Greenland Energyp pisortaata Nunap Qeqqani uuliasiornissap isornartorsiorneqarnera akuersaanngikkaa
KNR-ip Ittoqqortoormiit eqqaanniittoq Jameson Landimik taagoraluarpai. Oqaasileriffiulli naqqiissuteqarnerata kingunerisaanik tamanna Nunap Qeqqanik KNR-imiit maannamit taagulissavarput.
Greenland Energyp USA-mi oqaaseqarnera Nunap Qeqqatalu eqqaani uuliasiornissamut nunatsinnit akuersissutigineqartut akornanni assigiinngissuteqannginnerarpaa.
Amerikamiut uuliasioqatigiiffianni pisortap Robert Pricep ingerlatseqatigiiffik malitassanik malinninnerarpaa suliniutinullu pilersaarutigineqartunut qinnuteqaat kingulleq uani sapaatip akunnerani nassiussissangatillugu.
- Assigiinngissuteqartoqanngilaq. Piffissaliunneqartup qaangiutinnginnerani suli qinnuteqarsinnaavugut, taanna KNR-imut oqarpoq.
Taassuma, ingerlatseqatigiiffiup aasap ingerlanerani ukiaaneranilu misissuinissamut pilersaarutigineqartunut, ilaatigut atortut qillerivimmukaassorneqarnerinut, akuersissuteqartoqarnera erseqqissarpaa.
Pisortalli oqarnera naapertorlugu akuersissut kingulleq suli amigaataavoq.
- Kalaallit akuersissutaallu pineqarput, taakkulu malillugit sulivugut. Qinnuteqaat kingulleq nassiukkutsigu naapertuilluartuussaaq. Qaammaterpaalunni suliarineqarpoq aamma malitassat aalajangersakkallu tamaasa iluanniippoq, taanna oqarpoq.
Misissuisoqaqqaassasoq
Qinnuteqaat kingulleq Namminersorlutik Oqartussanit akuerineqassappat Greenland Energy Ittoqqortoormiit eqqaanni oktobarimi qillerinissanik marlunnik suli pilersaaruteqarpoq.
Robert Pricep oqarnera naapertorlugu suliniut neriuuteqarnarpoq. Tamanna nunap qanorinnerata, Nordsømut Alaskamilu Prudhoe Bayimut assinguneranik aammalu GEUS-imiit Nunap Qeqqata siornatigut misissorneqarnera ingerlatseqatigiiffiullu ARCO-p nalimini sumiiffiup uuliaqarneranik misissuineranik tunngavilerpaa.
Uuliamilli tuniniarsinnaasumik nassaassaqarnersoq suli apeqqutaavoq.
- Qillerinerit naammassineqarpata uuliamik qallorneqarsinnaasumik naammattumik peqarnersoq aatsaat aalajangissavarput. Uuliaqarluartoq paasineqassappat naalakkersuisut Ittoqqortoormiillu akisussaassuseqartumik ineriartortitsineq qalluinerlu pillugit oqaloqatiginiarpagut, taanna oqarpoq
- Ilumulli uuliaqarnersoq apeqqutaalluinnartoq erseqqissaatigerusuppara, Robert Price KNR-imut oqarpoq.
Taassuma qillerineq siulleq ukiup naannginnerani suliarineqartussaq ullunik 30-nit 45-nut sivisussuseqassasoq naatsorsuutigaa, qillerinerullu aappaa ukiortaap kingorna pissangatinneqarpoq. Qillerinerit tamarmik 3.500 meterit missaannik itissuseqassapput.
Piffissaliussaq isumaqatigiinngissutaasoq
Jørgen Hammeken-Holmip uuliasiortoqarsinnaanerata aallartinnissaanut ukiut qulit missaasa ingerlaqqaarnissaanik naliliinera Greenland Energyp isumaqatiginngilaa.
- Ukiut qulit suminngaanniit pissarsiarisimanerai naluara. Akuersissuteqarnissamut suliaqarneq eqqarsaatiginngikkaanni tamanna sukkanerungaatsiarsinnaavoq – immaqa ukiup ataatsip marlullu iluanni, Price oqarpoq.
Taassumali oqartussat akuersissuteqarnissaat piffissaliussamut apeqqutaalluinnartoq erseqqissaatigaa.
Robert Pricep oqarnera naapertorlugu aatsitassanut naalakkersuisoqarfiup oqaatigisaa siammasissorujussuuvoq.
- Aatsitassarsiornermik suliniuteqaraanni suliarinninneq aallaavoq. Uulia – akuersissutigineqartussat pisariaqartut tunniunneqassappata – sukkanerungaatsiartumik tuniniarneqarsinnaavoq, Robert Price oqarpoq.
Pinngortitamut innarliinani piutinneqarsinnaasoq
Suliniut najukkami piniartunit Nunap Qeqqani piniartartunit isornartorsiorneqarpoq.
Robert Pricep Ittoqqortoormiinut tikeraarluni innuttaasunut ataatsimiititsiniartorneranut ernumassuteqartoqarnera pissutaasut ilagaat.
Taassuma pinngortitamik peqateqarluni uuliasiortoqarsinnaasoraa, taassumalu USA-mit misilittakkat innersuussutigai.
