Naalakkersuisoqarfiup pisortaa: Uuliasiorfiutileqatigiiffiup maleruagassat ilisimasaqarfiginngilai

Uuliasiorfiutileqatigiiffik Ittoqqortoormiini ukioq manna misiliummik qillerisussaq innuttaasunut aningaasaateqarfiliornissamik pilersaaruteqarpoq.

Ingerlatseqatigiiffiup pisortaa Robert Price KNR-imit qaammatip siuliani apersorneqarami taama oqarpoq. 

Aningaasaateqarfik aningaasanik immikkoortinneqarsimasunik imaqassaaq, taakkulu Tunumi illoqarfimmi avinngarusimasumi pissutsit pitsanngorsarnissaannut atorneqassapput.  

Ittoqqortoormiini najukkami ataatsimiititaliaq uuliasiorniarluni qillerinissamik pilersaarummut assortuussutaasumut tapersiissaguni piumasaqaatit arlallit naammassineqarnissaat qaammatit kingulliit ingerlanerini piumasaqaatigai. 

Kissartumik naluttarfiliornissaq, nutaamik timigissartarfiliornissaq, piniartunut illuaqqanik nutaanik sanaartornissaq allallu ilaatigut piumasaqaatigineqarput. 

Nunatsinnili aatsitassarsiornermi oqartussani atorfillit qullersaata Jørgen T. Hammeken-Holmip oqarnera naapertorlugu Amerikamiut uuliasiorfiutileqatigiiffiata suliamik sumut killinnera qanorlu ingerlariaaseqarnissaa ilisimasaqarfigivallaanngilaa taamaattumik nunatsinnut pissutsinik iluaqutaasussaanngitsunik oqariartuuteqarpoq.

- USA-mi tuniniaallaqqipput, naalakkersuisoqarfiup pisortaa Amerikamiut uuliasiortut pillugit taama oqarpoq.  

- Nunatsinnit piumasaqaatigineqartut paasisimasaqarfiginagit neriorsuisorujussuupput, taanna KNR-imut oqarpoq. 

Akuersissuteqanngitsoq

Greenland Energy Companyp akuersissuteqannginnera ingerlatseqatigiiffiunerali Jørgen T. Hammeken-Holmip siullertut erseqqissaatigaa. 

Nunap Qeqqani (Jameson Landitut siornatigut taagorneqartoq, aaqq.) suliniummi akuersissuteqartoq tassaavoq White Flame Energy aqqutigalugu tuluit ingerlatseqatigiiffiat 80 Mile. 

Akuersissuteqartorlu 80 Mile najugaqartunut tapiissuteqarsinnaavoq.  

Taamaakkaluartoq Amerikamiut uuliasiorfiutileqatigiiffiata pisortaa akuersissuteqartuusutut aningaasatigullu isertitat tamarmik imminut tutsinneqartussatut namminerlu agguaassinnaallugit oqaluppoq. 

Aningaasaqarnikkut ajornartorsiortitsisinnaasoq

Akuersissuteqartoq inuiaqatigiinnut tunissuteqarusukkuni assersuutigalugu atuarfimmut 100 millionit koruuninik aningaasaleerusukkuni taamaaliorsinnaavoq.  

Pisortat akilersugaat tamaasa piumagunik aningaasaliiffigisinnaavaat – atuarfiit, attaveqaasersuutitigut pitsanngorsaatissat Namminersorlutik Oqartussanit kommunimiilluunniit nalinginnaasumik aningaasalersorneqartartut.

Tunissutilli taamaattut aatsitassarsiorfimmiit inuiaqatigiinnut kalaallinut isertitatut nalilerneqartarput.

Nunallu iluanit pisuussutinit isertitat tamarmik aatsitassarsiornermi aningaasaateqarfimmut ikineqassapput.

Aningaasaateqarfik aningaasanik katersuiffiuvoq nunap iluanit pisuussutinit isertitat sunut tamanut allanut, assersuutigalugu nutaamik atuarfiliornissamut atorneqannginnissaat pillugu inatsisartunit atuutsilerneqartoq.

Aningaasat taama amerlatigisut isertitarineqartillugit sumut atorneqarneri tamakkiisumik malinnaaffigineqarusuppoq.

Tamannalu pinngippat – soorlu 100 millionit koruuninik isertitaqaraanni taakkualu atuarfimmut nutaamut atorneqarlutik, aatsitassarsiornermi aningaasaateqarfik 100 millionit koruuninik amigartooriataassaaq. Aningaasallu taakkua aningaasanut inatsit naapertorlugu aningaasaateqarfimmiittussaapput, Jørgen T. Hammeken-Holm oqarpoq. 

