Pele Broberg ulloq pisoqarfiusupilussuaq pillugu: Tupigisorujussuuarput
Naleraq naalakkersuisoqatigiillu akornanni pissutsit ajorneruleriartuinnarput.
Nunattami, Danmarkip USA-llu sillimaniarnermut isumaqatigiissutaat oqallisigineqartussaanerani pisoqartupilussuuvoq.
Siullermik Naleraq paasissutissanik isertuussassanik saqqummiussisimanerarlugu politiinut nalunaarutiginnittoqarpoq.
Naleraq tamatuma kingorna nunanut allanut naalakkersuisumik, Múte B. EGedemik tatiginnikkunnaarnissamik siunnersuuteqarpoq, tamannali partiinit allanit taperserneqanngilaq.
Tatiginninnginnermik taasititsinissamut siunnersuut naalakkersuisup eqqunngitsumik oqarsimaneraaneranik tunngaveqartoq, Naleqqap siulittaasua, Pele Broberg KNR-imut oqarpoq.
- Apuunnikuusaa, USA-mit aningaasanik piumasaqarsimanikuunatik ataasinnguamilluunniit, kingornalu naqqinniarsarilaarpaa, toqqaannanngitsuminngooq. Kisiannilu paasillutigu, naamik toqqaannartuminngooq apeqqutigisimagaluaraat, Pele Broberg oqarpoq.
Paasissutissanik isertortunik saqqummiussisoqarsimagami tatiginninnermik innarliisoqarsimasoq, Múte B. Egede, oqaluuserisassami akissuteqaammini oqarpoq.
Naalakkersuisullu inatsisartunik tatiginninngikkuni naalakkersuisuusinnaanngitsoq, Pele Broberg oqarpoq.
Politiinut nalunaarutiginninneq
Aamma paasissutissanik isertortunik saqqummiussisimaneq pillugu politiinut nalunaarutiginninneq, Pele Brobergip paasiuminaatsippaa.
Taassuma oqarnera naapertorlugu, isumaliutissiissummi saqqummiunneqartut, Inatsisartut siulittaasoqarfiatigut nunanullu allanut sillimaniarnermut ataatsimiititaliatigut ingerlasarpoq.
- Ataasinnguamilluunniit oqartoqarnikuunngilaq, inerteqqutaavoq, arlaatigulluunniit innarliivoq.
Aamma kina politiinut tunniunneqarsimanersoq nalullugu, Pele Broberg oqarpoq.
- Uagut tusaannarparput, Inatsisartut siulittaasoqarfiat politiinut tunniussisimasoq. Taamaammat uagut tunngaviatigut naluarput, kina qanorlu tunniussisoqarnersoq.
Inatsisartut siulittaasoqarfiata politiinut tunniussinera paasiuminaatsillugu taanna aamma oqarpoq.
- Naalakkersuisoq pasilliippat, Inatsisartunut ilaasortanik, politiinut tunniussisussaavoq. Taannalu eqqartuussivitsigut aatsaat ingerlanialerpat, Inatsisartut malersorneqarsinnaannginnerannik illersuuterput aatsaat peerneqassaaq.
- Aqqutit eqqortut avaqqutaarlugit inissiisimanera, Naleqqamit tupigisorujussuuarput, Pele Broberg oqarpoq.
USA-mut isumaqatigiissut nutaaq Inatsisartuni marlunngornermi akuerineqarpoq. Taamaammat Folketingimi oqaluuserineqarnissaa taamaallaat amigaataalerpoq. Tamanna novembarip 19-ianni pissaaq.