- Nunarsuarmi sumiiffippassuarni pinngortitamik peqateqarnikkut uuliasiortoqarsinnaasoq ilisimavara. USA-mi uuliamut milluaassutinik pinngortitamut ajoqusiinani atorsinnaasuuteqarpugut, taanna oqarpoq.
Uuliamilli niuerutigineqarsinnaasumik aatsaat nassaartoqassappat aatsaat taamaaliortoqassasoq, taassuma erseqqissaatigeqqippaa.
- Uuliaqarnersoq naluarput. Kisianni nalunaarusiat atuakkakka naapertorlugit uuliaqarsoraara.
Kalaallit naalakkersuisuisa avatangiisinut tunngasut pissutigalugu uuliasiornerit nutaat kissaatiginagit 2021-mi oqaatigaat. Kissaatigisaannut akerliusumik iliuuseqarsorivisi, taamaappallu sooq taamaaliorpisi?
- Tamatuma kingorna Naalakkersuisoqarfimmit akuersissuteqarfigineqarnitsinnut uppernarsaammik allagarsivugut, tassani 'grandfathered in'-iusoq (malittarisassaq atuuttoq malillugit atuuttoq) oqaatigineqarpoq. Taamaammat naalakkersuisut qanoq siunertaqarnerat oqaaseqarfigisinnaanngilara. Tusakkakka naapertorlugit inerteqqutitoqaq imaani uuliasiornissamut uumasunillu illersuinissamut tunngassuteqarneruvoq. Uagut uani nunami suliaqarpugut, akuersissummillu atuuttumik peqarluta, Robert Price oqarpoq.
Sumiiffimmi aningaasaliinissamik neriorsuuteqartoq
Greenland Energy Ittoqqortoormiini aningaasaateqarfimmik pilersitsinissamik qulillu amerlassuseqartunik atorfinitsitsinissamik pilersaaruteqartoq, pisortap oqaatigaa.
- Naalakkersuisut najukkamilu inuiaqatigiit aningaasaateqarfinnik arlalinnik pilersitsinissamut, matumani naalagaaffiup aningaasaateqarfia sumiiffimmi inuiaqatigiit pisariaqartitaannut matussusiisussamik pilersitsinissanut suleqatiginiarpagut.
Uuliasiorfiup naalakkersuisut najukkamilu inuiaqatigiit uuliamik nassaartoqassappat aningaasaliinerunissamut oqaloqatigerusuppai.
- Tamanna Kalaallit Nunaanni isertitaqarnerulernissamut aqqutaasinnaavoq, Price oqarpoq, taassumalu Norgep Nordsømi uuliamik nassaarnera aamma uuliamit isertitaqarnera Norgep Danmarkillu iluanaaruteqarfigingaatsiagaa ilaatigut erseqqissaatigaa.
Oqaatsinik atuinini ajuusaarutigaa
Robert Pricep tv-kkut aallakaatitassiortumit, Dr. Philimit apersorneqarnermini Greenland Energy Nunap Qeqqani piginnittuusoq oqaaserisani KNR-imit apersorneqarnermini utertippaa.
- Erseqqissaatigilluinnarusuppara: Sumiiffimmik piginnittuunngilagut. Uuliamik ujaasinissamut misissuinissamut akuersissuteqarfigineqarpugut. Oqaaseq 'piginnittuuneq' Kalaallit Nunaanni narrujuumminarsinnaasoq paasisinnaavara, taamaammat oqaatsimik atuinera ajuusaarutigaara. Pigisarput tassaavoq uuliamik ujaasinissamut akuerissut.
Taassuma naalakkersuisut, kommune, sumiiffimmilu innuttaasut oqaloqatiginerat pingaarnerpaasoq, aamma kikkulluunniit oqaloqatigerusullugit illuatungiliuttuniillu tamanit isornartorsiuinerit, nersualaarinerit siunnersuutillu tamarmik tusarusullugit erseqqissaatigaa.
- Uuliasiorfimmut kalaallillu innuttaasuinut pitsaanerpaamik iliuuseqarnissara anguniarpara.
Suli qularnartoqartoq
Sumiiffimmi uuliamik niuernikkut iluanaarutigineqarsinnaasumik nassaassaqarnersoq suli qularnarpoq, tamanna suliniutip siunissaanut aamma oqallinnernut tassunga tunngasut aalajangiisuujumaarpoq.
Kisianni uuliaqartoq paasineqassappat – Nordsømilu nassaarineqartutullu uuliamik suliariuminartumik ikuallassaatitaqanngitsumik uuliaqarluassappat – tamanna Kalaallit Nunaannut iluaqutaassasoq qularutiginngilaa.
- Ineriartornermut pitsaalluinnartuusinnaavoq, kisianni kalaallinut inuiaqatigiinnut suna pitsaanerpaanersoq uanga aalajangigassarinngilara, Robert Price oqarpoq.
- Uanga malittarisassat paasilluarlugillu allagaatit pisariaqartinneqartut nassiussinnaavakka. Tamannami naggaterpiaani kalaallinut inuiaqatigiinnut pitsaalluinnartuusinnaavoq.
