Frederiksen: Iligisatta Kalaallit Nunaat pillugu tapersersupallappaatigut

Iligisanik qanigisanik pisariaqartitsileraannilu ikiuussinnaasunik peqarnissaq aatsaat taama pingaaruteqartigaaq.

Mette Frederiksen EU-p Bruxellesimi ataatsimeersuarneranut atatillugu, DR-illu Danmarkip nunallu allat arlallit Kalaallit Nunaat pillugu akerleriinneq 2026-p aallartinnerani sakkortusiartormat ajornerpaamut piareersimasimasut oqaluttuarereeraalu taama oqarpoq.

- Sioorasaarinerit januaarimi ingasatsikkiartormata Europami nunat angisuut ingerlaannaq qisuariarput. Europap sinneranit ilitaatsinnillu Canadamit tapersersorneqarpugut.

- Silarsuaq ullumikkut taamaatsillugu kisimiissinnaanatalu allat tunuinnarsinnaanngilagut. Taamaattumik ajornartorsioraangatta nunanit allanit tapersersorneqarsinnaaniassagatta uaguttaaq siuttuusariaqarpugut, taanna oqarpoq.

Aalersueratarnissamut aammik qaartartunillu nassartut

DR-ip paasissutissaatai naapertorlugit danskit nunallu allat sakkutuui Kalaallit Nunaanni pissutsit aallartitaqarfittuinnaq atuukkunnaarlutik ajornerulersinnaasut piareersimasimapput. Tassami Amerikamiut nunamik aqutsileqqinnissaminnik kissaateqarnerat januaarimi sakkortunerulerpoq.

Tusarfiit kinaassutsiminnik isertuussisut, ilaatigut naalakkersuisuni Europamilu nunani iliusuni pingaarutilimmik inissisimaffeqartut, paasissutissiinerat taama oqaluttuarput.

Sakkutuut taakku sakkutuunut amerlanerusunut ilaatigut Frankrigimeersunut, Tysklandimeersunut, Norgemeersunut Sverigemeersunullu Kalaallit Nunaannukartinneqartunut ilaapput - sungiusarnermut "Arctic Endurance"-mut peqataaniarlutik aallartitaasimagunartunut.

DR-illi danskit sakkutuui Kalaallit Nunaannut aallaramik aalersueratarnissamut aammik qaartartunillu nassataqarsimasut ilisimatitsissutigaa.

Amerlanertigut sungiusarnerinnaatillugu aalersueratarnissamut aammik nassartoqarneq ajorpoq, Amerikamiullu nunamut isaanissaat ajornakusoortinniarlugu qaartartunik mittarfinnik aserorterissutissatut nassartoqarsimagunarpoq.

- USA-p iliuuseqarnissaanut akisunerulersitsinissaq siunertaavoq. Illersornissaqarfimmit tusarliisup DR-imut oqarnera naapertorlugu Kalaallit Nunaat tiguarumallugu USA akeqqersimaarluni iliuuseqartariaqarpoq.

/ritzau/