- Taava Namminersorlutik Oqartussat aningaasat taakkua nalinginik allamit ujartuissaaq, taanna oqarpoq. 

Naalagaaffimmit tapiissutit

Greenland Energy Companyllu inuiaqatigiinnut aningaasaliiniarnerannut tullertut akornutissaq tassaavoq, Kalaallit Nunaata danskit naalagaaffiannut isumaqatigiissutaa, nunattami nunap iluanit pisuussutinit isertitai 75 millionit koruunit sinnerpagit, isertitat affaata nalingi naalagaaffimmit tapiissutinit ilanngaatigineqartarnissaat isumaqatigiissummi allassimavoq.

Ingerlatseqatigiiffiup 100 millionit koruunit nutaamik atuarfiliornermut atorpagit, aningaasat taakkua amerlassusaata affai naalagaaffimmit tapiissutinit ilanngaatigineqassapput. Taava Namminersorlutik Oqartussat 50 millionit koruuninik tassanngaannaq amigaateqalissapput.

Taakkulu tamarmik pippata - 100 millionit koruunit aatsitassarsiornermi aningaasaateqarfimmut ikineqanngippata aningaasallu taakkua affai naalagaaffimmit tapiissutinit ilanngaatigineqanngippata – nunatta karsia 150 millionit koruuninik amigaateqalissaaq.

- Taamaattumik tamanna silatusaarnerunavianngilaq, Jørgen T. Hammeken-Holm oqarpoq.

Akuersissutigineqarnissaa piumasaqaataasoq

Aammattaaq Greenland Energy Companyp qilleriviup eqqaani innuttaasunut aningaasaateqarfimmik pilersitsinissamik neriorsuutini pimooruppagu, tamanna naalakkersuisunit akuerineqaqqaartariaqarpoq, naalakkersuisoqarfiup pisortaa oqarpoq.

- Inuiaqatigiinnut taamatut aningaasaleeriaaseq aaqqissuussinermit atortakkatsinnit allaaneruvoq. Aatsitassarsiornermi aningaasaateqarfik namminersornermullu inatsit pissutigalugit tamanna uagutsinnut toqqaannartumik ajornartorsiutaalissaaq, taanna oqarpoq. 

Aningaasat isertitat taama oqarnermini pineqarnerarpai, pisortanilu aaqqissuussaaneq avaqqullugu aningaasaateqarfimmik millionilinnik aningaasaateqartumik pilersitsisoqarpat tamanna allatigut aningaasassaaleqiffiuleratarsinnaavoq.

- Taamaaliulissagunillu (Greenland Energy Company, aaqq.) tamanna nunap aningaasarsiornissaanut periarfissiilluarnerunavianngilaq, Jørgen T. Hammeken-Holm oqarpoq.

- Inatsisit naapertorlugit taamaaliortoqarsinnaavoq. Taamaaliornerli Kalaallit Nunaannut ajorluinnartumik kinguneqassaaq. Taamaattumik taama pisoqarnissaa kissaatiginngilarput. Taamaaliorneq (najukkami inuiaqatigiinnut aningaasaliinerit, aaqq.) aningaasanut inatsisikkut pissaaq. Nalinginnaasumik pisarnertut pissaaq, taanna oqarpoq.

Jørgen T. Hammeken-Holmip oqarnera naapertorlugu, ingerlatseqatigiiffik pisortarlu, qanoq ingerlasoqarnissaa paasisimasaqarfiginagu, akuersissummik piginnittuunatik piginnittutut namminnerlu tamakkiisumik isertitaqartussatut oqaaseqartartut pineqarput.

Ingerlatseqatigiiffiullu (Greenland Energy Company, aaqq.) maleruagassat atuuttut malinnagit imaluunniit Kalaallit Nunaanni inuiaqatigiinnut tamanut sunniuteqarnerlussinnaanera eqqarsaatiginagu, kimulluunniit tamatuma kingorna tunissuteqarsinnaavoq.

- Taannami (Robert Price, aaqq.) akuersissummik piginnittoq sinnerlugu oqaaseqanngilaq, ingerlatseqatigiiffimmik taassuminnga piginnittuunngilaq. Akuersissuteqarnani sorpassuarnik neriorsuuteqarpoq, Jørgen T. Hammeken-Holm. oqarpoq.