallisaavimmi 60-it sulilertariaqartut

 Nuummi mittarfiup sananeqarnera pitsaanerpaanngitsoq, Greenland Airportsimi siulersuisunut siulittaasup oqaatigaa.

Nunatsinni timmisartumi ilaasutut Nuummi mittarfimmi isumannaallisaavimmi ajornartorsiuteqannginnissaa kissaatigineqarsinnaavoq.

Taamaattoqanngitsorli Greenland Airportsip tallimanngornermi ataatsimeersuarnerani erserpoq.

- Sulisut amerlanerulersingaatsiarpagut, tamanna mittarfimmi aningaasartuutit amerlineqarnerannut aamma pissutaaqataavoq, kisianni naatsorsuutigisamit aamma amerlanerulissapput, siulersuisut siulittaasuat, Jens W. Willumsen oqarpoq.

Greenland Airportsip Nuummi Mittarfimmi isumannaallisaanermi 20-niit 25-nut sulisoqarnissani naatsorsuutigeqqaaraluarpaa.

Greenland Airportsip isumannaallisaavimmi sulisut maanna 60-inngortissavai.

Københavnimiit ikiuineq 

Greenland Airportsimi aqutsisut oqarnerat naapertorlugu Namminersorlutik Oqartussat suliffeqarfiutaata ingerlatsinermut, nalillit nalikillinagit 50 millionit koruunit missaannik amigartooruteqarlutik 2025 naggaserpaa.

Greenland Airportsip naatsorsuutaani nutaani akissarsianut sulisunullu aningaasartuutinut katillugit 270 millionit koruunit 2025-mi atorneqarsimaneri takuneqarsinnaavoq. 

Pisortaanerup Jens Lauridsenip oqarnera naapertorlugu Nuummi mittarfimmi sulisut affaat sinnerlugit isumannaallisaavimmi sulipput.  

- Mittarfiup isumannaatsuutinnissaa pingaartipparput. Sipaarniarfigisinnaanngilarput. Silaannakkut angallannermi isumannaatsumik mittarfeqarnissaq pingaaruteqarpoq, Jens W. Willumsen oqarpoq.

Greenland Airportsip 2,7 milliardit koruuninik amigartooruteqarluni 2025 naggaserpaa. Tamanna mittarfittaat pingasut 3 milliardit koruuninik nalikillineqarneri pissutaasoq, ukiumut ataatsimeersuartitsinerminni oqaatigaat.  Assi © : Emil Weis / KNR

Nuummimi mittarfiup isumannaallisaanikkut 60-inik sulisoqarnissaq angungajalerpaa. 

- Ilaasa isumannaallisaanikkut akuersissuteqarnissaq utaqqivaat, taakkuli ilanngukkutsigit Københavnimiillu attartukkagut ilanngullugit 60-it missaanniissaagut, Jens Lauridsen oqarpoq.

Mittarfimmi isumannaallisaavimmi sulisut maannakkut qulit missaanniittut Københavnimeersuupput. Siunissarli ungasinnerusoq eqqarsaatigalugu najugaqartunit taarserneqarnissaat pilersaarutaavoq.

- Taakku (Københavnimiit sulisut aaqq.) soorunami sulisutulli allatut akissarsiaqartinneqarput kisiannili siumut utimullu angalaniarnerat, ineqarnerat allallu eqqarsaatigalugit nikingassuteqarput, Jens Lauridsen oqarpoq nangillunilu:

- Taamaammat maaniisinnerat aningaasartuuteqarnarneruvoq.

Sanaartorneq isornartorsiorneqartoq

Greenland Airportsimi aqutsisut aamma Nuummi mittarfiup sananeqarnera sakkortuumik isornartorsiorpaat.

- Mittarfik naleqqussarluakkamik sanaajunngilaq. Nuummi mittarfiup ilusilersorneqarnera naleqqussarluagaanngilaq. Ilulissani aamma taamaappoq, Jens W. Willumsen oqarpoq.

Greenland Airportsip isumannaallisaavimmi sulisunik taama amerlatigisunik atorfinitsitsisariaqarneranut pissutaasut ilaat tassaavoq ilaasut tamarmik nunanit tamalaanit angalasutut misissorneqartariaqarnerat.

- Nuummi mittarfimmi nunatsinni timmisartuussinerit nunanullu allanut timmisartuussinerit immikkoortinneqarsimasinnaasuuppata iluarnerusimassagaluartoq erseqqippoq. Ullumikkut taamaaliorsinnaanngilagut, Jens W. Willumsen oqarpoq:

- Taamatut sanaajunngilaq, tamannalu paasiuminaatsuuvoq. 

Greenland Airportsilli sanaartornermi allanngortiterinissani pilersaarutiginngilaa, isumannaallisaanermili sulisut amerlasuut sulisinneqartariaqarput.

- Sooq taamatut aalajangertoqarsimanera naluarput, kisianni taamaattoqarnera siunertarisamut naapertuutinngilluinnartumik ullumikkut aningaasartuutaanera takusinnaavarput, Jens W. Willumsen oqarpoq.

Jens Lauridsenip oqarnera naapertorlugu, timmisartuutileqatigiiffiup Qaqortumi Ilulissanilu mittarfinni pilersaarutaasumit sulisut amerlanerusut pisariaqartinneqarnissaat naatsorsuutiginngilaa.