Greenland Airportsimi pisortaq nutaaq: - Atorfimmi siulerisama angusaasa assinginik angusaqarnissaq ilungersunassaaq
Jeppe Jensenip Greenland Airportsimi pisortanngorneranut atatillugu Nuummi ilassinnittoqarnerani Nuussuarmi illorsuup quleriit sisamaanni inersuarmi inuit qungujulasut takussaapput.
Greenland Airports Nuummi, Qaqortumi Ilulissanilu mittarfinnik nutaanik pingasunik ukiuni arlalinni sanaartorneq sapaatip-akunnerani kingullermi naammassivaat. Suliallumi tamarmiusup naammassineqarnera Ilulissani mittarfimmi kingullermik sisamanngormat nalliuttorsiutigineqarpoq.
Nalliuttorsiorneq Greenland Airportsimi pingasunngornermi ilasseqatigiittoqarnerani nanginneqarpoq.
Inip teqeqquisa ilaanniipput nerriviit marluk tunissutinut ilitsivissat. Aappaa pisortatut tunuartumut Jens Lauridsenimut aappaalu pisortanngortumut Jeppe Jensenimut.
Pisortaasup tunuarnera nutaallu atuutilernera ersarippoq.
Inip qeqqaniippoq nerriverujussuaq, qaqortumik qalilik, nerriviulli qalia ersinngingajappoq, nerisassanik, qaaqqusat alutorsaatigeqisaannik qallersimagami. Sassaalliutaapput naatsiiat, salaatit aamma frikadellit.
Nerriviup isuani angutit pingasut peqataasunut oqaaseqarnissaminnut piareersalerput.
Tassalu Jens Lauridsen, Jeppe Jensen aamma Greenland Airportsimi siulersuisut siulittaasuat Jens Wittrup Willumsen.
Kingulliullugu taaneqartoq oqaaseqaqqaartuulluni tamanik tikilluaqqusivoq.
Taava pisortanngortoq saaffigalugu ilaatigut ima oqarpoq:
- Greenland Airportsip oqaluttuarisaanerani allanngornerit pingaarnerpaat ilaata nalaani pisortanngorputit.
Jeppe Jensenilu nersualaarsinnarlugu, pisortatut tunuartoq Jens Lauridsen qiviarpaa nersualaarlugulu:
- Ullumi ulloq immikkut ittuuvoq. Taamaattuartarpoq suliffeqarfik sunaluunniit nutaamik naalagartaaraangat.
Aammattaaq eqqaavaa piffissap ingerlanerani ilungersunartoqartarsimasoq, tamakkuli Greenland Airports-imi ataatsimooqatigiinnikkut anigorsinnaasarsimallugit.
- Illit (Jens Lauridsen, aaqq.) illu sanavat, maannalu najugaqarfiginissaa uagut ilinniassavarput.
Naggaserlugu skåleqatigiittoqarpoq, qaaqqusallu viinnimut immiartorfiit plastikkiusut sodavandillu qillertuusat kivippaat - taakkua nerisassanut nerriviup saniani nerrivimmi allami sanileriiaaqqissaarlugit iliorarneqarsimapput.
Pisortamut nutaamut kaammattuut
Jens Wittrup Willumsen oqaaseqareermat Jens Lauridsen oqaaseqarpoq. Imminik inuulluaqqusiartorlutik Jeppe Jensenimillu tikilluaqqusiartorlutik takkussimasut tamaasa qujaffigai.
Ilaquttani piffissami sivisuumi qimassimasarnikuusani qujaffigigamigit immikkut killitsippoq.
Nipaatigut sajukulaartukkut killitsinnera tusarneqarsinnaavoq.
Inunnut eqqaaniittunut pisortanngortumullu kaammattuuteqarluni naggasiivoq:
- Greenland Airports paarilluarniarisigit.
Jeppe Jensenilumi taamaaliorumavoq. Tamanna nammineq oqalugiarnermini aamma kingornatigut KNR-imit apersorneqarnermini oqaatigaa.
- Pissangavunga. Suliassanik itinerusumik ilisimasaqalernissara qilanaaraara.
Jeppe Jensen oqalugiarnermini ilaatigut ima oqarpoq:
- Atorfimmi siulerisama angusaasa assinginik angusaqarnissaq ilungersunassaaq.
Taassumalu suliffittaamini mikinngitsumik akisussaaffeqartussaalluni nalunngilaa, kingornatigut oqaluttuarpoq:
- Sapinngisara tamaat iliuuseqartuaannassaanga, soorunalumi matumani isumannaallisaanerup qaffasinnerpaaffimmiinnissaa pingaartittorujussuuara. Taava aamma ingerlatsineq pingaartinniarpara. Ingerlatsineq aalaakkaasoq. Soorunalumi aamma sullitarpassuagut isiginiartuassavakka.
Aaqqiissutissanik saqqummiinissaq siusippallaarpoq
Pisortanngortoq atorfittaamini aatsaat ataasinngormat sulilerpoq, taamaattumillu pingaartitassatut taaneqartunut naleqqiullugu qanoq iliuuseqarniarnerminik aperineqarami suut tamarmik suli nutaajusut erseqqissarpaa:
- Aaqqiissutissanik maannakkorpiaq saqqummiinissaq suli piaarpallaarpoq. Suliffeqarfimmi aatsaat sulilerpunga, pissutsillu qanoq innerisa paasiniarnissaannut qanorlu assigiinngitsutigulluunniit iliuuseqarnikkut ingerlatseqatigiiffimmik ineriartortitsisinnaanitta eqqarsaatiginissaanut piffissaq pisariaqartippara, tamatumani piffissaq atugassara sivisulaassaaq.
Greenland Airports siornatigut arlalitsigut isornartorsiorneqarsimapput, ilaatigut aningaasaqarnikkut millionilikkaanik amigartooruteqarnerat aamma sulisussaaleqinerat, ilaatigut isumannaallisaanermi, pissutigalugit. Ajornartorsiutaasarsimallutik angalaniartorpassuit tulleriiaattut, utaqqisorpassuit, taamaatiinnarnerit nassatanillu isumaginninneq.
KNR-ip Jeppe Jensen isornartorsiutigineqartut ilaat aaqqiiviginiarlugit qanoq iliuuseqarniarnersoq aperimmagu, ima akivoq:
- Tamanna pillugu akissuteqarnissaq suli piaarpallaarujussuarpoq. Soorunami ilisimavara isumannaallisaanermut, utaqqisarnernut aningaasaqarnermullu tunngatillugu ajornartorsiuteqartoqarsimasoq, taakkuli aaqqiiviginiarlugit qanoq iliuuseqassanerlunga maanna akissuteqarfigissallugu suli piaarpallaarpoq. Kisianni oqaatigisinnaavara suliassamut kajumissuseqarluarlunga, sulinermillu aallartitsilluarnissara qilanaaralugu.
Taamaakkaluartorli angalasunut pissutsit pitsaanerulernissaat qularutiginngilaa. Tamanna anguniarlugu nammineq sapinngisani tamaat iliuuseqarumavoq, isumaqarlunilu suliassamut tassunga eqqortuulluni:
- Isumaqarpunga pissutsit pitsaanerulersinnissaannut peqataasinnaallunga, taamaassimanngippat atorfimmut tassunga imminut piukkullunga saqqummiussimassanngikkaluarpunga.
Pisortaasimasoq Jens Lauridsen ikaarsaariarnermi pisortanngortup suliaminik aallartitsinerani ikiuukkallassaaq.
- Immaqa takoqqissaagut, qanoq pisoqarumaarnera nalunartaqaaq, Jens Lauridsen naggasiivoq.