Partii USA-mut isumaqatigiissummut tunngasunik paasissutissanik isertuussanik annissisimasutut pasineqartoq

Naleraq USA-p, Danmarkip Kalaallit Nunaatalu sillimaniarneq pillugu isumaqatigiissusiornerannut atatillugu paasissutissanik isertuussanik annissisimasoq naalakkersuisut pasilliutigaat.

USA-mik isumaqatigiissutip inatsisartuni naammassillugu ullumi marlunngornermi oqaluuserineqarnissaanut atatillugu nunanut allanut, inuussutissarsiornermut aatsitassanullu naalakkersuisup Múte B. Egedep(IA) akissuteqaataani tamanna atuarneqarsinnaavoq.

Paasissutissat isertuussat Naleqqap ikinnerussuteqarlutik oqaateqarnerminni tamanut saqqummiussimagaat naalakkersuisut oqaatigaat. Tamanna inatsisartut internetikkut qupperneranni takuneqarsinnaavoq:

- Naleqqammi ikinnerussuteqarlutik oqaaseqarnermini paasissutissanik isertuussassanik, Naalakkersuisut Nunanut Allanut Sillimaniarnermullu Ataatsimiititaliamik matoqqasumik ataatsimiinnermit anngussaanik tamanut saqqummiussivoq. 

- Tamanna Ataatsimiititaliap paasissutissanik isertuussassanik passussinermi suleriaasaanut unioqqutitsineruinnanngilaq. Kalaallit Nunaatali nunanut allanut politikkianik Naalakkersuisut Inatsisartullu suleqatigiinnerini tatiginninnermik tunngaviusariaqaraluartumi innarliivoq, Múte B. Egede akissuteqaammi ilaatigut allappoq.

Kalaallit Nunaata nunani tamalaani tatigineqarneranut tamanna innarliisinnaasoq taanna aamma oqarpoq.

Paasissutissat isertuussat suut pineqarnersut itinerusumik oqaatigineqanngilaq.

USA-p akiliuteqarnissaa naalakkersuisut anguniarsimagaluaraat , iluatsinngitsumilli, Naleqqap ilisimatitsiviusumik ataatsimiinnermi ikinnerussuteqarluni oqaaseqarnermini oqaatigaa.

Múte B. Egedelli akissuteqarnermini tamanna ilumuunnginnerarpaa:

- Isumaqatigiissut “silaannaq isumaqatigiinninniarfigineqartumi”, piffissamilu matumani piviusumik inuuffigisarput malillugit isumaqatigiissutaavoq. Tassunga atatillugu Kalaallit Nunaata illersorneqarnissaanut Naalakkersuisut USA-mit toqqaannartumik akiliisitsiniarsimanngillat, naalakkersuisoq allappoq.

Ataatsimiititaliap Naalakkersuisumik ilisimatitsiviusumik ataatsimeeqateqarneranit Naleqqap allattugaatai malillugit, taava ataatsimiititaliaq ilisimatinneqarpoq isumaqatigiissutip timitalerneqarnissaanut nunanut allanut tunngasunut suliassaqarfimmut aningaasaliissutit malunnartumik amerlineqarnissaannik piumasaqaatitaqassasoq. 

Isumaqatigiissut USA-mit, Danmarkimit Kalaallit Nunaanniillu New Yorkimi septembarip ulluisa 22-anni atsioqatigiissutigineqarmalli Naleraq isornartorsiuiarsimavoq.

Isumaqatigiissutip innuttaasunut taasissutigineqarnissaa, Naleqqap, inatsisartunut 2025-mi qinersinermi 24,5 procentinit taaguunneqartup, kissaatigisimavaa.

Naalakkersuisut inatsisartuni amerlanerussuteqarmata isumaqatigiissutip inatsisartuni marlunngornermi taasissutigineqarnerani amerlanerussuteqartunit akuersissutigineqarnissaa naatsorsuutigineqarpoq.

Isumannaatsuunissaq pillugu isumaqatigiissut Kalaallit Nunaanni Danmarkimilu akuersissutigineqareerpat aatsaat atuutilissaaq. Folketingip isumaqatigiissut novembarip 19-ianni taasissutigissavaa.

RITZAU