Assammik arsarneq: Arnat VM-mut anngunniarnissamik siunnerfileqqipput

Kalaallit arnat assammik arsartartut erinitsattoqalersorlu sungiusaqatigiilerput oktoberimilu Islandiliassallutik.

Allattoq Noah Mølgaard

septembarip 10-at 2025 10:50

Assammik arsarnermi VM 2027.

Tassa kalaallit arnat arsarnermi nunanut allanut unammisartut sapaatip akunnera tulleq sungiusaqatigiilersut angorusulluinnagaat.

Kalaallit 2023-mi Norgemi Danmarkimmilu VM-qataapput VM-mut anngunniunnermi Nunatsinni pisuni ajugaangamik. Ukioq mannali VM-mut anngunniunnermi kalaallit peqataassanngitsut nalunaarutigineqarpoq assammik arsartartut kattuffiat TAAK aningaasassaaleqimmat.

Aamma atuaruk Aningaasaataarunneq: Assammik arsarnermi arnat VM-mut anngunniuteqataassanngillat

- VM-reernitsinni aporfiit arlaqarmata peqataanngiinnartariaqarsimavugut uagullu aamma kattuffittut akisussaaqataavugut, arnani nunanut allanut unammisartuni sungiusaasuugallartoq aamma TAAK-mi siunnersorti Johannes Groth KNR-mut oqarpoq.

VM-mut anngunniunnissamut kalaallit peqataaniarunnaarnerat arsartut illersuisullu pakatsissutigeqaat. Maannali aallaqqaataaniit aallartittoqarpoq pisussanillu pilersaarusiornerit ingerlaqqilerlutik.

VM-mut anngunneq naammanngilaq

- Neriuppugut una pisussaq arnat piumassusinissutigissagaat. Takoreerparpummi ukiut arlallit pimoorussillutik sungiusareerlutik VM-mut annguttut, Johannes Groth oqarpoq.

Aamma atuarukNunanut allanut unammisartut VM-imi unamminerminni kingullermi ajorsartut

Assammik arsarnermi nunat angisut mikinerillu kalaallit VM-qataanerminni unammivaat, taamaattorli ajugaanatik kingullersatut inissipput.

- Takutereerparput qanoq angusaqarsinnaanerluta VM-mullu anngulluta, kisianni taanna naammaginngilarput. Imaassinnaavoq amerlanerit akissarsiutigalugu assammik arsartarneq toqqaraat taamalu iligiit suli pikkorinnerulersillugit, Johannes Groth oqarpoq.

- VM-mut anngunneq naammagiinnassanngilarput. Pikkorinnersagut arnani angutinilu suli pikkorinnerulersikkusuppagut, Johannes Groth oqarpoq.

Sapaatip akunnera tulleq sungiusaqatigiinnissami taanna sungiusaasuussaaq tassungalu arsartut 25-it aggersarneqarput.

Arnat assammik arsartartut uku sungiusariaqquneqarput

Ajla Bibi Knudsen, K-33
Bonna Motzfeldt, K-33
Mia Egede Rasmussen, K-33
Aili Lukassen. Island
Ivâna Meincke Zeeb, Island
Ivalu Bjerge, Danmark
Kathrine Fuglsang Mikkelsen, Danmark
Nukaaka Petrussen Lyberth, Danmark
Maja Motzfeldt-Skovgaard, SAK
Tanja Kristiansen, SAK
Nivi Fly, GSS
Aviaaja Heilmann, GSS
Andrea Heilmann, GSS
Aviana Kâjangmat, NÛK
Nuunu Marie Lukassen, NÛK
Ane-Sofiannguaq Frederiksen, GSS
Anja Heilmann, GSS
Nivi Jensen Petersen, GSS
Christina V. Lange, NÛK
Najaaja L. Heilmann, GSS
Sandra Rothberg Hermansen, NÛK
Pilunnguaq Rosing Wille, GSS
Aili Pedersen, GSS

Peqataasinnaanngitsut:
Panu P. Grønvold, GSS
Monica Olsen, NÛK

Arsartut ikinnerusut toqqarneqassapput siornatigut nunanut allanut unammisartut Jakob Larsen aamma Ulrik Winther Hansen siuttoralugit oktoberimi Islandiliartoqarnissaanut. Tassani sungiusarnerup saniatigut Islandip U-20-nik nunanut allanut unammisartui kalaallit unammissavaat.

Nuna tamakkerlugu sungiusaasumik nutaamik toqqaanissaq suli TAAK-mi sulissutigineqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.