USA sinniisoqarfittaaminut ‘sakkulisanngitsunik’ sillimasussarsiortoq

Amerikamiut sinniisoqarfiat, Nuup qeqqani allaffeqarfimmut attartukkaminnut 3.000 kvadratmeteriusoq iserternissaminnut piareersaleruttorput.

Isumannaallisaanermi sillimasut arfineq-marlunnik sinniisoqarfimmi sulisunut paarsisussanik maanna sulisussarsiuleruttorput.

Atorfiit sakkulisarfiunngitsut sulisussarsiornermi allagartaliuussami allaqqavoq, Amerikamiullu Kalaallit Nunaanni sinniisoqarfiata anguniagaanut “immikkuullarilluinnartumik” tapersersueqataanissamut periarfissiilluni.

‘Misigisassarsiornerujussuaq!” atorfimmut allagartaliussami suliffissarsiortunut pilerisaarutigineqarpoq.

Sinniisoqarfik sinnerlugu oqaaseqartartoq allakkatigut akissuteqarnermini allappoq, sumiiffimmi najugalinnik nakkutilliisussarsiorneq, Amerikamiut sinniisoqarfianni sillimaniarnerup Amerikamiut nunarsuaq tamakkerlugu sinniisoqarfiini isumannaallisaanermi nalinginnaasuutitanut naleqqussaaniarnerannut takussutissaasoq.

-Sinniisoqarfimmut nutaamut atuuffeqartuartussamut iserternissarput piareersartillugu, oqaaseqartartoq allappoq ilassutigalugulu, isumannaallisaanermik suliallit Nuummi sinniisoqarfimmut aalajangersimasumik siooranartoqarnera pissutigalugu atorfinitsitaannginnissaat pingaaruteqarluinnarpoq, USA-lli nunarsuarmi sinniisoqarfigisaanni isumannaallisaanerup tungaatigut malittarisassat malinneqarnerannik qulakkeerinninnissaq siunertaralugu atorfinitsitsinissaq.

Sinniisoqarfimmut isumannaallisaasussarsiornerup saniatigut, allaffissornikkut ikiortinik marlunnik, sinniisumut ikiortimik ataatsimik qullersanullu ikiortimik ataatsimik sulisussarsiortoqarpoq, tamannalu isertertoqangajalerneranut takussutaavoq. 

‘Piaartumik’ 

Oqaaseqartartup sinniisoqarfik sinniisoqarfittaassamut Oles Varehusip inissisimaffikuaniittumut Imaneq 41-miittumut iserternissamut piareersarnerarpaa.

- Naak iluata tungaani suli naammassisassaqaraluartoq, allaffeqarfissatsinnut nutaamut piaartumik iserternissarput qilanaaraarput, oqaaseqartartoq akivoq. 

Oqaaseqartartulli ulloq suna nutsertoqalernersoq oqaatigisinnaanngilaa. 

Karsit nutsernermi atortakkat illorsuarmut portusuumut, USA-p 2025-p aallartinnerani attartuligaannut, eqqussuunneqartut  februaarimi takuneqarput.  

Nutserisut karsinik illorsuarmut eqqussuisut februaarimi nammineq assilisamit takuneqarsinnaavoq.

Illorsuup quleriiaavini allerpaaq, biiliisiviusoq, allaffeqarfissiallu quleriaat siullianni aappaannilu inissisimasut Amerikamiunit attartorneqarput. 

Akunnittarfiup Aurora Hotelip inissiaatai, illorsuup immikkoortortaata aappaannut suli atapput.

Akunnittarfik Amerikamiut iserternissamut pilersaarutaannut tunngasunik allanik paasissutissaateqarnani oqarpoq. 

Allaffeqarfissatut attartortitaasa tungaannut qummut qiviaraanni, igalaat karsinik assersoqqanerat ilummullu takusaqartoqarsinnaannginnera ullumikkut takuneqarsinnaavoq.

Sinniisoqarfinngortussap igalaavi karsinik assersoqqasut, sapaatip akunnerani matumani nammineq assilisamit takuneqarsinnaavoq.

Sulisut malunnaatilimmik amerleriarnissaat sinniisoqarfimmit naatsorsuutigineqarnera, siornatigut oqaatigineqareerpoq.

Sinniisoqarfimmi sulisut manna ikittuinnaapput.

USA-p aallartitaqarfianik alliliineq

Amerikamiut "aallartitaqarfimminnik ineriartortitsinissaq nukittorsaanissarlu" anguniarlugu allaffiit annerusut ukiuni arlalinni ujartorsimagaat, oqaaseqartartoq allappoq.

Ininik nutaanik peqalernikkut Amerikamiunut Kalaallit Nunaanniittunut kiffartuussinernik amerlanerusunik neqerooruteqarsinnaalersitsisoqassasoq, aamma kalaallit USA-mut sivikitsumik tikeraarnissaannut visuminik amerlasuunik tunniussisinnaalersitsisoqassasoq, sinniisoqarfik ilisimatitsivoq.

Illu taanna illoqarfiup qeqqaniittoq USA-p nunanut allanut ministereqarfianit sanaartornerup nalaani ukiorpassuarni inniminnerneqaqqavoq.

USA-ttaaq sinniisoqarfiata allaffissaa sivisuumik piareersarneqarpoq.

Oqaaseqartartoq sooq 3.000 kvadratmeterit pisariaqartinneqarnersut itinerusumik oqaaseqarusunngilaq, sinniisoqarfiulli kiffartuussisinnaanerata ilaanik kiffartuussinerulersinnaanini qilanaaralugu oqarpoq.

Taamaattumik sinniisoqarfimmi isumannaallisaasut arfineq-marluk saniatigut allaffissornikkut sulisussanik marlunnik atorfinitsitsisoqassaaq: sinniisoqarfimmi ikiortimik ataatsimik aamma pisortatut ikiortimik ataatsimik. Atorfik kingulliusoq atorfiuvoq inuttalerneqaqqittussaq.

Amerikamiut sinniisoqarfiini aallartitaqarfiinilu arlalinnik immikkoortortaqarfeqarneq nalinginnaasuuvoq.

Peqqarniisaarnianut illersorumalluni assiaqutit igalaallu aserorterneqarsinnaanngitsut atorneqartarnerat nalinginnaasuuvoq – aamma Nuummi sinniisoqarfissami taamaappoq, Sermitsiaq allappoq.

Sinniisoqarfimmi sulilertussat qassiussanissaat naatsorsuutaanersoq, oqaaseqartartoq oqarusunngilaq.

- Maannakkorpiaq nalunaarutissaqanngilagut, oqarpoq.