Qaqortumi Sisimiunilu ernisarfiit matuneqarallartut
Qaqortumi Sisimiunilu ernisarfiit matuneqarallarput.
Sumiiffinni taakkunani nakorsanik immikkut piginnaasaqartunik amigaateqartoqarnera tamatumani pissutaavoq.
- Peqqinnissaqarfimmi sullissisinnaanissamut piukkunnaateqartunik sulisussaaleqisoqartarnera allannguisoqarneranut pissutaavoq, Peqqissutsimut Inunnullu Innarluutilinnut Naalakkersuisoqarfik tusagassiuutinut nalunaarummi allappoq.
Matoreersoq
Qaqortumi ernisarfik matoreerpoq, Sisimiunilu ernisarfik apriilip 22-ani matussalluni. Illoqarfinnilu taakkunani marlunni ernisussat Nuummi Dronning Ingridip Napparsimmavissuani erninissamut maanna neqeroorfigineqalerput.
- Naartusunut ilaqutaasunullu allannguutinut akornutit ajoqutillu pillugit eqqasuuteqartoq peqqinnissaqarfimmi sulisunit maluginiarneqarpoq, naalakkersuisoqarfik allappoq.
Erninerilli sulisunik piginnaasalinnik illersorneqarsinnaasumik suliarineqarsinnaanissaat pingaarnerpaasoq, naalakkersuisoqarfiup tusagassiuutinut nalunaarummi erseqqissaatigaa.
Matusinerli naartusut ernisussiortumit misissorneqarsinnaajunnaarnerannik isumaqanngilaq. Misissortinnissamut suli periarfissaqassaaq, Nuummili ernisoqartassalluni.
Ernumanarluinnartoq
Ernisarfiit marluk matugallarneqarnerat Ernisussiortut Kattuffiata ernumanarluinnartippaa.
- Piffissap sivikitsup ingerlanerani aalajangiisoqarnera ernisussiortunut ilaqutariinnullu meerartaartussanut erninissamut neqerooruteqarnerup pitsaassusaannut annertuumik kingunerluuteqassaaq.
Ernisarfiit 2022-mit 17-init maanna pingasuinnanngorsimasut kattuffiup tusagassiuutinut nalunaarummi aamma allappaa.
Aasianni ernisarfik aamma matugallarneqarnikuuvoq. Tamanna 2019-imi pivoq, taannalu suli ammaqqinneqarani.
Taamaammat ernisarfiit pingasunut ikilisinneqarnerat sumiiffinni taakkunani suli ilungersuanarnerulissaaq, kattuffik allappoq.
- Peqqinnissamut aqutsisut piffissap taama sivikitsigisup iluani ernisarfinnik pingasuinnanngortitsinerat ernumanarluinnartuusoraarput, tamanna Nuummut ernisarfinnik ernisussiortunillu amerlanerulersitsiviunngitsumut aarlerinartumik eqiterussinermik kinguneqarpoq, Ernisussiortut Kattuffiat allappoq.
Ernisarfinnik marlunnik matusineq matusigallarneruvoq, 2025-lli sinnerani matoqqassasut, naalakkersuisoqarfik allappoq.
