Ernisarfiit amigaataaneri ernisussiortunit ernummatigineqartut

Ernisarfiit 2002-miilli 17-ioriarlutik pingasuinnanngornikuupput. Tamatuma Nuummi SANA-p ernisarfiani, naartusunik amerliartuinnartunik isumaginnittariaqalernerisa ilungersunarnerulertippaa.

Aamma Qaqortumi Sisimiunilu ernisarfiit matuneqarallarput. Sumiiffinni taakkunani nakorsanik immikkut piginnaasaqartunik amigaateqartoqarnera tamatumani pissutaavoq.

Line Poulsen, 2017-imiit 2021-p tungaanut SANA-mi atorfeqarnikuusimasoq maanna ulluinnarni passutsittarfimmi Privatjordemoder.gl-imi ingerlatsisuuvoq. Ernisussiortutut namminersortutut passussisarnermi saniatigut, Nuummi ernisarfimmi paarlattaasarpoq.

Ernisarfiillu ikiligaluttuinnarneri ernummatigilluinnarpaa.

- Ernisussiortussaqarnermiit inissaqartitsinermiillu naartusunik arlalinnik erniartortitsisoqartarpoq. Taamaammat Nuummi ernisarfik ulaperuluffiunerulerpoq, Line Poulsen oqarpoq.

Maanna init tamarmik inoqartarneri ukiumut ikittoriaannarluni Line Poulsenip misigisarpaa. Siunissamili akulikinnerulernissaa naatsorsuutigaa.

Atorfillit sulinngiffissatik taamaatiinnartaraat

Ernisarfiit matuneqarpata, naartusut immikkoortortaqarfinnut allanut erniartortinneqassapput. Sulisussanilli pissarsiniarneq atorfilinnillu sulisoqaannarnissap ajornartorsiutaanera atorfilinnut ilungersunartorsiortitsinerulerpoq. 

- Atorfillit sulinngiffissaminni suleqqittariaqartarput sulisussat allattorsimaffianni sulisussanik immerluarneqarniassammat, aamma ernisarfiit sapinngisamik sukkasuumik naammassiaarniarsarisarpaat tullissaanut atoriaanngorlugit, Line Poulsen oqarpoq.

Nunani avannarlernut sanilliullugu akissarsiat appasippallaarneri pissutigalugit, Kalaallit Nunaanni ernisussiortutut atorfik qinnuteqarfigissallugu orniginartuunngitsoq, taanna oqarpoq. 

Naartusulli ernilernerminni ulapiffioqisoq malugineq ajoraat, Line Poulsenip erseqqissarpaa.

- Ernisarfimmut matu matuniariarukku pingaarnertut ukkatarinnilertarpugut tassa - ernisuttoq meerarlu. Tunuatungaanili allaffimmi ernisussiortoq arpasukaarnerulaarsinnaasartoq, taanna oqarpoq.

Naartusunut pisussat pilersaarusiukkat soorlu nakorsamut misissortinnerit ernisussiortumillu oqaloqatiginninnerit, utaqqineq misigisinnaasarpaat. 

Inuiaat tusarnaarnerullugit

Sisimiuni Qaqortumilu ernisarfinnik matusigallartoqariasaangaarmat, Nuummi ernisussiortunik saniatigut atorfinitsitsinissaq angumerineqanngitsoorpoq, Line Poulsen oqarpoq. Siunissami ernisarfiit pineqartillugit, inuiaqatigiinnik ilaatitsinerunissamik taanna piusaqarpoq. 

- Kalaallit Nunaanni siunissami ernisarfinnik qanoq periarfissaqarsinnaaneq pillugu, inuiaqatigiit aalajangeeqataanissamut ilaatinneqarnerunissaat neriuutigaara, taanna oqarpoq. 

Ernisarfiit marlunnut ikilisinniarlugit Peqqinnissaq pillugu Ataatsimiititaliarsuaq 2023-mi innersuussuteqarpoq. Tamanna Line Poulsenimut ernumalersitsivoq, tassami ernineq ilaqutariittut nalliuttorsiutaasarmat sapinngisamik najukkamut qaninnerpaamiitinniarneqartariaqaraluarpoq, ernisarfinnimmi eqiterineq kalaallit kulturiannut akerliummat, taassuma uparuarpaa.