Naalakkersuisut Greenland Airportsip naatsorsuutaanik isornartorsiuingaatsiartut

Greenlandip Airportsip 2025-mut naatsorsuutaanik misissuipallannermi naammaginanngitsoqartoq paasipallanneqarsinnaavoq.

Ingerlatseqatigiiffik 2,7 milliardit koruuninik amigartooruteqarpoq.

Aningaasarpassuarnik amigartooruteqarnermi Greenland Airportsip mittarfiisa nalingi pingaarnertut pissutaapput.

Angusat taamaalillutik - nalinginik appartitsisoqarani – 50 millionit koruunit sinnilaarlugit amigartooruteqarfiupput.

- Angusat pakatsissutaagaangata tamanna naatsorsuutinut kisimi tunngassuteqarneq ajorpoq. Ingerlatseqatigiiffiup inuiaqatigiinnut suliassani tamakkiisumik suliarisinnaaneraa apeqqutaasarpoq, naalakkersuisut siulittaasuat sinniisuallu, Jens-Frederik Nielsen (D) tallimanngornermi ataatsimeersuarnermi oqarpoq.

- Naalakkersuisut ingerlatseqatigiiffiup suut ajutoorfiunersut unneqqarissumik ersarissumillu isummerfigissagai nassuerutiginninnerullu iliuuseqarfigineqarnissaa naatsorsuutigaat.

Ingerlatseqatigiiffiup aqutsisuisa oqarnerat naapertorlugu amigartoorutit sinneqartooruteqarnissaannut naammagittartoqartariaqarpoq.

Isornartorsiuineq akuerigaa

Greenland Airportsip Namminersorlutik Oqartussanut aningaasaliisunut naatsorsuutit pitsaavallaanngitsut saqqummiukkai nassuerutigaa.

- Politikerit sakkortuumik qisuariaateqarnerat paasisinnaavara. Aningaasarpassuimmi pineqarput, siulersuisut siulittaasuat, Jens W. Willumsen ataatsimeersuarnerup kingorna KNR-imut oqarpoq.

Taassumali mittarfiit nutaat pingasut naatsorsuutigineqaqqaartumit akisunerujussuanngorsimanngitsut sanaartornerlu ingerlalluarsimasoq oqaatigaa.

- Mittarfimmik ingerlatsineq ajornartorsiuteqarfiunerpaavoq, tamatumalu isornartorsiorneqarnera paasisinnaalluarpara. Mittarfimmik ingerlatsineq siunissami (mittarfiit nutaat pillugit missingersuusiornermi aaqq.) akisunerussasoq mittarfiit ilisimasussaagaluarpaat, Jens W. Willumsen oqarpoq.

Taassuma oqarnera naapertorlugu oqartussat mittarfimmik ullumikkut ingerlatsinissamut piumasaqaatit eqqarsaatigalugit allanngortitsingaatsiarsimanerat nassuiaatinut ilaavoq.

Naleqassusissinnik milliarderpassuarnik appaasariaqarsimavusi. Mittarfiit nalikinnerunissaat siusinnerusukkut ilisimasussaagaluanngilisiuk?

- Naamik, tamanna ingerlatseqatigiiffimmi sulinermut kinguneqanngilaq. Mittarfimmik ingerlatsineq aappaagu pitsaanerulissappat naleqassusaa qaffaqqissinnaavarput. Taamaammat naatsorsuusiornermut mianersortumik iliuuseqarnermut tunngassuteqarneruvoq, siulersuisut siulittaasuat oqarpoq.

Piffissap sivikitsup ingerlanerani sinneqartooruteqartoqarsinnaanngitsoq

Nuummi Mittarfiup ammarneqarneraniilli ilaasussat isumannaallisaavikkoorniartut akunnerpaalunni siuleriiaartarnerat isornartorsiorneqangaatsiarnikuuvoq.

Greenland Airportsip ingerlatseqatigiiffiup tamanna suli ajornartorsiutiginerpaasaannut ilaasoq nassuerutigaa.

- Isumannaallisaaviup pitsaasumik ingerlanissaa maannakkut sammisatsinni pingaarnerpaasoq aammaarlunga erseqqissaatigerusuppara. Tamanna sanngiiffigisatsinni annerpaavoq, Jens W. Willumsen oqarpoq.

Isumannaallisaanermi sulisoqarnerunissaata pisariaqartinneqarnera naatsorsuutinut ukiuni arlalinni sunniuteqarsinnaavoq.

- Nuup Mittarfiata ingerlannera naatsorsuutigisatsinnik akisuneruvoq. Taamaammat sinneqartooruteqarlualernissamut aqqut suli takivoq, Jens W. Willumsen oqarpoq:

- Mittarfiit uku piffissamut sivikitsumut ingerlatsinertut isigineqaratik attaveqaasersuinermi aningaasaliilluarnertut isigineqartariaqarput.

Naatsorsuutinili pitsaasunik ataasiakkaanik aamma nassaassaqarpoq. Kaaviiaartitat assersuutigigaanni taakku 2024-mi 472 millionit koruuniusut 2025-mi 532 millionit koruuninngorput.

Tassani nunatsinnut angalasut amerlanerulernerat pingaartumik pissutaavoq. Greenland Airportsilli kisitsit qaffasinnerusinnaasoraa, akunnittarfinnili inissaqartitsineq pissutigalugu killeqarluni.

- Siorna aasakkut takuarput, aamma qanittumi Tuukkap angalanissaa taamaatiinnarneqarmat akunnittarfiit inissaaruttut takuarput. Timmisartut pingasunik ilasinnaanngilagut, ilaasussammi sumi najugaqassappat, pisortaaneq, Jens Lauritzen oqarpoq.

Naalli Jens-Frederik Nielsen isornartorsiuigaluarluni ukiumoortumik nalunaarusiaq akueraa, siulersuisunilu ilaasortat atuutiinnassallutik. Naalakkersuisulli siulittaasuat ilungersuummerpaluttumik anersaamivoq.