Tusagassiivik: Putinip Rusland naalliutsitsisarneq pillugu isumaqatigiissummit anisinniarpaa

Ruslandip præsidentiata Vladimir Putinip Europami isumaqatigiissummit, naalliutsitsisarnernik inuppalaanngitsumillu pinnittarnernik pinaveersaartitsisumit, nunap aninissaanut Ruslandip inatsisartuinut inatsisissatut siunnersuutigaa.

Ruslandimi nutaarsiassaqartitsivik Tass naapertorlugu inatsisartut paasissutissiiviani tamanna takuneqarsinnaasoq, Reuters allappoq.

Ruslandip isumaqatigiissummit aniniarluni pilersaarutaa aggustip naaneranili nalunaarutigineqarpoq.

Peqqussummi Ruslandip ministeriuneranit, Mikhail Misjustinimit, atsiorneqarsimasumi tamanna takuneqarsinnaasoq, taamanikkut Politico allappoq.

Ernumanartoqangaartoq

Sapaatip-akunnerata siuliani Naalagaaffiit Peqatigiit inuit pisinnaatitaaffii pillugit allaffeqarfiata (OHCHR) tusagassiuutinut nalunaarummi Ruslandip isumaqatigiissummit aniniarnera ernumanartoqartillugu oqaatigaa.

Naalagaaffiit Peqatigiinni immikkut nalunaarusiortartut Alice Jill Edwardsip (naalliutsitsisarneq pillugu) Mariana Katzarovallu (inuit pisinnaatitaaffii pillugit) isumaqatigiissut „parnaarussivinni sumiiffinnilu allani inunnik kiffaanngissusiiagaaffiusuni innarlerneqarnissamut tunngaviusumik illersuutaasutut“ taavaat.

- Nunanit tamalaanit nakkutilliisut - ilaatigut uagut nammineq nakkutilliisutta - iseqqusaajunnaartinneqartuarnerat - maannalu Ruslandip misissuisinnaasunik taamaattunik mattusilluinnarniarnera tigummigallarneqartut qanoq pineqartarnerannik ernumanartoqartitsivoq, Naalagaaffiit Peqatigiinni nalunaarusiortut allapput.

Isumaqatigiissut 1987-imi Europap Siunnersuisoqatigiivinit akuerineqarpoq, Ruslandilu kingusinnerusukkut ilaasortanngorpoq.

Europamili Siunnersuisoqatigiit marsimi 2022-mi Ukrainemi sorsunneq aallartimmat Rusland ilaasortaajunnaarsippaa.

Europami Siunnersuisoqatigiit naapertorlugit isumaqatigiissut naalliutsitsisarneq inuppalaanngitsumillu pinnittarnerit pillugit pinaveersaartitsisuusoq “isumaqatigiissutaavoq ammasoq”, tamannalu tamassumunnga pituttorsimanermut isumaqarpoq – anisitaareeraluaraanniluunniit.

Tamanna Europap Siunnersuisoqatigiivisa novembarimi 2024-mi tusagassiuutinut nalunaarummi erseqqissarpaat.

/ritzau/