Danmarkimi kalaallit atugarliortut millionilikkaanik ikiorserneqartussanngorput

Folketingimi partiit tamangajammik kalaallinut atugarliortunut Danmarkimi najugaqartunut aningaasaliissutissanik immikkoortitsipput.

Taamaallaat Borgernes Parti isumaqatigiissummut ilaanngilaq.

2027-miit 2030-mut isumaginninnermut, peqqinnissamut suliffeqarnermullu 451,3 millionit koruunit agguaanneqarput.

Taakkunannga 28,4 millionit koruunit Kalaallit Nunaanneersunut atugarliortunut immikkut suliniutinut aamma kalaallit atugarliortut Danmarkimut nuuttut kiserliortunngornissaasa pinaveersaartinnissaannut atorneqassapput.

Aningaasat  ornittakkanut siunnersuisarfiutigisunut tallimanut Redeninik taaneqartartunut ilaatigut atorneqassapput. Aningaasat kalaallit arnat atugarliortut ikiorserneqarnissaannut suliniutinik nukittorsaanermut, attaveqaqatigiittarfinnik pilersitsinermut kiserliornerullu pinaveersaartinnissaanut atorneqassapput.

Tamatuma saniatigut aningaasat Stenbroens Jurister kalaallit inatsisitigut ikiorserneqartarnerisa nukittorsarnissaannut aamma kalaallit illuisa Danmarkimut nooqqammersunik kalaallinik tapersersuisarnerisa nukittorsarnissaannut atorneqassapput.

Neqeroorutit pioreersut pingaartinneqarput

Inuit Ataqatigiit Folketingimut ilaasortaatitaannut Naaja H. Nathanielsenimut isumaqatiginninniarnerni Danmarkimi kalaallinut suliniutit pioreersut salliutinneqarnissaat pingaaruteqarpoq.

- Immikkut ilisimasanik ilisimasariaqartunillu pilersitsiniarneq piffissami sivisuumi pisarpoq. Pikkorissinissaq piffissamik atuiffiusarpoq. Suliniutit isiginiakkatta ilaanni pikkorissunik sulisoqareerpoq, suliniutillu ingerlareerput, sulisunik nutaanik atorfinitsitsinissaq suliassanillu aallaqqaataaniit allaaserinninnissaq pisariaqartinneqarani.

- Aningaasat januaarip aallaqqaataanit sunniuteqarluartumik atorneqalersinnaapput, tamannalu pingaarnerpaavoq, Naaja H. Nathanielsen oqarpoq.

Naaja H. Nathanielsenip, neqeroorutit aningaasaliiffigineqartut immikkut ilisimasaqarfioreernerat tikkuarpaa.

- Reden tassaavoq arnanik atugarliortunik sullissisoq, suliartillu isumagilluaqaat.

- Kalaallit illuini ilisimasat amerlareermata, taakku annerusumik suli atorluarneqartariaqarput, tassuunakkut suliaminnik ilisimasaqarnerulersinnaassapput, oqarpoq.

Naaja H. Nathanielsenip isumaqatiginninniarnerni suliniutit pioreersut pingaartippai. Assi © : Jens Dresling/Ritzau Scanpix

Aammattaaq eqqaava Stenbroens Jurister aqqusinermiittunik sullissinerat.

- Innuttaasunik kalaallinik sullissilluareerput,  amerlasuunik ilisimasaqarlutik minnerunngitsumillu inuit eqqortut sulisoralugit, Naaja H. Nathanielsen oqarpoq.

Stenbroens Jurister kalaallit Danmarkimiittut akeqanngitsumik ikiorsernissaannik neqerooruteqartarput.

Ukioq manna aningaasaliissutit ikinnerusut

Naaja H. Nathanielsen ukioq manna neqeroorutinut pioreersunut aningaasaliissutigineqartunik naammagisimaarinnikkaluartoq, siorna aningaasaliissutigineqartunut naleqqiullugit ukioq manna aningaasat ikinnerupput.

Siorna 557 millioner kroner immikkoortinneqarput ukiuni sisamani sillimmatinut, taakkunannga 53,6 millioner kroner Danmarkimi kalaallinut suliniutinut immikkoortinneqarlutik.

Taakku ukioq manna immikkoortinneqartut 28,4 millioner koruuniusunit marloriaatingajaannik amerlanerupput.

Naaja H. Nathanielsenip oqarnera naapertorlugu isumaginninnermut tunngasunut aningaasaliissutit pisariaqartinneqartunut naleqqiullugit ikippallaarput.

- Suliniutinut eqqortunut aningaasaliissutissanik naammattunik pissarsiniarneq tamatigut ilungersunartarpoq, taamaattumik soorunami amerlanerusunik aningaasaliisoqarnissaa kissaatigisimagaluarparput. Aningaasat agguaanneqartussat killeqarput, periarfissat amerlanngillat, taamaammat Kalaallit Nunaannut immikkoortitat naammaginarput, oqarpoq nangillunilu:

- Kisianni aningaasaliissutit suli amerlanerunissaat kissaatigisimagaluarpara.

KNR-ip Naleqqap Folketingimut ilaasortaatitaa Qarsoq Høegh-Dam oqaaseqartinniaraluarpaa, allaaserisalli naammassineqarnissaanut piffissaliussaq nallertinnagu tamanna iluatsissimanngilaq.