Tasiilami piteraq: Igalaat arlallit aserorput inunnilli ajoqusertoqarani

Tasiilami piteraq igalaanik aserortiterivoq persertitsillunilu, inunnilli ajoqusertoqanngitsoq, upalungaarsimanermi pisortap oqaatigaa.

Allattoq Steve Pedersen Hinrup

marsip 20-at 2026 15:32

Tasiilami piterarnerani inunnik ajutoortoqarneranik nalunaartoqanngilaq.

Tasiilami upalungaarsimanermi pisortaq Hendrik Andreassen taama ilisimatitsivoq. Kisianni qatserisartunik ulapisitsisimasoq, upalungaarsimanermi pisortaq, Hendrik Andreassen oqarpoq.

Taassumalu piteraq ima oqaasertalerpaa:

- Kingullerminngaanniit sakkortuneruvoq, oqaatigerusupparalu piteraq naliginnaasoq sakkortunngitsoq, taanna oqarpoq.

Arlallit igalaatik silarliit aserortut nalunaarutigigaat, upalungaarsimanermi pisortaq, Hendrik Andreassen oqarpoq:

- Arlaqartut aamma sianerput oqarlutik igalaatik thermoruderusut, igalaat silarliusut aserorsimasut. Aamma taakku orniguttussaannginnatsigit, aatsaat tamaat aserorpat illup iluani, taanna oqarpoq.

Tasiilami piteqqap takkutinngitsiartoq nittaassimavoq, tamannalu persertitsillunilu aputaajaasunut ilungersunartoq, upalungaarsimanermi pisortap oqaatigaa:

- Aputaajaasoq aamma malinnaasinnaarpiannginnami, aqquserngit immaqa pingaarnerit kisiisa massakkut ammatippai. Taavalu illoqarfiup ilaa aputaajarneqarani.

Hendrik Andreassen oqarpoq, nangillunilu:

Aamma atuaruk DMI Piteraq pillugu: - Sakkortoorujussuuvoq

- Qatserisarfiup mobilia sianeqattaarpoq inuit angallateqqullutik, suliffimminnit soraartut, oqartarlutik illumi igalaat ilai matusinnaannginnerarlugit. Innuttaasunut ilisimatitsissutigivarput igalaat tamarmik isumannaarneqassasut.

Tasiilami upalungaarsimanermik suliaqartut kommune peqatigalugu innuttaasunutsioqqutsillutik piareersarnissamik kajumissaarisimapput. Piterarli aallartimmat innuttaasut qatserisartut suliassarinngisaannik ikioqqullutik sianeqattaarsimasut, upalungaarsimanermi pisortaq oqarpoq:

- Allagartaliinerput innuttaasunit paatsoorneqarsimavoq, isumaqarlutik sunut tamanut ikiuussinnaasugut , taamaattoqanngilarli. Ajoqusertunut pinartumik ikiortarialinnut taamaallaat ikiuuttussaavugut, Hendrik Andreassen oqarpoq.

Upalungaarsimanermik suliaqartut imminnut sissuerlutillu paaralutik isumannaatsumillu suliaqarnissaat pingaaruteqartoq, taassuma oqaatigaa.

- Anorlernerup nalaani suliaqassagutta taakku suliarisinnaannginnatsigit, uatsinnut aamma isumannanngittussaagami, taanna oqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.