Greenland Airportsimi siulersuisut Naalakkersuisunit taarserneqartut
Greenland Airports Mittarfeqarfiit A/S pingasunngornermi ullaaq manna qulinut immikkut ittumik ataatsimeersuarneranni siulersuisuni ilaasortat tamarmik tunuarput.
Taamaalilluni Greenland Airportsimi siulersuisut maanna tamarmik nutaanik inuttaqalerput taakkunani siulittaasunngorluni Jens Wittrup Willumsen.
Jens Wittrup Willumsen mittarfeqarfinnut tunngasunik misilittagaqarpoq Air Greenlandimilu 2011-miit 2016-ip tungaanut siulersuisuni siulittaasuusimalluni.
Siulersuisuni ilaasortanngortut nutaat tassaapput Anni Thøgersen, Anette Grønkjær Lings aamma Kristoffer Plenge-Brandt
Immikkut ittumik ataatsimeersuarnermi Naalakkersuisut Siulittaasuat Jens Frederik Nielsen (D) oqalugiaateqarpoq.
- Ingerlatseqatigiiffiup Kalaallit Nunaata ingerlanneqarnerani pingaaruteqassusaa qitiulluinnarluni inissisimanera aallaavigalugit ulluinnarni aqutsisunngortut tamarmiusut Naalakkersuisunit piumaffigineqarput ingerlatseqatigiiffimmi isumannaallisaanermik suliat tassunga ilanngullugit nittartakkatigut attaveqaatit ingerlatseqatigiiffiup ingerlanneqarneranut attaveqaasersuutitullu pingaarutilittut inissisimalluni sullissineranut pingaaruteqaqisut immikkut annerunerusumillu isiginiaqqullugit, Jens Frederik Nielsen oqarpoq.
Siulersuisunilu ilaasortanngortut nutaat mittarfinnik ingerlatsinermi niuernikkut sulinermilu immikkut aamma misilittagaqartut Jens Frederik Nielsenip oqalugiarnermini ilanngullugu oqaatigaa.
