Dr. Philip nunatsinnukarnissaraluani taamaatikkaa
Dr. Philip Ittoqqortoormiunut tikeraarnissaa taamaatinneqarpoq.
DR taama allappoq, KNR-ip paasissutissaq Greenland Energy Companymit uppernarsartippaa.
Dr. Phil pisortatigoortumik Phil McGrawimik ateqartoq, Ittoqqortoormiinut tikeraartussaagaluartoq, Greenland Energy Company suleqatigalugu ingerlatseqatigiiffiup uuliasiornera pillugu piviusulersaarummik aallakaatitassiortussaagaluarpoq.
- Dr. Phil juulimi piffissamiluunniit allami ukioq manna Ittoqqortoormiinukarnissaminik Tunumukarnissaminilluunniit pilersaaruteqanngilaq, Roderick McIllree Greenland Energy Companymi ingerlatsinermi pisortaq KNR-imut allakkatigut taama oqaaseqaateqarpoq.
Ingerlatseqatigiiffiup Ittoqqortoormiiniittoq soqutigineqarpat aatsaat tikeraartoqarsinnaanera oqaatigaa.
- Siunissami tikeraartoqarnissat tamarmik najugaqartut peqatigalugit, najugaqartunit soqutigineqassappata, pilersaarutigineqassapput, Roderick McIllree taama oqarpoq.
Dr. Philip suliniut pissanngatigalugu NewsNationimit apersorneqarami oqaatigaa:
- Naatsorsuutigisaattut ingerlassappat, isumaqarpungalu pingaaruteqartoq, taassuma Kalaallit Nunaannut inuinullu ataavartumik allannguisinnaassasoq, taama oqarpoq.
Læs ogsåDr. Phil er vært på ny dokumentar om oliejagt i Grønland
Piviusulersaarummi ’Arctic Wildcatters’-imi immikkoortuni arfinilinni Amerikamiut uuliaatileqatigiiffiata Nunap Qeqqani uuliasiornerata saqqummiunneqarnissaa pilersaarutaagaluarpoq.
Dr. Philip Ittoqqortoormiinukarniarunnaanerata kingorna piviusulersaarummut tunngatillugu qanoq pisoqarumaarnersoq paasissutissiissutigineqanngilaq.
Pisortaq nutaaq attaveqaqatigiinnerlu pitsaanngitsoq
Greenland Energy Companyp ingerlatsinermut pisortartaarnera tallimanngormat saqqummiunneqarpoq. Roderick McIllree Robert Price maannamiit taarserpaa, nunatsinnilu akuersissutigineqartussanut oqartussaasutullu suliassanut tunngatillugu aqutsisuussaaq.
Greenland Energy Companyp aamma attaveqatigiinnertik pitsaannginnerarpaa:
- Suliamik alutorinninnitsinni attaveqaqatigiinnermik, kikkut Kalaallit Nunaanni sunut akisussaanersut pillugit paatsuunganartumik aallartitsisimavugut – tamanna arlaannulluunniit iluaqutaasimanngilaq, minnerunngitsumik najukkani inuiaqatigiinnut, suliassanut qaninnerpaami najugaqartunut.
Læs ogsåAmerikansk olieselskab vil finde 13 milliarder tønder olie i Østgrønland
KNR-ip Robert Pricep Greenland Energy Companyllu aningaasaliisartunut Ittoqqortoormiinilu najugaqartunut attaveqartarnerisa assigiinnginnerat qaammatini kingullerni saqqummiuppaa.
Greenland Energy Companymit oqaatigineqartutuut nappartanik uuliamik imalinnik 13 milliardinik nassaartoqarsinnaanissaa ilaatigut eqqartorneqarpoq:
- Nalunaaruteqarnerit assigiinnginneri peqqutaasimagunarlutik ernumasoqartoq, aamma tamanut ammasumik oqaloqatigiinnermut akoorusuttoqartoq maluginiarparput, tusagassiuutinut nalunaarummi taama allassimasoqarpoq:
- Sproule ERCE suliassaqarfimmut attuumassuteqanngitsutut naliliinerani erseqqissarneqarpoq, Nunap qeqqani nappartat 13 mia.-t tikillugit qallorneqarsinnaasumik uuliaqartoq. Kisitsisit eqqoriaanerupput, iluatsitsinissamut ilimanaat 10 procentiulluni.
